ރާއްޖޭގެ ފަތުރުވެރިކަން އިޝްތިހާރުކުރުމަށްޓަކައި މަޓާޓޯއިން "ޑަބްލިއުޓީއެމް ކަނެކްޓް އޭޝިއާ"ގައި ބައިވެރިވުމަށް ނިންމައިފިއެވެ.
މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް، މަޓާޓޯއިން މައުލޫމާތުދޭ ގޮތުގައި މިއަހަރުގެ މެއިމަހުގެ ސަތާރައިން ނަވާރައަށް މެލޭޝިއާގައި ބޭއްވުމަށް ހަމަޖެހިފައިވާ ފަތުރުވެރިކަމުގެ މިފެއަރގައި މަޓާޓޯއާއެކު ބައިވެރިވާން ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލެވިފައެވެ.
މި ފެއަރގައި ރާއްޖޭގެ ޕެވިލިއަން ހޮސްޓުކުރުމަށް ހަމަޖެހިފައިވަނީ މަޓާޓޯއިންނެވެ. ޑަބްލިއުޓީއެމް ކަނެކްޓް އޭޝިއާގައި ބައިވެރިވާން ބޭނުންވާ ފަރާތްތަކުން މިމަހުގެ ތިރީސްވަނަ ދުވަހުގެ ކުރިން ރަޖިސްޓްރީވާން ޖެހޭނެ ކަމަށް މަޓާޓޯއިން ހާމަކުރެއެވެ.
ވޯލްޑް ޓްރެވަލް މާރޓް، ޑަބްލިއުޓީއެމް ކަނެކްޓް އޭޝިއާގައި ދެކުނު އިރުމަތީ އޭޝިއާގެ ޤައުމުތަކުންނާއި، ދުނިޔޭގެ އެކި ހިސާބުތަކުން ފަތުރުވެރިކަމުގެ ދާއިރާގައި ޙަރަކާތްތެރިވާ ފަރާތްތަކުން ބައިވެރިވާނެއެވެ. މިދިޔަ އަހަރުގެ ފެއާރގައި ބައިވެރިވި ފަރާތްތަކުގެ ތެރެއިން ނުވަދިހަ އިންސައްތަ އަށްވުރެ ގިނަ މީހުން ވަނީ ފެއާރއާއި ދޭތެރޭ ހިތްހަމަޖެހޭކަމަށް ބުނެފައެވެ.