ވިޔަފާރީގެ ދާއިރާގައި ޙަރަކާތެރިވާ ޢާއްމު ފަރުދުންނާއި ވިޔަފާރިވެރިންގެ ޢަދަދު މީގެ ކުރިން އިތުރުނުވާ މިންވަރަށް، ވޭތުވެދިޔަ 3 އަހަރު އިތުރުވެފައިވާކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓު މުޙައްމަދު ސަޢީދު ވިދާޅުވެއްޖެއެވެ.
ކޮޕީރައިޓާއި، އެއާ ގުޅުންހުރި ޙައްޤުތަކާ ގުޅޭގޮތުން ފެށްޓެވި މަސައްކަތު ބައްދަލުވުން ފެށުމުގެ ރަސްމިޔާތުގައި ވާހަކަފުޅުދައްކަވަމުން މިނިސްޓަރު ސަޢީދު ވިދާޅުވީ ރާއްޖޭގެ އެކި ހިސާބުތަކުގައި ވިޔަފާރި، ކުރިއެރުއްވުމަށް ސަރުކާރުން ގިނަ މަސައްކަތްތަކެއް ކުރައްވަމުންދާ ކަމަށެވެ.
ރާއްޖޭގެ ތާރީޚްގައިވެސް ނުދެކޭހައި ބޮޑެތި މަޝްރޫޢުތައް މިހާރު ކުރިއަށްދާކަން ފާހަގަކުރައްވައި މިނިސްޓަރު ވިދާޅުވީ ރާއްޖެ އަންނަނީ ޢުމްރާނީ ގޮތުންނާއި އިޤްތިޞާދީގޮތުން ބޮޑެތި ކުރިއެރުންތަކެއް ހޯދަމުންކަމަށެވެ.
ރާއްޖޭގެ ކަމާގުޅޭ ދާއިރާތަކުން ތިރީހަކަށް ބޭފުޅުން ބައިވެރިވެވަޑައިގަންނަވާ "ވާރކްޝޮޕް އޮން ކޮޕީރައިޓު އެންޑް ރިލޭޓަޑް ރައިޓްސް" އަކީ އިކޮނޮމިކް މިނިސްޓްރީއާއި ވޯލްޑް އިންޓަލެކްޗުއަލް ޕްރޮޕަޓީ އޮގަނައިޒޭޝަން ގުޅިވަޑައިގެން ބާއްވަވާ ދެ ދުވަހުގެ މަސައްކަތު ބައްދަލުވުމެކެވެ.