މިނިވަން ވިޔަފާރީގެ އެއްބަސްވުންތަކުން ކުރާ އަސަރުތައް ދެނެގަތުމާ ގުޅޭގޮތުން ސަރުކާރުގެ ކަމާގުޅުން ހުރި ދާއިރާތަކާއި، މަތީ ތަޢުލީމުދޭ މުއައްސަސާތަކުގެ ޤާބިލްކަން އުފެއްދުމަށް ތަމްރީނު ޕްރޮގްރާމެއް ފަށްޓަވައިފިއެވެ.
މި ތަމްރީނު ޕްރޮގްރާމުގައި މަޢުލޫމާތު ދެއްވުމަށް ހަމަޖެހިފައިވަނީ ޔުނައިޓެޑް ނޭޝަންސް އިކޮނޮމިކް އެންޑް ސޯޝަލް ކައުންސިލް ފޮ އޭޝިޔާ ފެސިފިކް- ޔޫ.އެން.އެސްކެޕްގެ ފަންނީ ބޭފުޅުންނެވެ. މިއީ މިނިވަން ވިޔަފާރީގެ އެއްބަސްވުންތަކުން ކުރާ އަސަރުތައް ދެނެގަތުމާ ގުޅޭގޮތުން މިނިސްޓްރީ އޮފް އިކޮނޮމިކް ޑިވެލޮޕްމަންޓުން ބާއްވަވާ ޚާއްޞަ ތަމްރީނު ޕްރޮގްރާމެކެވެ.
މި ޕްރޮގްރާމް ކުރިއަށް ގެންދަވަނީ ދެ ދުވަހުގެ މުއްދަތައް ކަސްޓްމްސް ބިލްޑިންގައެވެ. މި ތަމްރީނު ޕްރޮގްރާމް ފެށްޓްވުމަށް ބޭއްވެވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ މުޙައްމަދު ސަޢީދު ވިދާޅުވީ މިނިވަން ވިޔަފާރީގެ އެއްބަސްވުންތަކުގައި ސޮއިކުރުމާއި ގުޅޭގޮތުން ދިވެހި ސަރުކާރުން، ޗައިނާ އާއި ހޮންގކޮންގ އާއި މަޝްވަރާކުރަމުންދާ ދަނޑިވަޅެއްގައި މިފަދަ ތަމްރީނުތައް ކުރިއަށްގެންދިއުން މުހިއްމުކަމަށެވެ. އަދި އެހެން ޤައުމުތަކާއެކު މިފަދަ މިނިވަން ވިޔަފާރީގެ އެއްބަސްވުންތަކަކަށް އައުމަށް މަސައްކަތް ކުރައްވަމުންގެންދަވާކަން މިނިސްޓަރ ފާހަގަކުރެއްވިއެވެ.
ތަމްރީނު ޕްރޮގްރާމްގެ ސަބަބުން ޔޫ.އެން.އެސްކެޕްއާ އެކީ ވިޔަފާރިއާއި ގުޅޭ ތަފާތު ދިރާސާތައްކޮށް، މިކަމުގެ ސަބަބުން އިތުރު މަޢުލޫމާތުތަކެއް ދެނެގަނެވިގެންދާނެކަމަށް އުންމީދުކުރައްވާކަމުގައި އިކޮނޮމިކް މިނިސްޓަރ ވިދާޅުވިއެވެ.
މި ތަމްރީނު ޕްރޮގްރާމްގައި މައިގަނޑު ގޮތެއްގައި މަޢުލޫމާތު ދެއްވާނީ މުދަލުގެ ބާވަތްތަކުން ޑިޔުޓީ ކަނޑާލުމުން ކުރާނެ އަސަރުތަކާއި، އިކޮނޮމެޓްރިކްސް މޮޑެލްތަކުގެ އެހީގައި ދެނެގަންނާނެ ގޮތް އުގަންނައިދިނުމަށާއި އެފަދަ މޮޑެލްތައް ބޭނުންކޮށްގެން މިނިވަން ވިޔަފާރީގެ އެއްބަސްވުންތަކާ ގުޅުންހުރި ދިރާސާތައް ހެދުމާ ގުޅޭގޮތުންނެވެ.
މިއީ ބައިނަލްއަޤްވާމީ ވިޔަފާރިއާއި ގުޅުންހުރި އެކި ބާވަތުގެ ދިރާސާތައް ކުރެވޭނެ ޤާބިލްކަން، އިޤްތިޞާދީ ދާއިރާގައި ހަރަކާތްތެރިވާ ސަރުކާރުގެ މުއައްޒަފުންގެ މެދުގައި ހަރުދަނާ ކުރުމާއި، މިފަދަ ދިރާސާތައް ހެދުމުގައި ހަރަކާތްތެރިވާ ބައިނަލް އަޤްވާމީ ޖަމްޢިއްޔާތަކާއި ގުޅިގެން، ރާއްޖެއާއި ގުޅުންހުރި އިޤްތިޞާދާއި ވިޔަފާރީގެ ދިރާސާތައް ކުރިއަށް ގެންދިޔުމަށް މަގުފަހިކޮށްދިނުމުގެ ގޮތުން ކުރިއަށްގެންދާ ތަމްރީނު ޕްރޮގްރާމެކެވެ.
މި ތަމްރީނު ޕްރޮގްރާމްގައި ސަރުކާރުގެ އިދާރާތަކާއި މަތީ ތަޢުލީމުދޭ މުއައްސަސާތަކުގެ ތިރީސް މުއައްޒަފުން ބައިވެރިވެއެވެ.