ފިކުރީ މުދާ ރައްކާތެރިކުރުމަކީ ޤައުމުގެ ތަރައްޤީއަށް މުހިއްމު ކަމެއް ކަމަށާއި ސަރުކާރުން އެކަމަށް ޚާއްޞަ އިސްކަމެއް ދެއްވާ ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް މުހައްމަދު ސަޢީދު ވިދާޅުވެއްޖެއެވެ.
އިކޮނޮމިކް މިނިސްޓަރ މިހެން ވިދާޅުވީ ރާއްޖޭގައި ފަންނީ އަދި އަދަބީ މަސައްކަތްކުރާ ފަރާތްތަކަށް އެފަރާތްތަކުގެ އުފެއްދުންތަކުން ދެމެހެއްޓެނިވި ގޮތެއްގައި ނަފާ ލިބޭނެ ގޮތެއް ހަމަޖެއްސެވުމަށްޓަކައި އުފައްދަވާ ކަލެކްޓިވް މެނޭޖްމަންޓް އޮގަނައިޒޭޝަނާ ގުޅޭ މަސައްކަތު ބައްދަލުވުން ފަށްޓަވާދެއްވާ، ވާހަކަފުޅުދައްކަވަމުންނެވެ.
މިނިސްްޓަރ ސަޢީދު ވިދާޅުވީ ރާއްޖޭގައި ކަލެކްޓިވް މެނޭޖްމަންޓް އޮގަނައިޒޭޝަނެއް އުފެއްދުމުގެ މަސައްކަތް ކުރިއަށްދަނީވެސް ފިކުރީ މުދާ ރައްކާތެރިކުރުމަށް ސަރުކާރުން ކުރައްވަމުން ގެންދަވާ މަސައްކަތުގެ ދަށުންކަމަށެވެ.
img:http://s3.psmnews.mv/images/660x400/14869929603732.jpg|ކަލެކްޓިވް މެނޭޖްމަންޓް އޮގަނައިޒޭޝަނާ ގުޅޭ މަސައްކަތު ބައްދަލުވުން ފެއްޓެވުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް
މިއަދު ފެށި މަސައްކަތުގެ ބައްދަލުވުމަކީ އިކޮނޮމިކް މިނިސްޓްރީއާއި ވޯލްޑް އިންޓަލެކްޗުއަލް ޕްރޮޕަޓީ އޮގަނައިޒޭޝަން ގުޅިވަޑައިގެން ބާއްވާ ދެ ދުވަހުގެ މަސައްކަތު ބައްދަލުވުމެކެވެ. ސޯލްޓް ކެފޭ ހުންނަ ޢިމާރާތުގެ ކޮންފަރެންސް ހޯލުގައި ބާއްވަވާ މި މަސައްކަތު ބައްދަލުވުމަކީ ޗައިނާގެ ކަލްޗަރަލް އެފެއަރޒް އެޖެންސީގެ އެހީތެރިކަމާއެކު ބާއްވަވާ ބައްދަލުވުމެކެވެ.
މި މަސައްކަތު ބައްދަލުވުމާ ގުޅޭގޮތުން މަޢުލޫމާތު ދެއްވަމުން އިކޮނޮމިކް މިނިސްޓްރީގެ ފެއަރ ޓްރޭޑް ސެކްޝަންގެ ޑިރެކްޓަރ އަޙްމަދު މިޤްދާދު ވިދާޅުވީ މި މަސައްކަތު ބައްދަލުވުމުގައި ކަލެކްޓިވް މެނޭޖްމަންޓު އޮގަނައިޒޭޝަނެއް ޤާއިމްކުރުމަށް ބޭނުންވާ ފަންނީ ލަފާއާއި އިރުޝާދު ދެވިގެންދާނެކަމަށެވެ. މިޤްދާދު ވިދާޅުވީ ކަލެކްޓިވް މެނޭޖްމަންޓް އޮގަނައިޒޭޝަން މިއަހަރުގެ ތެރޭގައި ވުޖޫދަށް އަންނާނެ ކަމަށާއި އެކަމާ ގުޅޭ ޤާނޫނީ މަސައްކަތް މިހާރު ކުރިއަށްދާ ކަމަށެވެ.
މިމަސައްކަތު ބައްދަލުވުމުގައި ރާއްޖޭގެ ކަމާގުޅޭ ދާއިރާތަކުން ތިރީހަކަށް ބޭފުޅުން ބައިވެރިވެވަޑައިގަންނަވައެވެ.