ރާއްޖެ އައުމަށް ބުކިން ހައްދާފައިވާ ފަރާތްތަކުގެ ބުކިންތައް، ސްވައިން ފްލޫގެ ސަބަބުން ކެންސަލްކުރުމުގެ މައްސަލަ ކަންބޮޑުވާވަރަށް އިތުރުވަމުން ނުދާކަމަށް ޓްރެވަލް އޭޖެންޓުން ބުނެފިއެވެ.
ޕީއެސްއެމް ނިއުސްއަށް މަޢުލޫމާތު ޙިއްޞާކުރަމުން ބައެއް ޓްރެވަލް އޭޖެންޓުން ބުނީ، އެހެން އަހަރުތަކާ ޚިލާފަށް މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވަމުން އަންނަކަމަށް ފާހަގަކުރެވޭކަމަށެވެ.
މިކަމާ ބެހޭގޮތުން ޕީއެސްއެމަށް މަޢުލޫމާތު ޙިއްޞާކުރަމުން ރާއްޖޭގެ އެންމެބޮޑު އެއް ޓްރެވަލް ކުންފުނި އިނަ މޯލްޑިވްސްއިން ބުނީ، ރާއްޖޭގައި ސްވައިންފްލޫ ފެތުރެމުން ދިޔަނަމަވެސް އެކަމުގެ ބިރުވެރިކަން ރާއްޖެއަށް ޒިޔާރަތްކުރާ ފަތުރުވެރިންނަށް ނެތްކަމަށެވެ. މިގޮތުން ރާއްޖޭގެ ޓޫރިޒަމް ސިނާޢަތް ބިނާވެފައިވާގޮތުގެ މަޢުލޫމާތު ބުކިން ހައްދާ ފަރާތްތަކާ ޙިއްޞާކުރަމުން އަންނަކަމަށެވެ. މިދުވަސްވަރު އެކްސްކާޝަނަށް މާލެއަށާއި، އަތޮޅުތެރޭގެ ރަށްތަކަށް ޒިޔާރަތްކުރާ ފަތުރުވެރިންގެ އަދަދު ދަށްވިނަމަވެސް ރާއްޖެ އަންނަ ފަތުރުވެރިންގެ އަދަދު ދަށަށް ނުދާކަމަށް އިނަ މޯލްޑިވްސްއިން ވަނީ ފާހަގަކޮށްފައެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތަކަށް ބަލާއިރު، މިއަހަރުގެ ޖެނުއަރީމަހު ދިވެހިރާއްޖެއަށް، އެއްސަތޭކަ ފަންސަވީސްހާހަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، ސޯޅަ އިންސައްތައިގެ އިތުރުވުމެއްކަން ފާހަގަކޮށްލެވެއެވެ.