ހުޅުމާލޭގައި ހުންނަ ކުޑަކުދިންގެ ހިޔާ، ފިޔަވަތީގައި ތިބޭ ކުދިންނަށް ބޭނުންވާ ބައެއް ތަކެތި، މޯލްޑިވްސް ކަސްޓަމްސް ސަރވިސްގެ މުވައްޒަފުން ހަދިޔާކޮށްފިއެވެ.
ކަސްޓަމްސްގެ އިޖްތިމާޢީ ޒިންމާގެ ދަށުން ކުރިއަށްގެންދިޔަ މިޙަރަކާތުގައި ތަކެތި ޙަވާލުކޮށްދެއްވީ އިއްޔެ އެސެންޓަރުގައި ބޭއްވި ޚާއްޞަ ރަސްމިއްޔާތެއްގައި ކޮމިޝަނަރ ޖެނަރަލް އޮފް ކަސްޓަމްސް އިބްރާހީމް ޝަރީފް މުޙައްމަދެވެ. ކުޑަކުދިންގެ ހިޔާގެ ފަރާތުން މިތަކެއްޗާއި ޙަވާލުވެވަޑައިގަތީ ފިޔަވަތީގެ ޗީފް އެގްޒެކެޓިވް އޮފިސަރ ފާތިމަތު ޝިޔާމާއެވެ.
ހަދިޔާކުރި ތަކެތީގެ ތެރޭގައި އެސެންޓަރުގެ ބަދިގެއަށް ބޭނުންވާ ސާމާނާއި ހިފާގެންގުޅޭ ތަކެތީގެ އިތުރުން ސެންޓަރުގެ ހެލްތު ޑިޕާޓްމަންޓަށް ބޭނުންވާ ފަސްޓް އެއިޑްގެ ސާމާނު ހިމެނޭކަމަށް ކަސްޓަމްސްއިން މަޢުލޫމާތުދެއެވެ. ތަކެތި ޙަވާލުކުރުމުގެ އިތުރުން ކުޑަކުދިންގެ ހިޔާގެ ކުދިންނަށް ޚާއްޞަ މޫދު ކުޅިވަރުތަކެއް އިއްޔެ ހެނދުނު ހުޅުމާލެ ބީޗުގައި ކަސްޓަމްސްގެ ފަރާތުން ބާއްވާފައިވެއެވެ. އަދި ތަފާތު ކުޅިވަރު ޙަރަކާތްތައް އިއްޔެ ހަވީރުވެސް ވަނީ އެސެންޓަރުގައި ބާއްވާފައެވެ.