ޔަމަނުގެ ހަތިޔާރުއެޅި ޖަމާޢަތް، ހޫޘީންނާ ދެކޮޅަށް ވަރުގަދަ އަސްކަރީ ޙަރަކާތެއް ފަށާފައިވާ ކަމަށް ޔަމަނުގެ ސަރުކާރުން އިޢުލާނުކޮށްފިއެވެ.
ޓީވީ މެދުވެރިކުރައްވާ ޤައުމާ މުހާތަބުކުރައްވަމުން ޔަމަނުގެ ރައީސް ރަޝާދު އަލް-ޢާލީމީ ވަނީ ޔަމަނުގެ ހުރިހާ ސަރަޙައްދެއް ދައުލަތުގެ ބާރުގެ ދަށަށް ގެނައުމަށް ޚާއްޞަ އަސްކަރީ ޙަރަކާތެއް ފަށާފައިވާ ކަން އިޢުލާނުކުރައްވައިފައެވެ.
މި ހަފްތާގެ ކުރީކޮޅު މެދުއިރުމަތީގެ ސަރަޙައްދީ އިސްވެރިންނާއި ހުޅަނގުގެ އިސްވެރިން ވަނީ ސަޢުދީ ޢަރަބިއްޔާއާއި އެ ޤައުުމުން ވާގިވެރިވާ ޔަމަނުގެ ސަރުކާރުން ޙޫޘީންނާ ދެކޮޅަށް ޙަރަކާތެއް ފެށުމަށް ތައްޔާރުވަމުންދާ ކަމަށް ބުނެފައެވެ. ޙޫޘީންގެ ބާރުގެ ދަށުގައިވާ ސަރަޙައްދުތައް އަނބުރާ ހޯދުމަށް ފަށާ އެ ޙަރަކާރުގެ ދަށުން ވައިގެ ހަމަލާތައް ދޭނީ ސަޢުދީ ޢަރަބިއްޔާއިން ކަމަށް އެ ބޭފުޅުން ވަނީ ވިދާޅުވެފައެވެ. އަދި އެއްގަމުމަގުން ހަމަލާ ދޭނީ ޔަމަނުގެ ހަތިޔާރުއެޅި ފައުޖުތަކުން ކަމަށް ވެސް ބުނެފައިވެއެވެ.
އަލްޢާލީމީ ވިދާޅުވީ ޙޫޘީންނާ ދެކޮޅަށް ރައްދު ހަމަލާތައް ދޭން ނިންމާފައި ވަނީ ޙާލަތު ރަނގަޅުކުރުމަށް ކުރެވެން ހުރި މަސައްކަތެެއް ކޮށް ކުރިއެރުމެއް ނުލިބުމުން ކަމަށެވެ. އޭނާ ވަނީ ކަންކަން އިތުރަށް ހަލަބޮލި ވިޔަ ނުދިނުމަށް ކުރަމުންދާ މަަސައްކަތްތަކާ ދެކޮޅަށް ޙޫޘީން މަސައްކަތްކުރާ ކަމަށް ތުހުމަތުކުރައްވައިފައެވެ. ޙޫޘީންނާ ދެކޮޅަށް ޙަރަކާތެއް ފެށުމަށް ނިންމާފައި ވަނީ ޤައުމީ ޒިންމާއެއް ޢަދާކުރުމުގެ ގޮތުން ކަމަށް ވެސް އޭނާ ވިދާޅުވިއެވެ. އަދި އަސްކަރީ ޙަރަކާތުގެ ދަށުން ހަތިޔާރުއެޅި ފައުޖުތަކާއި ސަލާމަތީ ބާރުތަކާއި އެންމެހާ އަސްކަރީ ގުނަވަންތަކުން ރޭވިފައިވާ ގޮތާ އެއްގޮތަށް ކަނޑައެޅިފައިވާ މަސައްކަތްތައް ކުރިއަށް ގެންދިޔުމަށް އަންގާފައިވާ ކަމަށް އޭނާ ވިދާޅުވިއެވެ.
