ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އެއް އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފި.
އެކޯޓުން މިގޮތަށް ހުކުމްކުރީ ހދ.ހޮނޑައިދޫގައި ބަނގުރާ ބޭނުންކުރި ކަމަށް ތުހުމަތު ކުރެވިގެން ކުޑަކަމުދާތަކެތި ދިނުމަށް ފުލުހުން އެދުމުން އެކަމަށް އިންކާރުކުރެއްވި މައްސަލާގައެވެ. މި މައްސަލާގައި ހެކިބަސް ނަގާ ހުލާސާ ބަޔާން އިއްވާ ހުކުމްވެސް ކޮށްފައިވަނީ މިއަދުއެވެ.
މިމައްސަލާގައި ކްރިމިނަލް ކޯޓުން އިއްވި ހުކުމްގައި ބުނެފައިވަނީ ކުޑަކަމުދާ ތަކެތި ދިނުމަށް ޖާބިރު އިންކާރުކުރިކަން ހެކިންގެ ހެކިބަހުން ޝަރީއަތަށް ސާބިތުވާ ކަމަށެވެ. އަދި ހެކިންގެ ގޮތުގައި ހެކިބަސް ދިން މީހުންނަކީ ހޮޑައިދޫން ޖާބިރު ހައްޔަރުކުރިއިރު އޭނާއަށް އަނިޔާކުރި މީހުން ކަމަށް ޖާބިރު ބުނިނަމަވެސް އެކަން ޝަރީއަތަށް ސާބިތުކޮށްދެވިފައި ނުވާ ކަމަށްވެސް ކްރިމިނަލް ކޯޓްގެ ހުކުމްގައިވެއެވެ.
ކުޑަކަމުދާ ތަކެތި ދިނުމަށް ޖާބިރު އިންކާރުކުރެއްވި މައްސަލާގައި އެއް އަހަރަށް ޖަލަށް ލުމަށް ކްރިމިނަލް ކޯޓުން މިއަދު ހުކުމްކުރިއިރު އަންނަ މަހު ބާއްވާ ރައްޔިތުންގ މަޖިލީހުގެ އިންތިހާބްގައި އެމްޑީޕީގެ ފަރާތުން ކާށިދޫ ދާއިރާއަށް ޖާބިރު ވަނީ ކުރިމަތިލައްވާފައެވެ.
ގާނޫނޫ އަސާސީ ބުނާގޮތުން ރައްޔިތުން މަޖިލީހުގެ މެމްބަރުކަމަށް ކުރިމަތިލެވޭނީ 12 މަސްދުވަހަށްވުރެ ދިގު މުއްދަތެއްގެ ޖިނާއީ ހުކުމް ތަންފީޒުކުރަމުން ނުދާ މީހުންނަށެވެ. ނުވަތަ އެފަދަ ހުކުމެއް ތަންފީޒުކުރިތާ ނުވަތަ މައާފް ލިބުނުތާ ތިން އަހަރުވެފައިވާ މީހަކަށެވެ.