ކްރޮއޭޝިއާ އަތުން އިންގްލެންޑަށް 7 ލަނޑުގެ މޮޅެއް!

ޔުއެފާ ނޭޝަންސް ލީގުގައި އިންގްލެންޑުން, ކްރޮއޭޝިއާ ކޮޅަށް 7 ލަނޑު ޖަހާ އެޓޭކިންގގައި މުޅިން ތަފާތު ފެންވަރެއް ދައްކާލައިފިއެވެ. ކޯޗު ޓުޗެލްއާއެކު އިނގިރޭސިން ހޯދި އެންމެ ބޮޑު މޮޅުގައި މިޑްފީލްޑަރ ޖޫޑް ބެލިންގހަމް ތަފާތު ދެއްކިއެވެ.

ކްރޮއޭޝިއާގައި ކުޅުނު މެޗުގައި ބެލިންގހަމް ވަނީ އެއް ލަނޑު ޖެހުމުގެ އިތުރުން 3 ލަނޑު ޖަހަން ފުރުޞަތު ތަނަވަސްކޮށްދީފައެވެ. އޭގެތެރޭގައި 8 ވަނަ މިނިޓްގައި މެޗުގެ ފުރަތަމަ ލަނޑު ޖަހަން ކެޕްޓަން ހެރީ ކޭންއަށް ތަނަވަސްކޮށްދިން ފުރުޞަތު ހިމެނެއެވެ. ކޭން ފުރަތަމަ ލަނޑު ޖެހީ މެންޗެސްޓަރ ސިޓީގެ ކްރޮއޭޝިއާ ޑިފެންޑަރ ގްވާޑިއޯލް އަށް ހެދުނު ގޯހެއްގެ ފައިދާ ނަގައިގެންނެވެ. ދެވަނަ ލަނޑު ޖެހީ ބެލިންގހަމްއެވެ. އެއީ މެޗުގައި ލަނޑު ޖެހި އެންތަނީ ގޯޑޮން ތަނަވަސްކޮށްދިން ފުރުޞަތަކުންނެވެ. މެޗުގައި ކޭން އާއި ސަކާ ކޮންމެ ކުޅުންތެރިއަކު ދެ ލަނޑު ޖެހިއެވެ. އިންގްލެންޑަށް ދެން ލަނޑު ޖަހައިދިނީ އެންތަނީ ގޯޑޮން އާއި މޯގަން ރޮޖާރސްއެވެ. މެޗުގައި ބެލިންގހަމް ލަނޑު ޖަހަން ފުރުޞަތު ތަނަވަސްކޮށްދިނީ ކޭންގެ އިތުރުން ސަކާ އާއި ރޮޖާރސް އަށެވެ.

މެޗުގެ ދެވަނަ ހާފްގެ ކުރީކޮޅު ކޮރޮއޭޝިއާއިން ކެޕްޓަން މޮޑްރިޗް ބަދަލުކުރިއެވެ. މިމެޗު ކުޅުނީ ސަޕޯޓަރުން ނުވައްދައެވެ. އެއީ ކުރިން މެޗުގައި ކްރޮއޭޝިއާ ސަޕޯޓަރުންގެ އަމަލުތަކުގެ ސަބަބުންނެވެ. ސަޕޯޓަރުންނަށް ފުރުޞަތު ބަންދުކުރި ނަމަވެސް 6000 ސްކޫލް ދަރިވަރުންނަށް ފުރުޞަތު ދިނެވެ. ދައުވަތު ދީގެން 100 ވަރަކަށް ސަޕޯޓަރުން ވެއްދިއެވެ. ފީފާ ވޯލްޑްކަޕްގައި އިންގްލެންޑުން ވަނީ 4-2 ން ކްރޮއޭޝިއާ ބަލިކޮށްފައެވެ.

ނޭޝަންސް ލީގު އިންގްލެންޑުން ފެށީ ސްޕެއިން އަތުން ވީބައްޔާއެކުއެވެ. އެކަމަކު ދެވަނަ މެޗު ޗެކްރިޕަބްލިކާ ވާދަކޮށް ކާމިޔާބުކުރިއެވެ. ސްޕެއިން ރޭ ޗެކްރިޕަބްލިކް އަތުންވެސް މޮޅުވެފައިވާތީ އެއްވަނައިގައި އޮތީ ސްޕެއިންއެވެ. އިނގިރޭސީންނަށް ލިބެނީ ސްޕެއިންގެ ފަހަތުން ދެވަނަ އެވެ.