ވިޔަފާރި ފުޅާކޮށް، ބައިނަލްއަޤްވާމީ މާރކެޓްގައި ވާދަކުރުމަށާއި ރާއްޖެއާއި ބޭރުގެ ރަނގަޅު އިންވެސްޓަރުން ހޯދުމަށް ރާއްޖޭގެ ކުންފުނިތަކަކީ ރަނގަޅު ކޯޕަރޭޓް ގަވަރނަންސް ނިޒާމެއްގެ ދަށުން ހިންގާ ކުންފުނިތަކަށް ވާންޖެހޭކަމަށް އެޓަރނީ ޖެނެރަލް އަލްއުސްތާޛް މުޙައްމަދު އަނިލް ވިދާޅުވެއްޖެއެވެ.
އެޓަރނީ ޖެނެރަލް މިހެން ވިދާޅުވީ ވަރކްޝޮޕް އޮން ކޯޕަރޭޓް ގަވަރނަންސް ފޮރ ޓްވެންޓީ ފަސްޓް ސެންޗަރީ ލީޑާރސްގެ ނަމުގައި މިއަދު ބޭއްވެވި ވާރކްޝޮޕް ފެއްޓެވުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުންނެވެ.
އެޓަރނީ ޖެނެރަލް ވިދާޅުވީ ރާއްޖޭގެ ކުންފުނިތަކުން މިހާރަށް ފުޅާކޮށް ވިސްނަންޖެހޭކަމަށާއި މިގޮތުން ރައުސުލްމާލު އިތުރުކުރާނެ ގޮތްތަކެއް ހޯދަންޖެހޭކަމަށެވެ. އެކަން ކުރުމަށް އޮތް އެންމެ މުހިންމު އަސާސަކީ އެ ކުންފުންޏަކީ ހަރުދަނާކަމާއި އެކީ ހިންގާ ކުންފުންޏަކަށްވުން ކަމަށެވެ. އެޓަރނީ ޖެނެރަލް ވިދާޅުވީ ޤައުމުގެ އިޤްތިޞާދަށް ވިސްނާނަމަ އެކަން ކުރެވެން އޮތީ ކުންފުނިތަކުން، އެއް އިންޑަސްޓްރީއަކަށް ބަރޯސާވެފައި އޮންނަ އޮތުން ބަދަލުކޮށް، އެހެން ދާއިރާތަކަށްވެސް ވިސްނައިގެންކަމަށެވެ. ރާއްޖެއާއި ބޭރުގެ ކުންފުނިތަކަށް ބަލާއިރުވެސް ކުންފުނިތަކުގެ ތެރޭގައި ބޮޑެތި މައްސަލަތަކެއް ދިމާވެފައިވަނީ އެ ކުންފުންޏެއްގެ ހިންގުން ދޯދިޔާވެގެން، އެ ކުންފުންޏެއްގެ ހިންގުން ކޯޕަރޭޓް ގަވަރނަންސްއާ ޚިލާފްވުމުގެ ސަބަބުންކަމަށް ވިދާޅުވިއެވެ. ކެޕިޓަލް މާރކެޓް ޑިވެލޮޕްމަންޓުން ގެންދަވަނީ ކޮންމެ އަހަރަކުވެސް ކޯޕަރޭޓް ގަވަރނަންސް ވާރކްޝޮޕްތައް ބާއްވަވަމުންނެވެ.
މިއީ ކޯޕަރޭޓް ގަވަރނަންސް އުޞޫލުތަކާ އެއްގޮތަށް ކުންފުނިތަކުގެ އޮނިގަނޑު ބައްޓަންކޮށް ޢަމަލުކުރުމުގައި ޑިރެކްޓަރުންގެ ބޯޑުގެ ދައުރާއި މަސްއޫލިއްޔަތުގެ މުހިންމުކަން އެފަރާތްތަކަށް އޮޅުންފިލުވައިދެއްވުމުގެ މަޤްޞަދުގައި ކުރިއަށްގެންދަވާ ވަރކްޝޮޕްތަކެއްކަމަށް ސީއެމްޑީއޭއިން ވިދާޅުވެއެވެ.