ރަތް ކަނޑުގައި ދަތުރުކުރާ އުޅަނދުފަހަރަށް ރައްކާތެރިކަން ފޯރުކޮށްދިނުމަށް ވިލާތުގެ އިއްތިޙާދުން ހިންގަމުންދާ ކަނޑުގެ އަސްކަރީ ޙަރަކާތަށް، ޤައުމުތަކުން ފޯރުކޮށްދޭ ވަސީލަތްތައް ނުފުދޭ ކަމަށް އިޓަލީގެ ދިފާޢީ ވަޒީރު ގުވީޑޯ ކްރޮސެއްޓޯ ވިދާޅުވެއްޖެއެވެ.
ވިލާތުގެ އިއްތިޙާދުން އެސްޕައިޑްސްގެ ނަމުގައި ޚާއްޞަ ކަނޑުގެ އަސްކަރީ ޙަރަކާތް ފެށީ 2024ވަނަ އަހަރުގެ ތެރޭގައެވެ. އެއީ ޔަމަނުގެ ޙޫޘީންގެ ހަމަލާތަކުން ވިޔަފާރި އުޅަނދުތައް ރައްކާތެރިކުރުމުގެ މަޤްޞަދުގައެެވެ. އެ ޙަރަކާތުގެ ދަށުން ބާބުލް މަންދީބު ކަނޑުއޮޅިއާއި ރަތް ކަނޑާއި ގަލްފް އޮފް އޭޑެންއާއި ޢަރަބި ކަނޑާއި ގަލްފް އޮފް އޮމާންއާއި ހުރްމުޒް ކަނޑުއޮޅީގައި މަނަވަރުތައް ޙަރަކާތްތެރިވެއެވެ.
ވިލާތުގެ އިއްތިޙާދުގެ ޚާރިޖީ ސިޔާސަތުތަކާ ބެހޭ އިސްވެރިޔާ، ކާޔާ ކެލަސްއާއެކު ރޯމްގައި ބޭއްވެވި ބައްދަލުވުމަކަށް ފަހު ނެރުއްވި ބަޔާނެެއްގައި ކްރޮސެއްޓޯ ވަނީ އެސްޕައިޑްސް ޙަރަކާތައް ބައެއް މެންބަރު ޤައުމުތަކުން އިިތުރު އެސެޓުތައް ފޯރުކޮށްދިނުމަށް ނިންމާފައިވާ ކަން ފާހަގަކުރައްވައި އެ ނިންމުމަށް މަރުހަބާ ކިޔުއްވައިފައެވެ. ނަމަވެސް އެއީ ކޮން ޤައުމުތަކެއް ކަމެއް އޭނާ ވިދާޅުވެފައެއް ނުވެއެވެ.
މެދުއިރުމަތީގެ ހަނގުރާމައިގެ ސަބަބުން ހުރްމުޒް ކަނޑުއޮޅި ބޭނުން ކުރުމަށް ދަތިވެފައިވާ މި ޙާލަތުގައި ރަތް ކަނޑާއި ގަލްފް އޮފް އޭޑެން ގުޅުވައިދޭ ބާބުލް މަންދީބު މެދުވެރިކޮށް އިންޑިޔާ ކަނޑަށް ނުކުތުމަށް ވަނީ ހުރަސްއެޅިފައެވެ. ޤައުމުތަކުން މިހާތަނަށް ފޯރުކޮށްދީފައިވާ އެސެޓުތަކަކީ ބާބުލް މަންދީބު މެދުވެރިކޮށް ވިޔަފާރި އުޅަނދުފަހަރަށް ރައްކާތެރިކަމާއެކު ދަތުރުކުރެވޭނެ ކަމުގެ ޔަޤީންކަން ލިބޭ ވަރުގެ ވަސީލަތްތަކެއް ނޫން ކަމަށް ކްރޮސެއްޓޯ ވަނީ ފާހަގަކުރައްވައިފައެވެ.
މިދިޔަ މަހުގެ ތެރޭގައި ވެސް އިޓަލީއިން ވަނީ ވިލާތުގެ އިއްތިޙާދުގައި ހިމެނޭ ބައިވެރިން އެސްޕައިޑްސް ޙަރަކާތުގައި ބައިވެރިވާ މިންވަރު އިތުރުކުރުމަށް ގޮވާލައިފައެވެ. ވިލާތުގެ އިއްތިޙާދުން ނިންމުންތައް ނިންމުމުގައި ހުރި ލަސްތައް ފާހަގަކޮށް އެ ޤައުމުން ބުނީ އިޓަލީގެ އަމިއްލަ އުޅަނދުތައް އެ ޙަރަކާތައް ބޭނުން ކުރުމަށް އެ ޤައުމުން ތައްޔާަރަށް އޮތް ކަމަށެވެ. ވިލާތުގެ އިއްތިޙާދުން ގޮތް ނިންމުން ލަސްވާ ނަމަ ގޯސްވަމުންދާ ސަލާމަތީ ޙާލަތަށް އެދެވޭ ގޮތަކަށް އިޖާބަ ނުދެވޭނެ ކަމަށް ވެސް އެ ޤައުމުން ވަނީ ބުނެފައެވެ.
ސެޕްޓެމްބަރު މަހުގެ 21ވަނަ ދުވަހު ކެލަސް ވަނީ އެސްޕައިޑްސް ޙަރަކާތުން އެންމެ އެކަށީގެންވާ ގޮތަށް މަސައްކަތް ކުރުމަށް 10އަކަށްވުރެ ގިނަ މަނަވަރު ބޭނުންވާ ކަމަށް ވިދާޅުވެފައެވެ. މި ވަގުތު އެ ޙަރަކާތުގައި ބޭނުން ކުރަމުން ދަނީ 6 މަނަވަރެެވެ.
ފާއިތުވި ހަފްތާތަކުގައި ޙޫޘީން ވަނީ ރަތް ކަނޑުގެ އައްސޭރީގައި ޙަރަކާތްތެރިވާ މިންވަރު އިތުުރުކޮށްފައެވެ. އޭގެ ސަބަބުން ހުރްމުޒް ކަނޑުއޮޅި ހިމެނޭ ގޮތަށް އެ ސަރަޙައްދުން ދަތުރުކުރުމަށް އުޅަނދުތަކަށް ވަނީ ގޮންޖެހުންތައް ކުރިމަތިވެފައެވެ.