ރޭންކިންގެ އެއްވަނައިގެ ގޮތުގައި ކުޅުނު ފުރަތަަމަ މެޗުން ރިބާކިނާ ބަލި!

ދުނިޔޭގެ ޓެނިސް ރޭންކިންގައި އެއްވަނަ އަންހެން ޓެނިސް ކުޅުންތެރިޔާގެ މަގާމަށް އެރުމަށްފަހު ކުޅުނު ފުރަތަމަ މެޗުން ކަޒަކިސްތާން އެލޭނާ ރިބާކިނާ ބަލިވެއްޖެއެވެ.

ޗައިނާގެ ވެރިރަށް ބެއިޖިންގގައި މިހާރު ކުރިއަށްދާ ޗައިނާ އޯޕަން ޑަބްލިޔު.ޓީ.އޭ. ވަން ތައުޒަންޑް ޓެނިސް މުބާރާތުގެ ދެވަނަ ބުރުގައި އަރުމީނިއާގެ އަލީނާ ޗަރައޭވާ އާއި ބައްދަލުކުރި މެޗު ޗަރައޭވާ ކާމިޔާބު ކޮށްފައިވަނީ ފަހަތުން އަރާ ދެ ސެޓު އެއް ސެޓުންނެވެ. މިމެޗުގެ ފުރަތަމަ ސެޓު ތިނެއް ހަޔަކުން ކާމިޔާބު ކޮށްފައިވަނީ ރިބާކިނާއެވެ. ނަމަވެސް މިމެޗުގައި ދެން ފެނިގެންދިޔައީ ގިނަ ބަޔަކަށް ހައިރާންކަން ގެނުވި ކުޅުމެކެވެ. ދުނިޔޭގައި 118 ވަނައަށް ރޭންކް ކުރެވިފައިވާ ޗަރައޭވާގެ ފަރާތުން ޖެހިގެން އައި ދެސެޓުގައި ފެނިގެންދިޔަ މޮޅު ކުޅުމާއެކު އޭނާވަނީ ރިބާކިނާގެ މައްޗަށް ކުރި ހޯދައިފައެވެ. މިގޮތުން ދެވަނަ ސެޓު ހައެއް ހަތަރަކުން ކާމިޔާބު ކުރިއިރު ފަހު ސެޓު ޗަރައޭވާ ކާމިޔާބު ކުރީ ހައެއް ތިނަކުންނެވެ. މިއީ ޑަބްލިޔު.ޓީ.އޭ.ގެ ތާރީހްގައި ދުނިޔޭގެ ރޭންކިންގގެ އެއްވަނައަށް އެރުމަށްފަހު ކުޅުނު ފުރަތަމަ މެޗުން ކުޅުންތެރިޔަކު ބަލިވި ފުރަތަމަ ފަހަރެވެ.

މިސީޒަންގައި މޮޅު ކުޅުމެއް ދައްކަމުންދާ ރިބާކިނާވަނީ މިއަހަރު ބޭއްވި ގްރޭން ސްލޭމް ދެ މުބާރާތް ކާމިޔާބު ކޮށްފައެވެ. މިގޮތުން ރިބާކިނާވަނީ އަހަރުގެ ފުރަތަމަ ގްރޭން ސްލޭމް މުބާރާތް ކަމަށްވާ އޮސްޓްރޭލިއަން އޯޕަން އާއި އަހަރުގެ ފަހު ގްރޭން ސްލޭމް މުބާރާތް ކަމަށްވާ ޔޫއެސް އޯޕަން ކާމިޔާބު ކޮށްފައެވެ. އަދި ޔޫއެސް އޯޕަންގައި ހޯދި ކާމިޔާބީ އާއެކު ރިބާކިނާއަށްވަނީ ދުނިޔޭގެ ރޭންކިންގގެ އެއްވަނަ މަގާމް ލިބިގެން ގޮސްފައެވެ.

މިމުބާރާތުގައި ޗަރައޭވާ ދެން ކުޅޭ މެޗުގައި ބައްދަލުކުރާނީ އިނގިރޭސިވިލާތުގެ ސޮނޭ ކާޓަލް އާއެވެ. ކާޓަލް ތިންވަނަ ބުރުން ޖާގަހޯދީ 31 ވަނައަށް ސީޑު ކުރެވިފައިވާ ޗައިނާގެ ޒިންޔޫ ވޭންގ އާއި ބައްދަލުކުރި މެޗު ސީދާ ދެސެޓުން ކާމިޔާބު ކޮށްގެންނެވެ. އެއީ ހައެއް ތިނެއް އަދި ހައެއް ދެއަކުންނެވެ. މިމުބާރާތުގައި ފަނަރަ ވަނައަށް ސީޑު ކުރެވިފައިވާ ރަޝިއާގެ އަނާ ކަލިންސްކާޔާ ވަނީ ބަލިވުމުގެ ސަބަބުން ޗައިނާގެ ގިންވެން ޒެންގ އާއި ބައްދަލުކުރި މެޗުގެ ތިންވަނަ ސެޓުގެ މެދުތެރެއިން ރިޓަޔަރ ކޮށްފައެވެ. މިމެޗުގެ ފުރަތަމަ ސެޓު ޓައި ބްރޭކަކަށް ގޮސް ހައެއް ހަތަކުން ކަލިންސްކާޔާ ކާމިޔާބު ކުރި ނަމަވެސް ޖެހިގެން އައި ސެޓު ޒެންގވަނީ ހައެއް ހަތަރަކުން ކާމިޔާބު ކޮށްފައެވެ. އަދި ތިންވަނަ ސެޓުގައި މެޗު ހުއްޓާލިއިރު ޒެންގ އުޅުނީ ތިނެއް ސުމަކުން ކުރީގައެވެ.

މީގެއިތުރުން މިމުބާރާތުގައި ތިންވަނައަށް ސީޑު ކުރެވިފައިވާ އެމެރިކާގެ ކޯކޯ ގައުފްއާއި ކޮލޮމްބިއާގެ ކަމީލާ އޮސޯރިއޯ ބައްދަލުކުރި މެޗު ދެސެޓު އެއް ސެޓުން ކާމިޔާބު ކޮށްފައިވަނީ ގައުފްއެވެ. މިމެޗުގެ ފުރަތަމަ ސެޓު ޓައި ބްރޭކަކަށް ގޮސް ހަތެއް ހަތަރަކުން ކާމިޔާބު ކޮށްފައިވަނީ ގައުފްއެވެ. ނަމަވެސް ޖެހިގެން އައި ދެވަނަ ސެޓު އޮސޯރިއޯ ހަތަރެއް ހަޔަކުން ކާމިޔާބު ކޮށް މިމެޗު ތިންވަނަ ސެޓަކަށް ގެންދިޔައެވެ. އަދި ފަހު ސެޓު ހައެއް ދެއަކުން ކާމިޔާބު ކުރީ ގައުފް އެވެ. އަދި އަށްވަނައަށް ސީޑު ކުރެވިފައިވާ ޕޯލަންޑްގެ އީގާ ޝުއާޓެކް އާއި ޗައިނާގެ ޒިންޔޫ ގާއޮ ބައްދަލު ކުރި މެޗު ހައެއް ދެއެއް އަދި ހައެއް ތިނަކުން ކާމިޔާބު ކޮށްފައިވަނީ ޝުއާޓެކްއެވެ.