އިންޑިއާ ކަނޑުގައި މިހާތަނަށް ބާއްވާ އެންމެ ބޮޑު ޔޮޓު ރެލީ ރާއްޖޭގައި ފަށައިފިއެވެ.
40 ޔޮޓާއެކު މިދިޔަމަހުގެ 28 ވަނަ ދުވަހު ފެށި މިރެލީއަކީ ޔޮޓުތަކުން ރާއްޖެއަށް އަންނަ ފަތުރުވެރިންނަށް ރާއްޖޭގެ އަތޮޅުތަކުގެ ރީތިކަން ދައްކައި، ރާއްޖެ އިޝްތިހާރު ކުރުމަށްޓަކައި ބާއްވާ ރެލީއެއް ކަމަށް މިކަން އިންތިޒާމްކުރާ ލަގްޒަރީ ކަލެކްޝަނުން މަޢުލޫމާތުދެއެވެ.
ޔޮޓް ރެލީ ފަށާފައިވަނީ ހއ.އަތޮޅުންނެވެ. މިރެލީ އަންނަ މަހުގެ 25 ވަނަ ދުވަހުގެ ނިޔަލަށް ކުރިއަށްދާނެއެވެ. މިރެލީގައި ބައިވެރިވާ 40 ޔޮޓަކީ ދުނިޔޭގެ އެކި ހިސާބުތަކުން ފަތުރުވެރިންނާއިއެކު ރާއްޖެ އައިސްފައިވާ ޔޮޓުތަކެކެވެ. މި ރެލީގައި ދުއިސައްތައެއްހާ ފަތުރުވެރިން ބައިވެރިވާނެ ކަމަށް ލަގްޒަރީ ކަލެކްޝަނުން މަޢުލޫމާތުދެއެވެ.
img:http://s2.psmnews.mv/images/660x400/14888972563422.jpg|ޔޮޓް ރެލީގެ ތެރެއިން ކުރިއަށްދާ ހަރަކާތްތަކުގެ ތެރެއިން
ރާއްޖޭގެ ހުރިހާ އަތޮޅަކަށް ޒިޔާރަތްކޮށް، ސާޅީސް ދެ ރަށެއްގައި ޔޮޓުތައް މަޑުކުރުމަށް ވަނީ ހަމަޖެހިފައެވެ. އަދި ބައެއް ރަށްރަށުގައި ޙާއްސަ ހަރަކާތްތައް ކުރިއަށް ގެންދިޔުމަށް ރާވާފައިވާ ކަމަށް ލަގްޒަރީ ކަލެކްޝަނުން ހާމަކުރެއެވެ. މިރެލީއަށް ރަށްރަށުން ވަރަށް ބޮޑު އެއްބާރުލުމެއް ލިބެމުންދާ ކަމަށާއި، ރަށްރަށަށް ޒިޔާރަތްކުރުމުން ހޫނު މަރުޙަބާއެއް ކިޔާފައިވާކަން ލަގްޒަރީ ކަލެކްޝަނުން ފާހަގަކުރެއެވެ.
މި ރެލީގެ އެންމެ ފަހުގެ މަންޒިލަކީ އައްޑު ސިޓީއެވެ. އަދި ރެލީގެ ނިމުން ފާހަގަކުރުމަށް ތިން ދުވަހުގެ ޚާއްޞަ ހަރަކާތެއް އައްޑޫގައި ކުރިއަށްގެންދިޔުމަށް ވަނީ ހަމަޖެހިފައެވެ. ރާއްޖެއަކީ ގިނަ އަދަދަކަށް ޔޮޓު ޒިޔާރަތްކުރާ ޤައުމަކަށް ވީނަމަވެސް، ޔޮޓުތައް އާއްމުކޮށް މަޑުކުރަނީ ރާއްޖޭގެ ވަކި ހިސާބުތަކެއްގައެވެ. އެހެންކަމުން މި ރެލީ މެދުވެރިކޮށް، ރާއްޖޭގެ އެކި ހިސާބުތަކުގެ ރީތިކަން ފަތުރުވެރިންނަށް ދައްކާލުމަށް ވަނީ ހަމަޖެހިފައެވެ.
މި ރެލީއަށް މޯލްޑިވްސް ޕޮލިސް ސަރވިސްއާއި ކޯސްޓުގާރޑާއި ކަސްޓަމްސް އަދި ދިރާގުގެ ވަރަށް ބޮޑު އެހީތެރިކަމެއް ލިބެމުންދާކަން ލަގްޒަރީ ކަލެކްޝަނުން ފާހަގަކުރެއެވެ.