ކޮރަޕްޝަނުގެ ތުހުމަތުގައި ތުރުކީގެ ފުޓުބޯޅަ ފެޑަރޭޝަނުގެ ރެފްރީންގެ އެންމެ އިސްވެރިޔާ އާއި އެ ޖަމާއަތުގެ ހަ އޮފިޝަލަކު ހައްޔަރު ކޮށްފިއެވެ.
މިކަން ކަށަވަރު ކޮށްދީ، އިއުލާނު ކުރީ އެ ގައުމުގެ ޖަސްޓިސް މިނިސްޓަރު އަރިކް ގުރްލެކްއެވެ.
އޭނާ ވިދާޅުވީ މިއީ ފުޓުބޯޅަ މެޗުތަކަށް ނޭދެވޭ ނުފޫޒު ފޯރުވުމުގެ ތުހުމަތާއި ރެފްރީންގެ ކަންކަމަށް ވެސް ތަފާތު ނުފޫޒު ފޯރުވުމުގެ ތުހުމަތުގައި އެޅި ފިޔަވަޅެއް ކަމަށެވެ.
"ރެފްރީންގެ މައުލޫމާތު އެކި ފަރާތްތަކަށް ފޯރުކޮށްދިނުމާއި، މެޗުތަކަށް ރެފްރީން އައްޔަން ކުރުމުގެ ޕްރޮސެސް އާއި އެމީހުން އެސެސް ކުރުމާއި އެފަދް ކަންކަމުގެ ތަހުގީގަށް ކުރި ކަމެއް،" ސޯޝަން މީޑިއާގައި މިނިސްޓަރު ވިދާޅުވިއެވެ.
ތުރުކީގެ ފުޓުބޯޅަ ފެޑަރޭޝަނުގެ ރައީސަކީ ފަރްހަތު ގޮންޑޮގްޑޫއެވެ. އޭނާގެ އިތުރުން ހައްޔަރުކުރި އޮފިޝަލުންގެ ތެރޭގައި އޭނާގެ ޑެޕިއުޓީ ވެސް ހިމެނެއެވެ.
"އަހަރުމެން ޔަގީނުން ވެސް ކުރާނެ ކަމަކީ ތުރުކީގެ ފުޓުބޯޅައިން ފަސާދަ ފޮހެލުން. އަދި ތުރުކީގެ ފުޓުބޯޅައިގެ އިތުބާރާއި ޒިންމާދާރު ކުރުވައި ކުޅިވަރުގެ އަގުމާތްވި އުސޫލުތައް ދަމަހައްޓާނަން. އެއީ ދަނޑުމަތީގަ އާއި ދަނޑު ބޭރުގައި،" ގުރްލެކް ބުންޏެވެ.
މީގެ އަހަރެއް ކުރިން ތުރުކީން ވަނީ ރެފްރީންގެ ކޮޕަރްޝަން މައްސަލަތަކަށް ފިޔަވަޅު އަޅަން ފަށައިފައެވެ. މި ގޮތުން މިދިޔަ އަހަރުގެ ނޮވެމްބަރު މަހު ވަނީ އެ ގައުމުގެ 149 ރެފްރީ އަކު އެއް އަހަރު ދުވަހަށް ސަސްޕެންޑް ކޮށްފައެވެ. މިފަދަ ބޮޑު އަދަބެއް ދިނީ ރެފްރީން ބެޓް ކުރާ ކަމަށް ކުރެވިފައިވާ ތުހުމަތުތަކާހެދިއެވެ. އަދި ބެޓް ކުރުމުގައި އަމަލީ ގޮތުން ބައިވެރިވެފައިވާ ކަމުގެ ތުހުމަތުގައި ހަ ރެފްރީއެއްގެ މައްސަލަ ބަލަން ފެށިއެވެ.
