އަމާޒަކީ 2028ގެ އޮލިމްޕިއާޑުން "ޑީ" ކެޓަގަރީ ކާމިޔާބުކުރުން: ޝުޢާއު
-
10 ވަނަ ބުރާއި ހަމައަށްދިޔައިރު، އޯޕަން ޓީމު އޮތީ ކެޓަގަރީގެ 7 ވަނައިގަ
-
"ދުރާލާ ތައްޔާރުވެވިއްޖެނަމަ ނަތީޖާ ރަނގަޅުކުރެވޭނެ"
46 ވަނަ ޗެސް އޮލިމްޕިއާޑުގެ އޯޕަން ކެޓަގަރީގައި ވާދަކުރި ޓީމަށް ދިމާވި ގޮންޖެހުންތަކުން އަރައިގަނެ، އަމާޒަކީ ކުރިއަށް އޮންނަ މުބާރާތަކުން ރަނގަޅު ކާމިޔާބީއެއް ހޯދުންކަމަށް ޓީމުގެ ކެޕްޓަން މުޙައްމަދު ޝުޢާއު ބުނެފިއެވެ.
މިއަހަރުގެ މުބާރާތުގައި އޯޕަން ކެޓަގަރީއިން ރާއްޖެ ތަރުތީބުވެފައިވަނީ "ޑީ" ކެޓަގަރީގައެވެ. އެންމެ މޮޅެތި ޓީމުތަކުން ފެށިގެން ތަރުތީބުކޮށްފައިވާ މިމުބާރާތުގައި 2022 ވަނަ އަހަރު ރާއްޖެ ހިމެނުނީ "އީ" ކެޓަގަރީގައެވެ. އެއަހަރު ކެޓަގަރީއިން ރަން މެޑަލް ރާއްޖޭގެ އޯޕަން ޓީމުން ހޯދި ނަމަވެސް، މިއަހަރު "ޑީ" ކެޓަގަރީގައި ވާދަކުރަންޖެހުމުން ގޮންޖެހުންތައް ދިމާވިކަމަށް ރާއްޖޭގެ އެއްވަނަ ރާޒުވާ ކުޅުންތެރިޔާ ބުންޏެވެ.
ޝުޢާއު ބުނީ މިއަހަރު މުބާރާތުގައިވެސް އޯޕަން ޓީމުން ހިތްވަރުކުރިކަމަށެވެ. އެހެންނަމަވެސް މިއަށްވުރެ ރަނގަޅު ނަތީޖާ ހޯދަން ބޭނުންނަމަ، ދުރާލާ މުބާރާތަށް ތައްޔާރުވުން މުހިންމުކަމަށް އޭނާ ބުންޏެވެ. އެގޮތުން ދުރާލާ ފަރިތަކޮށް، މުބާރާތަށް ވާންޖެހޭ ތައްޔާރީތައް ވެވިއްޖެނަމަ، 2028 ވަނަ އަހަރު އޮންނަ އޮލިމްޕިއާޑުގައި ރަނގަޅު ކާމިޔާބީއަކާ ހަމައަށް ދެވިދާނެކަމަށް ގަބޫލުކުރާކަމަށް ޝުޢާއު ބުންޏެވެ.
"އޯޕަން ޓީމު މިފަހަރު އަޅުގަނޑުމެން ވާދަކުރީ ކެޓަގަރީ "ޑީ" ގައި. 10 ވަނަ ބުރާއި ހަމައަށްދިޔައިރު، ރާއްޖެ އޮތީ 7 ވަނައިގަ ކެޓަގަރީގަ. އަދި އޯޕަން ޓީމަށް މި ކެޓަގަރީ ކާމިޔާބުކުރަން ތަންކޮޅެއް ގޮންޖެހުންތައް ގިނަ. އެހެންނަމަވެސް މިއަށްވުރެ ރަނގަޅަށް ތައްޔާރީތައް ގެންގޮސް، ދުރާލާ މުބާރާތަށް ތައްޔާރުވެވިއްޖިއްޔާ މިއީ ވާނެކަމެއް" ޝުޢާއު ބުންޏެވެ.
ބައިނަލްއަޤުވާމީ މުބާރާތްތަކުގައި ވާދަކުރާނަމަ، ދުރާލާ ކުޅުންތެރިންނަށް އެކަން އަންގާ، މުބާރާތަށް ތައްޔާރުކުރުމަށް ޝުޢާއު އެދިފަވެއެވެ. ތައްޔާރުވުމަށް ވަގުތު ބޭނުންވާނެކަމަށާ ރަނގަޅު ނަތީޖާއެއް ހޯދޭނީ ދުރާލާ ތައްޔާރުވެގެންކަމަށް ގަބޫލުކުރާކަމަށް ޝުޢާއުވަނީ ބުނެފައެވެ.