އިކޮނޮމިކް މިނިސްޓްރީއަކީ ކޮންމެ ދުވަހަކުވެސް ގިނަ އަދަދެއްގެ މީހުން ޚިދުމަތް ހޯދަމުންދާ ތަނެކެވެ.
ޚިދުމަތް ހޯދާ ފަރާތްތަކަށް ފަސޭހަ އިންތިޒާމްތައް ހަމަޖެއްސެވުމަށް އިކޮނޮމިކް މިނިސްޓްރީންވަނީ އޮންލައިންކޮށް، ވިޔަފާރި ރަޖިސްޓްރީ ކުރުމަށް ފޯމް ހުށަހެޅޭނެ އިންތިޒާމް މިދިޔަ އަހަރުގެތެރޭގައި ހަމަޖައްސަވާފައެވެ. ފޯމްތައް އޮންލައިންކޮށް ހުށަހެޅުނު ނަމަވެސް ރަޖިސްޓްރޭޝަން ފީއާއި، އެހެނިހެން ފީތައް ދައްކަން އިކޮނޮމިކް މިނިސްޓްރީއަށް ދާންޖެހެއެވެ. އެހެންނަމަވެސް މިކަން ޢާއްމުންނަށް ފަސޭހަކުރެއްވުމުގެ ގޮތުން އިކޮނޮމިކް މިނިސްޓްރީން މިހާރު ގެންދަވަނީ އޮންލައިންކޮށް ފައިސާ ދެއްކޭނެ އިންތިޒާމް ހަމަޖެއްސެވުމުގެ މަސައްކަތް ކުރައްވަމުންނެވެ.
އިކޮނޮމިކް މިނިސްޓްރީން ދެއްވަމުންގެންދަވާ ޚިދުމަތްތަކާއި ގުޅޭގޮތުން ނޫސްވެރިންނަށް މަޢުލޫމާތުދެއްވަމުން، ރެޖިސްޓްރާރ އޮފް ކޮމްޕެނީސް މަރިޔަމް ވިސާމް ވިދާޅުވީ، އަންނަ މަހުން ފެށިގެން އޮންލައިންކޮށް ފައިސާދެއްކޭނެ އިންތިޒާމް ހަމަޖެހިގެންދާނެކަމަށާއި، އެސިސްޓަމް ޤާއިމްކުރެއްވުމުގެ މަސައްކަތް މިމަހުގެތެރޭގައި ނިމޭނެ ކަމަށެވެ.
ވިޔަފާރިތަކަށް ރަޖިސްޓްރޭޝަނާއި، އެހެނިހެން ހުއްދަތައް ހޯދުމުގައި ކިޔޫގައި ހޭދަކުރަންޖެހޭ ވަގުތު ކުޑަކުރުމަށް ލުއި ފަސޭހަ ގޮތްތައް އިންތިޒާމް ކޮށްދެއްވުމަށް އިކޮނޮމިކް މިނިސްޓްރީން ގެންދަވަނީ މަސައްކަތް ކުރައްވަމުންނެވެ. އެގޮތުން މިމަހުގެ އެއްވަނަ ދުވަހުން ފެށިގެން އިކޮނޮމިކް މިނިސްޓްރީން ވަނީ އޮންލައިންކޮށް ޚިދުމަތްތަކަށް ނަމްބަރު ނެގޭނެ ނިޒާމެއްވެސް ޤާއިމްކުރައްވާފައެވެ. މިއާއެކު ޚިދުމަތް ހޯދާ ފަރާތްތަކަށް ފަސޭހަތަކެއް ލިބިގެންދާނެ ކަމަށް އެމިނިސްޓްރީން ޤަބޫލުކުރައްވައެވެ.