ރާއްޖޭގައި ފަންނީ އަދި އަދަބީ މަސައްކަތްކުރާ ފަރާތްތަކަށް އެފަރާތްތަކުގެ އުފެއްދުންތަކުން ދެމެހެއްޓެނިވި ގޮތެއްގައި ނަފާ ލިބޭނެ ގޮތެއް ހަމަޖެއްސެވުމަށްޓަކައި އުފައްދަވާ ކަލެކްޓިވް މެނޭޖްމަންޓް އޮގަނައިޒޭޝަން ކުރިއަށް އޮތް ދެމަސްދުވަހުގެ ތެރޭގައި ޤާއިމްކުރެވޭނެ ކަމަށް އިކޮނޮމިކް މިނިސްޓްރީން ވިދާޅުވެއްޖެއެވެ.
ރާއްޖޭގައި ފަންނީ އަދި އަދަބީ މަސައްކަތްތައް ކުރައްވާ މުއައްސަސާތަކަށް އަމާޒުކުރައްވައިގެން ވޯލްޑް އިންޓަލެކްޗުއަލް ޕްރޮޕަޓީ އޮގަނައިޒޭޝަނާއި ގުޅިވަޑައިގެން އިކޮނޮމިކް މިނިސްޓްރީން ވަނީ މަސައްކަތު ބައްދަލުވެއް ބާއްވަވާފައެވެ. ސޯލްޓް ކެފޭ ހުންނަ ޢިމާރާތުގެ ކޮންފަރެންސް ހޯލްގައި ބޭއްވި މި މަސައްކަތު ބައްދަލުވުމަކީ ޗައިނާގެ ކަލްޗަރަލް އެފެއަރޒް އެޖެންސީގެ އެހީތެރިކަމާއެކު ބޭއްވެވި ބައްދަލުވުމެކެވެ.
މި މަސައްކަތު ބައްދަލުވުމާ ގުޅޭގޮތުން މަޢުލޫމާތު ދެއްވަމުން އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ ޢަބްދު ﷲ މުޙައްމަދު ވިދާޅުވީ މި މަސައްކަތު ބައްދަލުވުމުގެ ނަތީޖާއެއްގެ ގޮތުން ކަލެކްޓިވް މެނޭޖްމަންޓް އޮގަނައިޒޭޝަން، ސީއެމްއޯ އުފެއްދުމަށް އެހީތެރިވެދޭނެ ކަމަށެވެ. އަދި މިހާރު ސީއެމްއޯގެ ޤަވާޢިދުވެސް އެކުލަވާލައްވާފައިވާ ކަމަށް ޢަބްދު ﷲ މުޙައްމަދު ވިދާޅުވިއެވެ.
img:http://s1.psmnews.mv/images/660x400/14869929418704.jpg|ކަލެކްޓިވް މެނޭޖްމަންޓް އޮގަނައިޒޭޝަނާ ގުޅޭ މަސައްކަތު ބައްދަލުވުން ފެއްޓެވުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް
ސީއެމްއޯއަކީ ފިކުރީ މުދަލުގެ ޙައްޤުވެރިން އެކުލެވޭހެން އުފައްދާ ޖަމްޢިއްޔާއެއް ކަމަށާއި ފިކުރީ މުދަލުން ދެމެހެއްޓެނިވި ގޮތެއްގައި ޢާމްދަނީއެއް ހޯދަން ބޭނުން ކޮންމެ ފަރާތަކަށްވެސް ސީއެމްއޯގައި ބައިވެރިވުމުގެ ފުރުޞަތު އޮންނާނެ ކަމަށްވެސް ޢަބްދު ﷲ މުޙައްމަދު ވިދާޅުވިއެވެ.
"ވޯކްޝޮޕް އޮން ކޮޕީ ރައިޓް އެންޑް ރިލޭޓަޑް ރައިޓްސް"ގެ ބައިވެރިން ބުނިގޮތުގައި މި މަސައްކަތު ބައްދަލުވުމުގެ ސަބަބުން ގިނަ ކަންތައްތަކެއް ދަސްވިއެވެ. އަދި ފިކުރީ މުދާ ޙިމާޔަތްކުރުމުގެ ދާއިރާއަކީ ރާއްޖެއަށް މިހާރު ވަރަށް ބޭނުންވެފައިވާ ކަމެއްކަން ފާހަގަކުރިއެވެ.
މި މަސައްކަތު ބައްދަލުވުމުގައި ކަލެކްޓިވް މެނޭޖްމަންޓު އޮގަނައިޒޭޝަނެއް ޤާއިމްކުރުމަށް ބޭނުންވާ ފަންނީ ލަފައާއި އިރުޝާދު ދެއްވާފައިވާކަމަށް އިކޮނޮމިކް މިނިސްޓްރީން ހާމަކުރެއެވެ. ދެ ދުވަހުގެ މި މަސައްކަތު ބައްދަލުވުމުގައި ރާއްޖޭގެ ކަމާގުޅޭ ދާއިރާތަކުން ތިރީހަކަށް ބޭފުޅުން ބައިވެރިވެވަޑައިގެންފައިވެއެވެ.