ތިލަފުށި އިންޑަސްޓްރިއަލް ޒޯނުން ބިން ކުއްޔަށް ދޫކުރަނީ

ތިލަފުށި އިންޑަސްޓްރިއަލް ޒޯން ސަރަޙައްދުން ބިން ކުއްޔަށް ހިފުމަށް ބޭނުންވާ ފަރާތްތަކަށް ޝައުޤުވެރިކަން ފާޅުކުރުމުގެ ފުރުޞަތު ހުޅުވާލައިފިއެވެ.

ތިލަފުށި ކޯޕަރޭޝަން ލިމިޓެޑުން ބުނީ، ކ.ތިލަފުށީގައި އަލަށް ހިއްކާފައިވާ ތިލަފުށި އިންޑަސްޓްރިއަލް ޒޯން ސަރަޙައްދުން ބިން ދޫކުރާނީ ގުދަންކުރުމަށާއި ޞިނާޢީ މަސައްކަތްތަކަށް ކަމަށެވެ. ޓީ.އައި.ޒެޑް ސަރަޙައްދުން 1,385 އަކަފޫޓާއި 20,067 އަކަފޫޓާ ދެމެދު ޖުމްލަ 40 ބިން ކުއްޔަށް ދޫކުރުމަށް ނިންމާފައިވެއެވެ. މިބިންތައް ކުއްޔަށްދޫކުރެވޭނީ، 25 އަހަރުގެ މުއްދަތަކަށް ކަމަށް ތިލަފުށި ކޯޕަރޭޝަނުން ހާމަކުރެއެވެ.

ޒޯންތަކުގައި ކުރުމަށް ތިލަފުށި ކޯޕަރޭޝަނުން ބާރުއަޅާ މަސައްކަތްތަކުގެ ލިސްޓެއްވެސް އެ ކޯޕަރޭޝަނުން އާއްމުކޮށްފައިވެއެވެ. އެ ލިސްޓުގައި ހިމެނޭ ކަންތައްތަކުގެތެރޭގައި، އެއްގަމު އުޅަނދުފަހަރު މަރާމާތުކުރުން، ފަރުނީޗަރު ގުދަންކުރުން، ކޯލްޑް ސްޓޯރޭޖް، މޮޓޯރ ވެހިކަލް ގުދަންކުރުން ފަދަ ކަންތައްތައް ހިމެނެއެވެ.

ބީލަން ހުށަހަޅުއްވާ ކޮންމެ ޕްލޮޓަކަށް 5000 ރުފިޔާގެ ބިޑް ސެކިއުރިޓީއެއް ހުށަހަޅަންވާނެ ކަމަށާއި ބީލަން ހުށަހެޅޭނީ މިމަހުގެ 30 ވަނަ ދުވަހުގެ ކުރިން ބިޑް ސެކިއުރިޓީ ދައްކާފައިވާ ފަރާތްތަކަށް އެކަނި ކަމަށްވެސް ތިލަފުށި ކޯޕަރޭޝަނުން ބުނެއެވެ.