986 މަންދޫބުންނާއެކު އެމްޑީޕީގެ ކޮންގްރެސް ފަށައިފި

986 މަންދޫބުންނާއެކު ދިވެހި ރައްޔިތުންގެ ޑިމޮކްރަޓިކް ޕާޓީ، އެމްޑީޕީގެ 5ވަނަ ކޮންގްރެސް ފަށައިފިއެވެ.

މާލެ ސިޓީ ހޯލުގައި ކުރިއަށްގެންދާ މި ކޮންގްރެސް ކުރިއަށް ދާނީ އޮކްޓޯބަރ 1-3އަށެވެ. މިރޭ ކުރިއަށްދިޔައީ ކޮންގްރެސް ހުޅުވުމުގެ ރަސްމިއްޔާތެވެ.

ކޮންގްރެސް ފެށުމުގެ ރަސްމިއްޔާތުގައި ވާހަކަދައްކަވަމުން، ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވީ، އެމްޑީޕީއިން މަސައްކަތްކުރާނީ ރަައްޔިތުންނަށް ހެޔޮ ގޮތް ހޯދާދިނުމަށްކަމަށެވެ. ދަތުރުފުރުގެ ނިޒާމުން ރާއްޖެ ގުޅާލުމަކީ އެމްޑީޕީގެ ސިޔާސަތެއްކަމަށާއި، އެ ޕާޓީން އެންމެ ބޮޑު އިސްކަމެއް ދެނީ ލާމަރުކަޒީ ނިޒާމަށްކަމަށް ރައީސް ނަޝީދު ވިދާޅުވިއެވެ.

"މިއީ އެމްޑީޕީ. މި ޕާޓީއަކީ ދިވެހި ރާއްޖެ ބަދަލުކުރި ޕާޓީ. އަޅުގަނޑުމެންނަކީ ރާއްޖޭގައި އެންމެ ގިނަ ދުވަސްވީ ސިޔާސީ ޕާޓީ." ކުރީގެ ރައީސް ނަޝީދު ވިދާޅުވިއެވެ.

އެމްޑީޕީން އިސްކަންދޭ ކަންކަމަށް އަލިއަޅުވާލައްވަމުން ކުރީގެ ރައީސް އިބްރާހިމް މުޙައްމަދު ޞާލިޙް ވިދާޅުވީ އަސާސީ ޚިދުމަތްތައް ރަށްރަށް ފުރިހަމަކޮށްދިނުމަކީ އެޕާޓީން އިސްކަންދޭ ކަމެއްކަމަށެވެ.އެއަމާޒަށް ވާސިލްވުމަށް، ކޮންގްރެސްގެ ތެރެއިން ކުރިއަށްގެންދާ އިންވެސްޓްމެންޓް ފޯރަމްއަކީ މުހިންމު ފޯރަމްއެއް ކަމަށް ވިދާޅުވިއެވެ. މީގެއިތުރުން ޕާޓީގެ އެކުވެރިކަން ދަމަހައްޓައި، އާއްމު މެމްބަރުންގެ އިތުބާރު ހޯއްދެވުމަށް އެ މަނިކުފާނު ބާރު އެޅުއްވިއެވެ.

"އިތުބާރު ހޯދޭނީ ރައްޔިތުންގެ އަޑު އަހައިގެން. ހަގީގީ ހައްލުތަކެއް ހުށަހަޅައިގެން. އެކަކު އަނެކަކަށް އިޚްތިރާމްކޮށްގެން." ކުރީގެ ރައީސް ޞާލިހު ވިދާޅުވިއެވެ.

އެމްޑީޕީން ހާމަކޮށްފައިވާ ގޮތުގައި، މި ކޮންގްރެސްގެ މަޤްސަދަކީ ކައުންސިލްތަކުން ރަށުގައި ކުރިއަށްގެންދާނެ މަޝްރޫޢުތައް ނިންމުމާއި, އެ މަޝްރޫޢުތައް ކުރިއަށް ގެންދާނެ ގޮތެއް ހޯދުމުގައި ޕާޓީ މެދުވެރިކޮށް އެހީތެރިކަން ފޯރުކޮށްދިނުމެވެ. ކައުންސިލްތަކުން އެ ފޯރަމްގައި 100އަށް ވުރެ ގިނަ ޕްރޮޖެކްޓް ކޮންގްރެސްގައި ހިއްސާކުރެވޭނެކަމަށް މީގެކުރިން އެޕާޓީން ބުނެފައިވެއެވެ.

ހޮނިހިރު ދުވަހު އަސާސީ ޤަވާއިދަށް ގެންނަ އިސްލާހުތަކުގެ މަސައްކަތްތަކާއި، ކޮންގްރެސްގެ ރިޕޯޓު ހުށަހެން ކުރިއަށްދާނެއެވެ. އެމްޑީޕީން ހާމަކޮށްފައިވާ ގޮތުގައި، ކޮންގްރެސްގެ ތެރެއިން ލާމަރުކަޒީ ޤަރާރެއް ހުށަަހަޅަން ހަމަޖެހިފައިވެއެވެ.

މި ކޮންގްރެސްގައި އެމްޑީޕީގެ އެޕްލިކޭޝަން ލޯންޗުކުރުމަށް ވަނީ ހަމަޖެހިފައެވެ. ކޮންގްރެސް ނިންމުމުގެ ރަސްމިއްޔާތު އޮންނާނީ ހޮނިހިރު ދުވަހުގެރޭ 09:00ގައެވެ.

އެމްޑީޕީން ހާމަކޮށްފައިވާ ގޮތުގައި މި ކޮންގްރެސްގައި ގިނަ އަދަދެއްގެ ބޭރުގެ ޑިޕްލޮމެޓުންވެސް ބައިވެރިވާނެއެވެ. އަދި މި ކޮންގްރެސްގައި ޕާޓީގެ މުހިންމު ނިންމުންތަކެއް ނިންމާނެކަމަށް ފާހަގަކޮށްފައިވެއެވެ.