ސިޓީއަށް ދޭން ޖެހޭނީ އެހެން ޓީމްތަކަށްވެސް އިންޒާރަކަށް ވާވަރުގެ އަދަބެއް - ލަލީގާ ރައީސް

އިނގިރޭސި ޕްރިމިއަރ ލީގުގެ މާލީ އުސޫލުތަކާ ހިލާފްވުމުގައި ދިގު މުއްދަތެއް ހޭދަކޮށްފައިވާ މެންޗެސްޓަރ ސިޓީއަށް ދޭން ޖެހޭނީ އެހެން ކްލަބްތަކަށްވެސް މިސާލަކަށް ވާވަރުގެ ހަރުކަށި އަދަބު ކަމަށް ލަލީގާގެ ރައީސް ހަވިއޭ ޓެބާސް ވިދާޅުވެއްޖެއެވެ.

ސްޕެއިން ލީގުގެ ރައީސް ޕްރިމިއަރ ލީގުގެ މެންޗެސްޓަރ ސިޓީގެ މައްސަލައާ ގުޅޭގޮތުން ވާހަކަދައްކަމުން ވިދާޅުވީ އަހަރުތަކެއް ވަންދެން ސިޓީން މާލީ ހިސާބުތައް އޮޅުވާލާ, މާލީ އުސޫލުތައް މުގުރާލުމުން ދޭ އަދަބު ވާން ޖެހޭނީ ޔޫރަޕްގެ އެހެން ޓީމްތަކަށްވެސް އިންޒޭރަކަށް ކަމަށެވެ. ޕްރިމިއަރ ލީގުން ވަނީ މިދިޔަ ދިހަ އަހަރުގެ ތެރޭގައި މެންޗެސްޓަރ ސިޓީން އެލީގުގެ މާލީ އުސޫލުތަކާ ތަކުރާރުކޮށް ހިލާފްވެ, އުސޫލުތައް މުގުރާލާފައިވާ ކަމަށް ބުނެފައެވެ. ސިޓީއާ ދެކޮޅަށް ހުށަހެޅި 115 މައްސަލައިގެ ތެރެއިން 114 މައްސަލަ ސާބިތުވާ ކަމަށް ކަނޑައެޅުމުން ޓެބާސް ވިދާޅުވީ އޭނާ އަބަދުވެސް އެވާހަކަ ދައްކަމުން އައި ކަމަށެވެ. އެކަންބޮޑުވުން 2017 ވަނަ އަހަރުވެސް ފާޅުކުރި ކަމަށް ވިދާޅުވިއެވެ. އެކަމަކު މިހާރު ސިޓީން ތަކުރާރުކޮށް މާލީ އުސޫލުތައް މުގުރާލިކަން ސާބިތުވާތީ ހަރުކަށި އަދަބު ދޭން ޖެހޭނެކަމަށް ޓެބާސް ވިދާޅުވިއެވެ.

ޓެބާސް ވަނީ މީގެކުރިން ޔުއެފާއިން ސިޓީ ސަސްޕެންޑް ކުރަން ދިން އަދަބު އިސްތިއުނާފްކޮށް, ސިޓީން ކާމިޔާބުކުރި ކުރުމާ ގުޅޭގޮތުންވެސް ވާހަކަ ދައްކާފައެވެ. ޓެބާސް ވިދާޅުވީ ޔުއެފާއިން އޭރު ދެއްކި ވާހަކައާއި ދިން އަދަބުވެސް ރަނގަޅުކަން މިހާރު ސާބިތުވާ ކަމަށެވެ. 2020 ވަނަ އަހަރު ޔުއެފާއިން ސިޓީ ދެ އަހަރަށް ޗެމްޕިއަންސް ލީގުން ސަސްޕެންޑް ކުރިއެވެ. އެއީ 2012-2016 އަށް ސްޕޮންސަރޝިޕް ހިސާބުތަކުގައި އޮޅުވާލާފައިވާކަމަށް ބުނާ މައްސަލައިގައެވެ. އެކަމަކު ސިޓީން ވަނީ ކޯޓް އޮފް އާބިޓްރޭޝަން ފޯ ސްޕޯރޓްގައި އިސްތިއުނާފްކޮށް, ކާމިޔާބު ހޯދާފައެވެ.

ޓެބާސް ވިދާޅުވީ ދިހަ އަހަރު މާލީ އުސޫލުތަކާ ހިލާފަށް އަމަލުކޮށް, އޮޅުވާލުމަކީ ވަރަށް ސީރިއަސް މައްސަލައެއް ކަމަށެވެ. އެހެން ކްލަބްތަކަށް އިންޒާރެއްގެ އިތުރުން ތަކުރާރުކޮށް ގަވާއިދުތައް މުގުރާލަމުން ދިއުމުން ހަރުކަށި އަދަބު ސިޓީއަށ ހައްގުކަމަށް ޓެބާސް ވިދާޅުވިއެވެ.