ދައުވާތައް ސާބިތުވާކަމަށް ބުނުމާއެކުވެސް ގާޑިއޯލާގެ ތާއީދު ސިޓީއަށް

މެންޗެސްޓަރ ސިޓީ އާއި ދެކޮޅަށް އިންގްލިޝް ޕްރިމިއަރ ލީގުން އުފުލި ދައުވާތައް ސާބިތުވާކަން ހާމަކުރުމާއެކުވެސް އެޓީމު ދުށް އެންމެ ކާމިޔާބު ކޯޗު ޕެޕް ގާޑިއޯލާގެ ތާއީދު ކްލަބަށް އޮތްކަން އޭނާ ހާމަކޮށްފިއެވެ.

ޕެޕް މިކަން ހާމަކޮށްފައިވަނީ ސޯޝަލް މީޑިއާގައި އާންމުކުރި ބަޔާނެއްގައެވެ. ޕެޕް ވަނީ ދުނިޔޭގެ އެކިކަންކޮޅުތަކުގައި ތިބި ސިޓީގެ ސަޕޯޓަރުންނަށް އިޝާރާތްކޮށް އޭނާ އެކްލަބާއި އެކު ހުރިކަމުގެ ޔަގީންކަން ދީފައެވެ. ޕެޕް ބުނީ އޭނާ އެބަހުރިން ކަމަށާއި އަދި ކުރިންވެސް، މިހާރުވެސް އަދި ކުރިއަށް އޮތް ތަނުގައިވެސް އޭނާ ހުންނާނީ ސިޓީ އާއެކު އެކްލަބްގެ ވެރިންނާއި ޗެއާމަން ހަލްދޫމް އަލް މުބާރާތް، ޗީފް އެގްޒެކެޓިވް ފެރާން ސޮރިއާނޯ، ކުޅުންތެރިން އާއި ސްޓާފުން، ކޯޗު އެންޒޯ މަރެސްކާ އަދި ކްލަބްގެ ހުރިޙާ ސަޕޯޓަރުންނާއި އެކު ކަމަށެވެ. އަދި މިހުރިހާ ކަމަކުން އެންމެން އެކުގައި އަރައިގަންނާނެކަމަށާއި އެކަން އޭނާއަށް ސާފުކޮށް ފެންނަ ކަމުގައި ހާމަކުރިއެވެ.

ސިޓީގެ ކޯޗުގެ ގޮތުގައި 10 އަހަރު ވަންދެން މަސައްކަތް ކުރުމަށްފަހު މިދިޔަ ސީޒަން ނިމުމުން ޓީމާއި ދުރަށްދިޔަ ޕެޕް ފާހަގަ ކުރެވިފައިވަނީ ސިޓީ އަށް ކުރިމަތިވާ ކޮންމެ މިފަދަ ކަމެއްގައިވެސް އެންމެ ބޮޑަށް އެކްލަބް ދިފާއުކޮށް ވާހަކަ ދައްކާ އެއްފަރާތުގެ ގޮތުގައެވެ. އަދި އޭނާވަނީ އަބަދުވެސް ސިޓީ އާއި އެކްލަބްގެ ވެރިން ދިފާއުކޮށް ވާހަކަ ދައްކާފައެވެ. މިގޮތުން 2020 ވަނަ އަހަރު ޔުއޭފާއިން ސިޓީ ދެ އަހަރު ދުވަހަށް ޗެމްޕިއަންސް ލީގުގައި ވާދަ ނުކުރެވޭނެކަމަށް ނިންމި އިރުވެސް ޕެޕްގެ ވިސްނުމަށް އެއްވެސް ބަދަލެއް ނުގެނެސް ކެރިގެން އެކްލަބް ދިފާއު ކުރުމުގައި ދެމި ހުއްޓެވެ. ހަމައެއާއެކު ޕްރިމިއަރ ލީގުން 115 ދައުވާ އެކްލަބާއި ދެކޮޅަށް އުފުލުމުންވެސް އޭނާވަނީ އެކްލަބްގެ ވެރިންނަށް ފުރިހަމައަށް އިތުބާރު އެބައޮތްކަން ހާމަކޮށް ކްލަބްގެ ދިފާއުގައި ވާހަކަ ދައްކާފައެވެ. އަދި ސިޓީ އާއި ދެކޮޅަށް އުފުލާފައިވާ ދައުވާތައް ސާބިތުވެ ސިޓީ ރެލިގޭޓްވި ނަމަވެސް އެކްލަބް ދޫކޮށް ނުލާނެކަމުގައި ޕެޕް އޭރު ހާމަކޮށްފައިވެއެވެ. ނަމަވެސް މިމައްސަލަ ދިގުލައިގެން ގޮސް އޭނާ ކްލަބް ދޫކޮށް ދިޔައިރުވެސް އެކަން ނިމުމަކަށް އައިސްފައެއް ނުވެއެވެ.

