20 އަހަރަށްވުރެ ދިގު މުއްދަތަކަށް ދެމިގެންދިޔަ އަސްކަރީ ޙަރަކާތްތަކަށްފަހު، އިރާޤުގައި ތިބި އެމެރިކާގެ އެންމެ ފަހު ސިފައިން އެ ޤައުމު ދޫކޮށް ދާން ފަށައިފިއެވެ.
2024 ވަނަ އަހަރު ޖޯ ބައިޑަންގެ ރިޔާސަތުގައި ވެވުނު އެއްބަސްވުމާ އެއްގޮތްވާ ގޮތުގެ މަތިން، ޑޮނަލްޑް ޓްރަމްޕްގެ ސަރުކާރުން އިރާޤުގައި ތިބި އެމެރިކާ ސިފައިންގެ އެންމެ ފަހުގެ ފައުޖުތައް ބުދަ ދުވަހުގެ ނިޔަލަށް އެ ޤައުމުން ބާލަން މިހާރު ވަނީ ހަމަޖެހިފައެވެ. 2003 ވަނަ އަހަރު އެމެރިކާއިން އިރާޤަށް އަރައިގަނެ ކުރިއަށްގެންދިޔަ އަސްކަރީ ޙަރަކާތްތަކުގައި އެމެރިކާގެ 4,500 އަށްވުރެ ގިނަ ސިފައިން މަރުވެފައިވާއިރު، މި ދަނޑިވަޅުގައި އެމެރިކާ ސިފައިން އެ ޤައުމުން ފޭބުމަކީ އެމެރިކާގެ ސިޔާސަތުތަކަށް ލިބުނު ނާކާމިޔާބީއެއްގެ ގޮތުގައާއި، ސަރަޙައްދުގައި އީރާނާއި އެ ޤައުމަށް ތާއީދުކުރާ ޖަމާޢަތްތަކުގެ ނުފޫޒު އިތުރަށް ގަދަވެގެންދިޔަ ކަމެއްގެ ގޮތުގައި މަސްރަޙު ދިރާސާކުރާ ފަރާތްތަކުން ސިފަކުރެއެވެ.
އިރާޤުގެ އިސްލާމިކް ރެސިސްޓެންސްގެ ކޮމާންޑަރެއް ކަމަށްވާ އަބޫ މުޖްތަބާ އަލް-ޔާސިރީ ރޮއިޓަރސްއަށް މަޢުލޫމާތު ދެއްވަމުން ވިދާޅުވީ، އެމެރިކާ ސިފައިން ފޭބުމަކީ އިރާޤުގެ މުޤާވަމާ ޖަމާޢަތްތަކަށާއި މުޅި އިރާޤުގެ ރައްޔިތުންނަށް ލިބުނު ތާރީޚީ ކާމިޔާބީއެއް ކަމަށެވެ. އަދި ސެޕްޓެމްބަރު 30 ވަނަ ދުވަހަކީ އިރާޤުގެ ތާރީޚުން އަނދިރި ޞަފްޙާއެއް ނިމުމަކަށް އައިސް، އަސްކަރީ ބާރުގެ ދަށުން އިރާޤު ކޮންޓްރޯލްކުރުމަށް އެމެރިކާއިން ކުރި މަސައްކަތްތައް ނިމުމަކަށް އައި ދުވަސް ކަމުގައިވެސް އޭނާ ފާހަގަކުރެއްވިއެވެ.
އީރާނުގެ މަޖިލީހުގެ ޤައުމީ ސަލާމަތާ ބެހޭ ކޮމިޓީގެ ނައިބު މުޤައްރިރު އާމިރު ޙަޔާތު މުޤައްދަމްވެސް ވަނީ އެމެރިކާ ސިފައިން އިރާޤުން ފޭބުމުގެ ނިންމުމަށް މަރުޙަބާ ވިދާޅުވެފައެވެ. އޭނާ ވިދާޅުވި ގޮތުގައި، މުޅި މެދުއިރުމަތިން ބޭރުގެ އަސްކަރީ ބާރުތައް ވަކިވުމަކީ ސަރަޙައްދުގެ ދާއިމީ ޞުލްޙައަށް އޮތް އެންމެ މުހިންމު މަގެވެ. އަދި ސަރަޙައްދީ މިނިވަންކަމަށް މަސައްކަތްކުރާ ޙަރަކާތްތަކަށް އީރާނުން އަބަދުވެސް ފުރިހަމައަށް އެއްބާރުލުން ދޭނެ ކަމަށްވެސް އޭނާ ވިދާޅުވިއެވެ.
އަނެއްކޮޅުން، އެމެރިކާ ސިފައިން ފޭބުމުން އުފެދިދާނެ ސަލާމަތީ ހުސްކަމުގެ ފައިދާ ނަގައި، އިސްލާމިކް ސްޓޭޓް (އައިއެސް) ފަދަ ހަރުކަށި ފިކުރުގެ ޖަމާޢަތްތަކުން އަލުން ޙަރަކާތްތެރިވާން ފަށައިފާނެ ކަމުގެ ކަންބޮޑުވުން ސޫރިޔާއާއި އިރާޤުގެ ބައެއް ސަލާމަތީ މަސްދަރުތަކުން ފާޅުކުރެއެވެ. ނަމަވެސް އިރާޤުގެ ސަލާމަތީ ބާރުތަކުން ދަނީ ޤައުމުގެ ސިޔާދަތާއި އަމަންއަމާންކަން ދެމެހެއްޓުމަށްޓަކައި އަޅަންޖެހޭ އެންމެހައި ދިފާޢީ ފިޔަވަޅުތައް ވަރުގަދަކުރަމުންނެވެ..