އިމްޕޯޓު އެކްސްޕޯޓުގެ ލިޔުންތައް ނިންމުމާއި މުދާ ދޫކުރުމުގެ މަސައްކަތަށް ބޭނުންކުރާ ޕްރޮގްރާމްގެ އެންމެ ފަހުގެ ވަރޝަން "އަސިކުޑާ ވަރލްޑް' އިފްތިތާހްކޮށްފިއެވެ.
ބައިނަލްއަޤްވާމީ ކަސްޓަމްސް ދުވަސް ފާހަގަކުރުމަށް މިއަދު ކަސްޓަމްސް ބިލްޑިންގގައި ބޭއްވި ޚާއްސަ ޙަފްލާގައި "އަސިކުޑާ ވަރލްޑް" އިފްތިތާހްކޮށްދެއްވީ ކޮމިޝަނަރ ޖެނެރަލް އޮފް ކަސްޓަމްސް އިބްރާހީމް ޝަރީފް މުޙައްމަދެވެ. މިހާރު ބޭނުންކުރާ 'އަސިކުޑާ' ޕްރޮގްރާމްގެ އެންމެ ފަހުގެ ވަރޝަންކަމަށްވާ "އަސިކުޑާ ވަރލްޑް"ގެ ޓެސްޓިންގެ މަރުހަލާ ކާމިޔާބުކަމާއި އެކު ހުސްވި އަހަރުތެރޭ ކަސްޓަމްސްއިން ވަނީ ކުރިއަށްގެންދަވާފައެވެ. img:http://s1.psmnews.mv/images/660x400/14854106184392.jpg|ބައިނަލްއަޤްވާމީ ކަސްޓަމްސް ދުވަސް ފާހަގަކުރުމަށް ބޭއްވި ޚާއްސަ ޙަފްލާގެ ތެރެއިން - ފޮޓޯ: ޢަލީ ނަޞީރު / ޕީއެސްއެމް
އެކްސްޕޯޓު އިމްޕޯޓު މުދާ ކްލިއަރކުރުމަށް މިހާރު ބޭނުންކުރާ ނިޒާމަށް މިގެނެވޭ ބަދަލުގެ ސަބަބުން ލިޔެކިއުން ނިންމުމަށް ހޭދަވާ ވަގުތު މަދުކުރެވި، މުދާ މިހާރަށް ވުރެ އަވަހަށް ކްލިއަރކުރުމަށް މަގުފަހިވެގެންދާނެ ކަމަށް ކަސްޓަމްސްއިން ހާމަކުރެއެވެ. އަދި ވިޔަފާރިވެރިންނާއި ބްރޯކަރުންނަށް އެފަރާތްތަކުގެ އޮފީހުގައި ނުވަތަ ގޭގައި ތިބެގެން މުދާ ކްލިއަރކުރުމުގެ ކަންކަން ކުރުމަށް މަގުފަހިވެގެންދާނެ ކަމަށާއި މި ނިޒާމްގެ ސަބަބުން ދުނިޔޭގެ ކުރިއަރާފައިވާ ޤައުމުތަކުގައިވެސް ބޭނުންކުރާ ސިންގަލް ވިންޑޯ ސިސްޓަމް ޤާއިމްކުރުމަށް މަގުފަހިވެ، އެކްސްޕޯޓް އިމްޕޯޓާގުޅޭ ކަންކަމުގައި ހަރަކާތްތެރިވާ ސަރުކާރުގެ ހުރިހާ އިދާރާތައްވެސް އޮންލައިކޮށް ގުޅާލުމަށް ފުރުޞަތު ތަނަވަސްވެގެންދާނެ ކަމަށްވެސް ކަސްޓަމްސްއިން ހާމަކުރެއެވެ.