ސިޓީ އާއި ދެކޮޅަށް ފުރުލާފައިވާ ދައުވާތައް ސާބިތުވާކަން ޕްރިމިއަރ ލީގުން ހާމަކުރުމާއެކު ސިޓީއިންވަނީ މިނިވަން ކޮމިޝަންގެ މިނިންމުމާއި ދެކޮޅަށް އެކްލަބުން އެޕީލް ކުރާނެކަމަށް ބުނެފައެވެ. އަދި ސިޓީގެ ކޯޗުކަމުން ވަކިވި ނަމަވެސް ސިޓީ ފުޓްބޯލް ގްރޫޕްގެ ބްރޭންޑް އެމްބަޒަޑަރެއްގެ ރޯލް މިހާރުވެސް އަދާކުރަމުންދާ ޕެޕްވަނީ އޭނާގެ ތާއިދު ފުރިހަމައަށް އެކްލަބްގެ ވެރިންނާއި އެކު އޮތްކަން ހާމަކޮށްދީފައެވެ.

ސިޓީއާއި ދެކޮޅަށް ދައުވާތައް ސާބިތުވާކަމަށް ބުނެ މިނިވަން ކޮމިޝަނުން އެކޮމިޝަންގެ ނިންމުން ޕްރިމިއަރ ލީގު މެދުވެރިކޮށް އާންމު ކޮށްފައިވާއިރު އެކޮމިޝަނުން ބުނެފައިވަނީ ސިޓީއިން ޝޭމް ކޮންޓްރެކްޓް ތަކެއް ހަދާ ސްޕޮންސަރުންއަތުން ނުލިބޭ ފައިސާ ތަކެއް ލިބުނުކަމަށް ދައްކާފައެވެ. އަދި ސިޓީއިން ހުށަހެޅި ހެކިން ދޮގު ހެކި ދިން ކަންވެސް ކޮމިޝަނުން ފާހަގަ ކޮށްފައިވެއެވެ. ސިޓީއާއި އެހެން ހުރިޙާ ފަރާތްތަކުން ދެކޮޅުވެފައިވާ މިދަނޑިވަޅުގައި އެކްލަބާއި އެއްކޮޅަށް ވާހަކަ ދައްކާތަން ފެނިފައިވަނީ ޕެޕް ކަހަަލަ ވަރަށް މަދު ބަޔެކެވެ. އަދި މިދަނޑިވަޅުގައި މިމައްސަލަ އިތުރަށް ކުރިއަށްދާތީ ސިއްރު ހިފެހެއްޓުމުގެ ގޮތުން އިތުރު ވާހަކަ އާންމު ކުރެވެން ނެތްކަމަށް ސިޓީއިން ބުނަމުންދާއިރު މިކަމާއި ގުޅޭ ހުރިހާ ކަމެއް ވަނީ އެކިގޮތްގޮތުން އެކިފަރާތްތަކުން ލީކުކޮށް އާންމުކޮށްފައެވެ. އަދި މިކަމުގައި އެއްވެސް ފަރާތަކުން ޒިންމާ އުފުލާފައިނުވާއިރު އެއިން ފަރާތެއް ހޯދިފައެއްވެސް ނުވެއެވެ. އަދި މިއާއެކު އެހެން ހުރިހާ ކޮޅަކުން ދައްކާ ވާހަކަ ތައް އަޑު އިވެމުންދާއިރު ސިޓީގެ ވާހަކަ އަޑުއިވޭގޮތް ވަނީ އަދިނުވެފައެވެ. ދެން އުފެދޭ ސުވާލަކީ ސިޓީއިން އެހާ ބާރުލާފައި މިކަމުގައި ގޯހެއް ހަދާފައިނުވާކަމަށް ބުނާއިރު އެކަމުގެ ހެކި އެކްލަބުގެ ފަރާތުން އާންމުންނާ ހަމައަށް އާންނާނީ ކޮންއިރަކުންބާތޯ އުފެދޭ ސުވާލެވެ. ނޫނީ މިއީ ކްލަބްގެ އިސްވެރިން މިކަން ދިގު ދެންމުމުގެ ގޮތުން ދައްކާ ބަހަނާތަކެއްތޯ މިއީވެސް އުފެދޭ ސުވާލެކެވެ.