ރަޝިއާގައި މާދަމާ ފެށުމަށް ހަމަޖެހިފައިވާ، ޓޫރިޒަމްގެ އެންމެބޮޑު ފެއާކަމަށްވާ، މިޓް ފެއަރ ގައި މޯލްޑިވްސް މަރކެޓިންގ އެންޑް ޕަބްލިކް ކޯރޕަރޭޝަން، އާއިއެކު ރާއްޖޭގެ ޓޫރިޒަމް ސިނާއަތުގައި ހަރަކާތްތެރިވާ 19 ކުންފުންނަކުން ބައިވެރިވާނޭކަމަށް އެމްއެމްޕީއާރުސީން ހާމަކޮށްފިއެވެ.
މޮސްކޯ އިންޓަރނޭޝަނަލް، ޓްރެވަލް އެންޑް ޓޫރިޒަމް އެގްޒެބިޝަން، މިޓް ފެއަރ އާ ބެހޭގޮތުން އެމްއެމްޕީއާރުސީން ބުނީ، މިފަހަރުގެ ފެއާގައިވެސް ދިވެހިރާއްޖޭގެ ޓޫރިޒަމް ސިނާއަތުގައި ހަރަކާތްތެރިވާ، 19 ކުންފުންޏަކުން 42 ފަރާތަކުން ބައިވެރިވާނޭކަމަށެވެ.
މި ފެއާގައި މަންޒިލެއްގެ ގޮތުގައި ދިވެހިރާއްޖޭގެ ޓޫރިޒަމް ސިނާއަތް އިސްތިހާރުކުރުމަށް ވަނީ ހަމަޖެހިފައެވެ. މިގޮތުން ރަޝިއާގެ މާކެޓަށް ޚާއްސަކޮށްގެން ރާއްޖޭގެ ޓޫރިޒަމް ސިނާއަތް އިސްތިހާރުކުރުމަށް އެކިއެކި ކެމްޕެއިންތައް ކުރިއަށްގެންދާނެއެވެ.
މާދަމައިން ފެށިގެން މިމަހުގެ ސޯޅަވަނަ ދުވަހުގެ ނިޔަލަށް ކުރިއަށްދާ މި ފެއާގައި 97 ޤައުމަކުން 2056 ފަރާތަކުން ބައިވެރިވާނެއެވެ.
ރަޝިއާ އަކީ ދިވެހިރާއްޖޭގެ ޓޫރިޒަމް ސިނާއަތުގައި ވަރަށް ޚާއްޞަ މާކެޓެއްކަމަށް ޓޫރިޒަމް ސިނާއަތުގައި ހަރަކާތްތެރިވާ ކުންފުނިތަކުން ފާހަގަކުރެއެވެ. މިގޮތުން ރަޝިއާގެ ފަތުރުވެރިން ރާއްޖޭގައި ކުރާ ހޭދަ އެހެންޤައުމުތަކުގެ ފަތުރުވެރިންނަށްވުރެ ބޮޑުކަމަށް ޓޫރިޒަމް ސިނާއަތުގެ ވިޔަފާރީގައި ހަރަކާތްތެރިވާ ފަރާތްތަކުން ފާހަގަކުރެއެވެ.
ރަޝިއާ އަކީ ޔޫރަޕްގެ ޤައުމުތަކުގެ ތެރެއިން ރާއްޖެއަށް އެންމެގިނައިން ފަތުރުވެރިން ޒިޔާރަތްކުރާ އެއް ޤައުމު. މިދިޔަ އަހަރު ރަޝިއާއިން ވަނީ ދިވެހިރާއްޖެއަށް 46،522 ފަތުރުވެރިން ޒިޔާރަތްކޮށްފައެވެ. މިއީ 2016 ވަނަ އަހަރު ދިވެހިރާއްޖެއަށް ޒިޔާރަތްކުރި ފަތުރުވެރިންގެ 4 އިންސައްތައެވެ.