ރެފްރީންގެ މައްސަލަ ބޮޑު ތުރުކީ ލީގުގައި ރެފްރީކަން ކުރާ ރެފްރީން މެޗުތަކުގެ ނަތީޖާ ވަކި ގޮތަކަށް ބަދަލު ކުރުމަށް މަސައްކަތް ކުރާ ބެޓިން ގްރޫޕްތަކާ ބައިވެރިގެން ފައިސާގެ ބޮޑެތި މުއާމަލާތްތައް ކުރާކަމުގެ ތުހުމަތު އަބަދުވެސް އޮވެ އެވެ. މި ގޮތުން ރެފްރީންގެ ނިންމުންތަކާމެދު ހިތްހަމަ ނުޖެހިގެން ކުޅުންތެރިން މެޗު ހުއްޓާލުމާއި ސަޕޯޓަރުން ދަނޑަށް އެރުމާއި ކުލަބުތަކުގެ ވެރިން ދަނޑަށް އަރައި ރެފްރީންނާ ކުރިމަތިލުމަކީ ވަރަށް ގިނައިން ހިނގާ ކަމެކެވެ.
ތުރުކީ ފުޓްބޯޅަ ފެޑަރޭޝަނުގެ ރައީސް އިބްރާހީމް ހާޝިއޯ ސްމަނޮގްލޫ ވިދާޅުވީ މިއީ ތުރުކީގެ ފުޓްބޯޅައިގެ މޫނުމަތި ހަޑިވިޔަ ނުދިނުމަށް އެޅި ފިޔަވަޅެއް ކަމަށެވެ.
"އިންސާފާއި ކަރާމާތަކީ ވަރަށް މުހިންމު އެއްޗެއް. ގޯސްކޮށް ކަންކަމުގެ ސަބަބުން ފިޔަވަޅު އަޅަންޖެހޭ. ގަވާއިދުތައް މުގުރާލާނަމަ ނުވަތަ އެއަށް އަމަލު ނުކުރާ ފަރާތްތަކާމެދު ފިޔަވަޅު އަޅަންޖެހޭނެ. މިއީ އިތުބާރު ދަމަހައްޓަން އަޅަންޖެހޭ ފިޔަވަޅެއް. މިހާތަނަށް ކުރެވިފައިވ ތަހުގީގުތަކުން އެނގެނީ ބައެއް ރެފްރީން ސީދާ ގޮތުން ވެސް ބެޓް ކުރުމުގައި ބައިވެރިވެފައިވާކަން. މިއީ އެއްގޮތަކަށް ވެސް ބަލައިގަނެވޭނެ ކަމެއްނޫން. މިއީ އިންސާފު ގެއްލުވާލުމަށް ނާޖާއިޒު ފައިދާ ނެގުމުގެ އަމަލެއް،" ރައީސް ވިދާޅުވިއެވެ.
އޭނާ ވިދާޅުވީ ތުރުކީ ސަރުކާރުން މިހާތަނަށް ކޮށްފައިވާ ތަހުގީގުތަކުން އެނގޭ ގޮތުގައި އެ ގައުމުގެ 571 ރެފްރީންގެ ތެރެއިން 371 ރެފްރީން ބެޓިން ގްރޫޕްތަކާއެކު މުއާމަލާތް ކުރުމަށް މަދުވެގެން އެއް އެކައުންޓް ގެންގުޅޭ ކަމަށެވެ. މީގެ ތެރެއިން 152 ރެފްރީއަކު ބެޓްކޮށްފައިވަނީ ފުޓުބޯޅަ މެޗުތަކަށް ކަމަށެވެ. މީގެ ތެރޭގައި އެންމެ މަތީ ފެންވަރުގައި ރެފްރީކަން ކުރާ ހަތް ރެފްރީ އަކާއި 13 އެސިސްޓެންޓް ރެފްރީން ހިމެނޭ ކަމަށެވެ.
އޭނާ އިތުރަށް ވިދާޅުވީ 10 ރެފްރީއަކު ފަސް އަހަރު ވެންދެން ގަވާއިދުން 10000 މެޗަކަށް ބެޓްކޮށްފައިވާ ކަމަށެވެ. އަދި އެއް ރެފްރީއަކު 18227 މެޗަކަށް ބެޓްކޮށްފައިވާކަން ތަހުގީގަށް އެނގިފައިވާ ކަމަށެވެ. ރެފްރީންގެ އިތުރުން ބެޓް ކުރުމުގައި ބައިވެރިވެފައިވާތީވެ 3700 ކުޅުންތެރިއެއްގެ މައްސަލަ ވެސް ދަނީ ބަލަމުންނެވެ.