ގދ. ތިނަދޫގައި ތާރުއަޅައިގެން ހެއްދެވުމަށް ސަރުކާރުން ހަމަޖެއްސެވި ހުރިހާ މަގެއްގައި ތާރުއަޅައި ނިމިއްޖެއެވެ.
މި މަސައްކަތުގެ ކޮންޓްރެކްޓަރ ކަމަށްވާ އެމް.އާރު.ޑީ.ސީން މިހާރު ކުރިއަށް ގެންދަނީ މަގުތައް ބޭނުންކުރަން މުޅިން ދޫކޮށްލުމުގެ ކުރިން ނިންމަންޖެހޭ އެހެން މަސައްކަތްތަކެވެ. މި މަސައްކަތްތަކުގެ ތެރޭގައި ހިމެނޭ، ދުވާރުގައި ގައު އެތުރުމުގެ މަސައްކަތްތަކާއި، ތާރު އަޅާފައިވާ ތަންތަނުގައި ކުރަންޖެހޭ ކުދިކުދި މަސައްކަތްކަމަށް އެމް.އާރު.ޑީ.ސީގެ ރީޖަނަލް މެނޭޖަރ ޢާޒިމް ޙުސައިން ވިދާޅުވިއެވެ.
އާޒިމް ވިދާޅުވީ. ތިނަދޫގެ މަގު ހެދުމުގެ މަޝްރޫޢު ނިމޭއިރު، އެރަށުގެ ތިރި މަގުތަކުގައި ފެން ބޮޑުވާ މައްސަލައަށް ޙައްލެއް ލިބޭނެކަމަށެވެ. މިގޮތުން ޑްރެނޭޖް ސިސްޓަމެއް ބެހެއްޓުމުގެ މަސައްކަތް ވަރަށް އަވަހަށް ފަށާނެކަމަށާއި މިކަމުގެ ސަބަބުން ފެން ބޮޑުވާ މަގުތަކުން ފެން ހިންދުމަށް ޙައްލެއް ލިބޭނެކަމަށް އާޒިމް ވިދާޅުވިއެވެ.
އެމް.އާރު.ޑީސީގެ އަމާޒަކީ، ސަރުކާރުން ޙަވާލުކުރައްވާފައިވާ ޕްރޮޖެކްޓްތައް ވީހާވެސް އަވަސް މުއްދަތެއްގެ ތެރޭގައި ނިންމާލުންކަމަށް އެކުންފުނިން ބުނެއެވެ. އަތޮޅުތެރޭގެ މަގުހެދުމުގެ މަސައްކަތް ހުއްޓިފައި އޮތް އޮތުމަށް ބަދަލުގެންނަވައި، ސަރުކާރުން ގެންދަވަނީ ގިނަ ރަށްތަކެއްގެ މަގުތައް ހެދުމުގެ މަސައްކަތް އެއްފަހަރާ ފަށްޓަވާފައެވެ.