ޔޫރަޕްގެ މަޝްހޫރު ޓުއަރ އޮޕަރޭޓަރ ކުއޯނީގެ، ކަސްޓަމަރުންގެ މެދުގައި އެންމެ މަޤްބޫލް މަންޒިލްގެ މަގާމް ޖެހިޖެހިގެން ބާރަ ވަނަ ފަހަރަށް ރާއްޖެއަށް ލިބިއްޖެއެވެ.
ކުއޯނީއިން ހާމަކުރާގޮތުގައި ދެވަނައަށް އެންމެ މަޤްބޫލް މަންޒިލަކީ މޮރީޝިއަސް. އަދި ތިންވަނައަށް ހޮވިފައިވަނީ ސްރީލަންކާއެވެ.
ރާއްޖޭގެ ޓޫރިޒަމް މިނިސްޓްރީގެ ތަފާސް ހިސާބްތައް ދައްކާގޮތުން މިދިޔަ އަހަރު ޔޫރަޕުގެ ޤައުމުތަކުން ރާއްޖެއަށް ފަސް ސަތޭކަ ހަތްދިހަ ފަސްހާހަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. އެ އަދަދަކީ ދެހާސް ފަނަރަވަނަ އަހަރާ އަޅާބަލާއިރު ހަތެއް ޕޮއިންޓު ތިނެއް އިންސައްތަ އިތުރު ޢަދަދެކެވެ.
ޔޫރަޕުގެ ޤައުމުތަކަކީ ރާއްޖޭގެ ފަތުރުވެރިކަމަށް މުހިއްމު ޤައުމުތަކެކެވެ. އެގޮތުން ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ޤައުމުތަކުގެ ތެރޭގައި ޔޫރަޕްގެ ޤައުމުތައް ކަމަށްވާ އިޓަލީ، އިނގިރޭސިވިލާތް، ޖަރުމަނީ އަދި ރަޝިއާ ހިމެނެއެވެ. އެގޮތުން ރާއްޖެއަށް އަންނަ ފަތުރުވެރިންގެ ސާޅީސް ހަތަރެ އިންސައްތަ ޙިއްޞާކުރަނީ ޔޫރަޕްގެ ފަތުރުވެރިންނެވެ.