އިއްޔެ ހުޅުމާލޭގައި ބޭއްވި ޔޫތް ކެރިއަރ އެކްސްޕޯގައި ޓްރީ ޓޮޕް ހޮސްޕިޓަލްގެ ވަޒީފާއަށް 600 ޒުވާނުން އެދިފައިވާކަމަށް އެ ހޮސްޕިޓަލުގެ މެނޭޖްމަންޓުން ހާމަކޮށްފިއެވެ.
ޓްރީ ޓޮޕް ހޮސްޕިޓަލްގެ އެޗްއާރު މެނޭޖަރ މޫމިނާ ވަޙީދު ވިދާޅުވީ 500 އަށްވުރެ ގިނަ ވަޒީފާގެ ފުރުޞަތައް ހުޅުވާލިކަމަށެވެ. ހުޅުވާލި ވަޒީފާތަކުން ގިނަ ޒުވާނުން ޝައުޤުވެރިކަންފާޅުކޮށްފައި ވަނީ ކްލިނިކަލްގެ ދާއިރާ ކަމުގައިވާ، ލެބޯޓްރީ ޓެކްނީޝަންއާއި، ނަރުހުންނާއި، ފާމަސިސްޓުންފަދަ ވަޒީފާތަކަށް ކަމަށް އޭނާ ވިދާޅުވިއެވެ. އަދި ނޮން ކްލިނިކަލް ވަޒީފާތައް ކަމުގައިވާ، އެޗްއާރާއި، ފައިނޭންސް، އަދި ކަސްޓަމަރ ކެއަރ ފަދަ ދާއިރާތަކަށްވެސް އެޕްލައިކޮށްފައިވާކަމަށް މޫމިނާ ވިދާޅުވިއެވެ.
މި ވަޒީފާތަކަށް އެޕްލައިކުރި ކުދިންގެ ސީވީއާއި ތަޢުލީމީ ސެޓްފިކެޓް ފަދަ ލިޔެކިޔުންތައް ހުށަހެޅުމަށް އަންގާފައިވާކަމަށާއި މީގެ ތެރެއިން ގިނަ ވަޒީފާތައް ހަމަޖެހިގެންދާނެކަމަށް ޓްރީ ޓޮޕް ހޮސްޕިޓަލްގެ އެޗްއާރު މެނޭޖަރ ވިދާޅުވިއެވެ.
img:http://s4.psmnews.mv/images/660x400/14874866505150.jpg|ޔޫތް ކެރިއަރ އެކްސްޕޯ 2017 ގެ ތެރެއިން
ހުޅުމާލޭގައި އަލަށް ޢިމާރާތްކުރާ ޓްރީ ޓޮޕް ހޮސްޕިޓަލަކީ ރާއްޖޭގައި ޤާއިމުކުރާ މަލްޓި ސްޕެޝަލިސްޓް ފުރަތަމަ ހޮސްޕިޓަލެވެ. މިހޮސްޕިޓަލުން ދެކުނު އޭޝިޔާއާއި ދެކުނު އިރުމަތީ އޭޝިޔާގެ ހޮސްޕިޓަލްތަކާ އެއްފެންވަރެއްގެ ޚިދުމަތްތަކެއް ދެވޭނެކަމަށް ޓްރީ ޓޮޕް ހެލްތް ޕްރައިވެޓް ލިމިޓެޑުން ބުނެއެވެ.
ޓާރޝަރީ ފެންވަރުގައި ތަރައްޤީކުރާ 159 އެނދުގެ މި ހޮސްޕިޓަލް އިމާރާތް ކުރުމަށް ގާތްގަނޑަކަށް 80 މިލިއަނަށްވުރެ ގިނަ ޑޮލަރު ޚަރަދުވާނެ ކަމަށް ޓްރީ ޓޮޕް ހެލްތް ޕްރައިވެޓް ލިމިޓެޑުން ހާމަކުރެއެވެ.
މި ހޮސްޕިޓަލް ޢިމާރާތްކުރުމުގެ މަސައްކަތް ކުރަނީ ތުރުކީވިލާތުގެ ކުންފުންޏެއް ކަމަށްވާ، "ޓާރމެކްސް"އިންނެވެ. މި ހޮސްޕިޓަލުގެ މަސައްކަތް ނިންމާ އަންނަ ޖޫންމަހު ހުޅުވުމަށް ދަނީ މަސައްކަތް ކުރަމުންނެވެ.