"ހިންމަފުށީ ސެންޓަރާއެކު ޑްރަގް ފަރުވާގެ ދަތިތަކަށް ވަށާޖެހޭ ހައްލެއް ލިބޭނެ"

މާލެ އަތޮޅު ހިންމަފުށީގައި ތަރައްޤީކުރާ އައު ރިހެބިލިޓޭޝަން ސެންޓަރާއެކު ޑްރަގްގެ ފަރުވާގެ ދަތިތަކަށް ވަށާޖެހޭ ހައްލެއް ލިބޭނެކަމަށް ދާޚިލީ ވުޒާރާގެ ސްޓޭޓް މިނިސްޓަރު އަދި އެންޑީއޭގެ ބޯޑުގެ ޗެއަރޕަރސަން އަލްއުސްތާޛު އަޙްމަދު ޞިއްދީޤު ވިދާޅުވެއްޖެއެވެ.

ޑްރަގް ރިހިބިލިޓޭޝަންގެ މަސައްކަތަށް ދިމާވެފައިވާ ދަތިތަކާއި ގުޅޭގޮތުން ވާހަކަދައްކަވަމުން ސިއްދީޤު ވިދާޅުވީ ޑްރަގްގެ ފަރުވާއަށް ފާއިތުވި ސަރުކާރުތަކުން އެންމެ އެކަށީގެންވާ މަސައްކަތްތަކެއް ކޮށްފައި ނުވާކަމަށެވެ. ނަމަވެސް އަދުގެ ސަރުކާރުން މަސައްކަތްކުރަނީ ފަރުވާގެ ނިޒާމު ހަރުދަނާކޮށް، ފަރުވާއަށްފަހު މުޖުތަމަޢުއަށް ނިކުންނަ މީހުންގެ އަދަދު އިތުރުކުރުމަށްކަމަށް ސްޓޭޓް މިނިސްޓަރ ވިދާޅުވިއެވެ.

ޖާގައިގެ ދަތިކަމުގެ ސަބަބުން ޑްރަގްގެ ފަރުވާ ބޭނުންވާ މީހުންގެ ތެރެއިން ފުރުޞަތު ލިބެނީވެސް މަދު އިންސައްތައެއްގެ ބަޔަކަށް ކަމަށް ސިއްދީޤު ވިދާޅުވިއެވެ. އަދި ފަރުވާ ދޭންހުރި ޖާގައިގެ ދަތިކަމުގެ ސަބަބުން ފެންވަރު ރަނގަޅުކުރުމަށް ކުރާ މަސައްކަތްތަކަށް ގޮންޖެހުން ކުރިމަތިވާކަމަށާއި، އަލަށް އިމާރާތް ކުރެވޭ ޑްރަގް ރިހެބިލިޓޭޝަން ސެންޓަރާއެކު އެމައްސަލަތައް ހައްލުވާނެ ކަމަށެވެ.

"މި މައްސަލައަށް ރަނގަޅު ހައްލެއް ލިބޭނީ އެކަށީގެންވާ މަސައްކަތްތަކެއް ކުރެވިގެން. މިއީ ސަރުކާރުން ވަރަށް ޚާއްސަ އިސްކަމެއް ދެއްވާކަމެއް." ސްޓޭޓް މިނިސްޓަރ ސިއްދީޤް ވިދާޅުވިއެވެ.

ހިންމަފުށީގައި މިހާރު ހުރި އިމާރާތަކީ 174 މީހުންނަަަަަށް ފަރުވާދެވޭ ތަނެކެވެ. ނަމަވެސް އިމާރާތް ބާވެ ހަލާކުވުމުގެ ސަބަބުން މިހާރު އެތަނުގައި ފަރުވާދެވެނީ ގާތްގަނޑަކަށް 80 މީހުންނަށެވެ. ސިއްދީޤް ވިދާޅުވީ ފަރުވާ އަށް ދާން ބޭނުންވެ ނުދެވި ތިބި މީހުންގެ ލިސްޓު ދިގުކަމަށާއި، ފަރުވާއަށް ފުރުސަތު ނުލިބުމުގެ ޝަކުވާ ކެނޑިނޭޅި ލިބެމުންދާކަމަށެވެ. ނަމަވެސް އެ މައްސަލަ އަށް އާ އިމާރާތާއެކު ރަނގަޅު ހައްލެއް ލިބޭނެކަމަށް ސިއްދީޤް ވިދާޅުވިއެވެ. ހިންމަފުށީ ރިހިބިލިޓޭޝަން ސެންޓަރގެ މަސައްކަތް ފެށީ ވަރަށް ގިނަ ގޮންޖެހުންތަކަކަށް ފަހުގައިކަމަށް ސިއްދީޤް ވިދާޅުވިއެވެ.

އެ ސެންޓަރ މެދުވެރިކޮށް މަސްތުވާތަކެތީގެ ވަބާގައި ޖެހިފައިވާ ޒުވާނުންނަށް ރަނގަޅު ފަރުވާ ލިބި، ހެޔޮލަފާ ދަރިންތަކެއްގެ ގޮތުގައި މުޖުތަމަޢަށް ނިކުތުމަކީ ސަރުކާރުގެ އުއްމީދުކަމަށް ސިއްދީޤް ވިދާޅުވިއެވެ.

އައު ޑްރަގް ރިހިބިލިޓޭޝަން ސެންޓަރަކީ 500 މީހުންނަށް އެއްފަހަރާ ފަރުވާދެވޭ ގޮތަށް ތަރައްޤީކުރާ އިމާރާތެކެވެ. އެއީ 5 މިލިއަން ޑޮލަރުގެ މަޝްރޫޢެކެވެ. މި މަޝްރޫޢަށް ޚަރަދު ކުރަނީ އެންކޯ ހޯލްޑިން ޕްރައިވެޓް ލިމިޓެޑުންނެވެ. އާ ޑްރަގް ޓްރީޓްމެންޓް އެންޑް ރިހެބިލިޓޭޝަން ސެންޓަރުގެ އައު އިމާރާތުގެ ބިންގާ އަޅާފައިވަނީ މި މަހުގެ 24ވަނަ ދުވަހުއެވެ.