ޔަމަނުގެ އަހުލީހަނގުރާމަ ފެށިގެން ދިޔައީ 2014 ވަނަ އަހަރު ވެރިރަށް ޞަންޢާއަށް ޙޫޘީން ހަމަލާދީ، އެ ރަށް ހިފުމާ ގުޅިގެންނެވެ. އެއާއެކު، 2015 ވަނަ އަހަރު ސަޢޫދީ ޢަރަބިއްޔާއިން އެކުލަވައިލި އަސްކަރީ އިއްތިޙާދަކުން ވަނީ، ޔަމަންގެ އަސްކަރިއްޔާއާ ބައިވެ، ޙޫޘީންނާ ދެކޮޅު ހަނގުރާމައިގައި ބައިވެރިވެފައެވެ. މި ހަނގުރާމައާ ގުޅިގެން، ޔަމަންގައި ވަނީ އިންސާނީ ކާރިސާއެއް އުފެދި، އެތަކެއް ސަތޭކަ ހާސް ބަޔަކު ޙާލުގައި ޖެހިފައެވެ. 2022 ވަނަ އަހަރު އދ އިން މެދުވެރިވެގެން އެކުލަވައިލި އެއްބަސްވުމެއްގެ ދަށުން ޔަމަންގައި ހަމަލާ ބަދަލުކުރުން މެދުކަނޑައިލި ނަމަވެސް، އެންމެ ފަހުގެ ހަމަލާތަކާއެކު، ހަނގުރާމަ އަލުން ފެށިގެން ހިނގައިދާނެ ކަމުގެ ބިރު ވަނީ ބޮޑުވެފައެވެ.
އަލްޢާލީމީ ވަނީ ސަޢުދީ ޢަރަބިއްޔާއިން ދެމުންދާ ވާގިވެރިކަމަށް ޝުކުރު ޢަދާ ކުރައްވައި، ޔަމަނަށް ކުރިމަތިވި އެންމެ އަނދިރި ދުވަސްތަކުގައި ސަޢުދީ ޢަރަބިއްޔާއިން ދިން އެއްބާރުލުން ފާހަގަކުރައްވައިފައެވެ. އޭނަ ވަނީ ޔަމަނުގެ ސަރަޙައްދީ ބައިވެރިންގެ އިތުރުން ބައިނަލްއަޤްވާމީ ބައިވެރިން ވެސް އެ ޤައުމަށާއި ޤައުމުގެ އަސްކަރީ ބާރުތަކަށާއި ދައުލަތުގެ އިދާރާތަކަށް ވާގިވެރިވުމަށް ގޮވާލައްވައިފައެވެ.
ޔަމަނުން އަސްކަރީ ޙަރަކާތެއް ފަށާފައިވާއިރު، ޙޫޘީން ވަނީ އެ ޖަމާޢަތުން ސަޢުދީ ޢަރަބިއްޔާގެ ރިޔާޟްއާއި ޚުރައިސް ސަރަޙައްދުގައި ހުންނަ ސަޢުދީ ޢަރަބިއްޔާގެ ޤައުމީ ތެޔޮ ކުންފުނި، އަރާމްކޯގެ ސައިޓުތަކަށް ބެލިސްޓިކް މިސައިލް އަދި ޑްރޯން ހަމަލާތައް ދޭން ފަށާފައިވާ ކަމަށް ބުނެފައެވެ. އެ ހަމަލާތައް ދެމުން ދަނީ ފާއިތުވި 12 ގަޑިއިރުގެ ތެރޭގައި ސަޢުދީ ޢަރަބިއްޔއިން އިސްވެ ޔަމަނަށް އަމާޒުކޮށް ދީފަައިވާ 50ވުރެ ގިނަ ވައިގެ ހަމަލާގެ ރައްދުގައި ކަމަށް އެ ޖަމާޢަތުން ބުނެއެވެ. ނަމަވެސް ޙޫޘީން ހަމަލާތަކެއް ދީފައިވާ ކަން ސަޢުދީ ޢަރަބިއްޔާއިން މިހާތަނަށް ކަށަވަރުކޮށްދީފައެއް ނުވެއެވެ.