އާސަންދަ ކުންފުނިން ޞިއްޙީ ޚިދުމަތްދޭ ހުރިހާ ފަރާތްތައް އެއް ވިއުގައަކުން ގުޅާލުމަށް ތަރައްޤީކޮށްފައިވާ އާސަންދަ ޕޯޓަލަށް ބަދަލުތައް ގެނެސް، އާ ޕޯޓަލެއް މާދަމާ އިފްތިތާޙްކުރުމަށް ނިންމައިފިއެވެ.
އާސަންދަ އާ ޕޯޓަލް އެންމެ ފުރަތަމަ ބޭނުންކުރުމަށް ހަމަޖެހިފައިވަނީ އދ. އަތޮޅުގައެވެ. އެގޮތުން އާސަންދަ އާ ޕޯޓަލް އިފްތިތާޙުކުރުމަށް މާދަމާ ޚާއްޞަ ރަސްމިއްޔާތެއް އދ. މަހިބަދޫގައި ބޭއްވުމަށް ވަނީ ހަމަޖައްސަވާފައި. އާ ޕޯޓަލް އިފްތިތާޙުކޮށްދެއްވުމަށް ހަމަޖެހިފައިވަނީ މިނިސްޓަރ އޮފް ހެލްތު، ޢަބްދުﷲ ނާޒިމް އިބްރާހީމެވެ.
އާސަންދައިން ހާމަކުރާގޮތުގައި ކުރިން ބޭނުންކުރަމުން އައި ސޮފްޓުވެއަރ ބަދަލުކޮށް، ތަޢާރަފްކުރާ މި އާ ޕޯޓަލަކީ ކުރިން ބޭނުންކުރި ޕޯޓަލަށްވުރެ ފަސޭހަ ޕޯޓަލެކެވެ. މިޕޯޓަލާ ގުޅޭ ޓްރެއިނިންގ މިހާރު އދ. އަތޮޅުގެ ޞިއްޙީ ޚިދުމަތްދޭ ތަންތަނަށް ވަނީ ދީފައެވެ. އަދި ކޮންމެ ހަފްތާއަކުވެސް ދެ އަތޮޅެއްގައި އާ ޕޯޓަލް ބޭނުންކުރަން ފަށާނެކަމަށް އާސަންދަ ކުންފުނިން ބުނެއެވެ.
އީ-ޕޯޓަލަކުން ރާއްޖޭގެ ޞިއްޙީ ޚިދުމަތްދޭ ތަންތަން ގުޅާލެވުމުން ސަރުކާރުގެ ޚަރަދު ކުޑަވެ، ބަލިމީހުންގެ މަޢުލޫމާތު ދެނެގަތުމަށް ފަސޭހަވާނެކަން އާސަންދަ ކުންފުނިން ފާހަގަކުރެއެވެ.