ޤައުމު ބިނާކުރުމުގައި އުމުރުން ދުވަސްވީ މީހުންގެ ދައުރު ބޮޑު: ވަޒީރު ޤީލާ

ޤައުމު ބިނާކުރުމުގައި އުމުރުންދުވަސްވީ ކޮންމެ ބޭފުޅަކީ މުހިންމު ޚިދުމަތްތެރިއެއް ކަމަށް ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވަޒީރު ޤީލާ ޢަލީ ވިދާޅުވެއްޖެއެވެ. ވަޒީރު ޤީލާވަނީ އުމުރުން ދުވަސްވީ މީހުންގެ ދުވަސް ފާހަގަކުރުމަށް ހުޅުމާލޭގައި ބޭއްވި ހަރަކާތުގައި ބައިވެރިވެވަޑައިގަންނަވާފައެވެ.

އުމުރުން ދުވަސްވީ މީހުންގެ ދުވަސް ފާހަގަކުރުމަށް ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވުޒާރާއިން އިންތިޒާމުކޮށްގެން ހުޅުމާލޭގައި ބޭއްވި، ހަރަކާތުގައި ހުޅުމާލޭގައި ހަރަކާތްތެރިވާ މުޢައްސަސާތަކާއި ގިނަ އަދަދެއްގެ އިސްރަށްވެހިން ބައިވެރިވިއެވެ. މިހަރަކާތް ފެށިގެން ދިޔައީ ހެނދުނު 6:15 އެހާކަށްހާއިރު، އުމުރުންދުވަސްވީ މީހުން ބައިވެރިވި ލުއި ހިންގާލުމާއެކުއެވެ. ހިނގާލުން ނިންމާލުމަށް ހުޅުމާލޭ ސެންޓްރަލް ޕާކުގައިވަނީ ބައްދަލުވުމެއް ބާއްވާފައެވެ.

މި ބައްދަލުވުމުގައި ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވަޒީރު ޤީލާ ވަނީ މިހަރަކާތުގައި ބައިވެރިވި ފަރާތްތަކަށް ޝުކުރު އަދާކުރައްވާފައެވެ. ވަޒީރު ވަނީ އަދުގެ ޖީލުތަކަށް އުމުރުން ދުވަސްވީ ފަރާތްތަކުން ގެނެސްދެއްވި އަގުހުރި މެސެޖްތަކާއި ހުނަރުތައް ފާހަގަކުރައްވާފައެވެ.

"އަޅުގަނޑުމެން ފަޚުރުވެރިވަނީ އަޅުގަނޑުމެންނާއެކު ތިއްބެވި އަޅުގަނޑުމެންގެ މަންމައާއި ބައްޕައާއި މާމައާއި، ކާފައަށް. އެބޭފުޅުން އަޅުގަނޑުމެންނާއި ހިސާބަށް ގެނެސްދެއްވި އަގުހުރި މެސެޖްތަކާއި ގެނެސްދެއްވި މުހިންމު ކަންތައްތަކަށް. އަޅުގަނޑުމެންގެ ޤައުމު ބިނާކުރެވި މިއަދު މިހިސާބަށް އައުމުގަ އަޅުގަނޑުމެން ކޮންމެ ބޭފުޅަކީ މުހިންމު ޚިދުމަތްތެރިއެއް. އަޅުގަނޑު އުފަލާއެކު ތިބޭފުޅުންކޮށްދެއްވި މަސައްކަތުގެ އަގު ދިވެހި ސަރުކާރުންނާ، ދިވެހި މުޖްތަމަޢު ފާހަގަކުރާކަން ދަންނަވަން. " ވަޒީރު ޤީލާ ވިދާޅުވިއެވެ.

މި ބައްދަލުވުމުގައި ވާހަކަ ދައްކަވަމުން، އެޗްޑީސީގެ މެނޭޖިންގ ޑިރެކްޓަރ އަލީ ޒުހެއިރު ވަނީ ހުޅުމާލޭގެ ޕާކުތަކާއި ސަރަހައްދުތައް ތަރައްޤީކުރުމުގައި އުމުރުންދުވަސްވީ ފަރާތްތަކަށް އެތަންތަން ބޭނުންކުރެވޭނެ ގޮތަށް މަސައްކަތް ބައްޓަން ކުރަމުންދާ ކަމަށް ވިދާޅުވިއެވެ. މިކަމުގައި ސަރުކާރުންވެސް އިސްކަން ދެއްވާ ކަމަށް މެނޭޖިން ޑިރެކްޓަރ ވިދާޅުވިއެވެ.

އެޗްޑީސީންވަނީ އެކުންފުނީގެ ސީއެސްއާރުގެ ދަށުން ކުރިއަށް ގެންދާ "ދުޅަހެޔޮ އިސްރަށްވެހިން" ޕްރޮގްރާމުގައި ބައިވެރިވުމުގެ ފުރުސަތު ހުޅުވާލާފައެވެ. މި ޕްރޮގްރާމުގައި އުމުރުން ދުވަސްވީ ފަރާތްތަކަށް އެއްވެސް އަގަކާ ނުލާ ބައިވެރިވެވޭއިރު، ހަފްތާއަކު 3 ދުވަހު އެންމެން އެކުވެ، އެކި ހަރަކާތްތައް ކުރިއަށް ގެންދިއުމަށް ވަނީ ރާވާފައެވެ. އަދި ކޮންމެ މަހަކު އެއްފަހަރު، ރާއްޖޭގެ ކުރިއަށްގެންދާ ސިނާޢީ މަސައްކަތްތައް ތަޖުރިބާކޮށްލުމަށް ފުރުސަތު ފަހިކޮށްދޭއިރު، ކޮންމެ 3 މަހަކުން އުމުރުން ދުވަސްވީ ފަރާތްތަކަށް ހެލްތު ސްކްރީނިންގއެއް ކުރިއަށް ގެންދަން ވަނީ ރާވާފައެވެ. އެޗްޑީސީން ވަނީ މިހާރު މި ޕްރޮގްރާމުގައި ބައިވެރިވުމަށް ފުރުސަތު ހުޅުވާލާފައެވެ.

އުމުރުން ދުވަސްވީ މީހުންގެ ދުވަސް ފާހަގަކުރުމަށް ބޭއްވި ހަރަކާތްތައް ނިންމާލާފައިވަނީ ކަސްރަތު ކުރުމާއި އުމުރުންދުވަސްވީ މީހުންގެ ގަސް އިންދުމުގެ ހަރަކާތަކާއެކުއެވެ.

މިއަހަރު ފާހަގަކުރާ އުމުރުން ދުވަސްވީ މީހުންގެ ދުވަހުގެ ޝިޢާރަކީ، ދިގު އުމުރުގެ ޒަމާން: ދުޅަހެޔޮ ދިރިއުޅުމަކަށް ނިޒާމުތައް ބައްޓަން ކުރުމެވެ. މި ޝިޢާރުގެ ދަށުން ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވުޒާރާއިން ވަނީ އިތުރު ހަރަކާތްތައް ކުރިއަށް ގެންދަން ރާވާފައެވެ.