ބައިނަލްއަޤްވާމި ބްރޭންޑެއް ކަމަށްވާ 'ބަރިސްތާ' އިން ރާއްޖޭގައި ކޮފީ ޝޮޕެއް ހުޅުވައިފިއެވެ. ބަރިސްތާ ކޮފީ ޝޮޕް ހުޅުއްވައިދެއްވީ ހެލްތު މިނިސްޓަރ އަބުދުﷲ ނާޒިމް އިބްރާހިމެވެ.
ބަރިސްތާއިން ރާއްޖޭގައި ފުރަތަމަ ހުޅުވި ކޮފީ ޝޮޕް ހުޅުވުމަށް ވަނީ ޚާއްޞަ ހަފްލާއެއް ބާވާފައެވެ. މި ހަފްލާގައި ބަރިސްތާ ކުންފުނީގެ ޗެއަރމަން ސަންޖޭ ޗަބްރާއާއި ދައުލަތުގެ އިސްވެރިންނާ، މަޖިލީހުގެ ބައެއް މެމްބަރުން ބައިވެރިވެވަޑައިގެންފައިވެއެވެ. img:http://s2.psmnews.mv/images/660x400/14903860866731.jpg|މާލޭގައި ހުޅުވި ބަރިސްތާ ކެފޭ- ފޮޓޯ: ޕީއެސްއެމް
ބަރިސްތާއިން މާލޭގައި ހުޅުވި ކެފޭ ހުޅުވާފައިވަނީ އެމްޕީއެލް ކައިރީގައި ބޮޑުތަކުރުފާނު މަގުގައެވެ.
އިންޑިއާގެ ކުންފުންޏެއް ކަމަށްވާ ބަރިސްތާއިން އަންނަނީ މި ސަރަހައްދުގެ 5 ޤައުމެއްގައި ސަތޭކަ ނުވަދިހައަށްވުރެއް ގިނަ ކެފޭ ހިންގަމުންނެވެ. އަދި މިހާރު ބަރިސްތާގެ މިސްރާބު ހުރީ މެދު އިރުމަތީގެ ޤައުމުތަކުގައި އެކުންފުނީގެ ކެފޭތައް ހުޅުވުމަށްކަމަށް އެކުންފުނިން ބުނެއެވެ.
ބަރިސްތާ ކެފޭ ހުޅުވުމަށް ބޭއްވި ހަފްލާ ޝަރަފްވެރިކޮށްދެއްވާ ހެލްތު މިނިސްޓަރ އަބްދުﷲ ނާޒިމް އިބްރާހިމް ދެއްކެވި ވާހަކަފުޅުގައި މިފަދަ ބައިނަލްއަޤްވާމީ ބުރޭންޑުތައް ރާއްޖެ އައުމަކީ ތަރައްޤީގެ ގޮތުން އިތުރު ކުރިއެރުންތައް ލިބިގެންދާނެ ކަމެއް ކަމަށެވެ. އަދި ދިވެހި ޒުވާނުންނަށްވެސް މީގެ ސަބަބުން ގިނަ ފައިދާތަކެއް ކުރާނެކަން މިނިސްޓަރ ފާހަގަކުރެއްވިއެވެ.
img:http://s4.psmnews.mv/images/660x400/14903860709481.jpg|ހެލްތް މިނިސްޓަރ މިނިސްޓަރ އަބްދުﷲ ނާޒިމް އިބްރާހިމް، ބަރިސްތާ ކެފޭ ހުޅުވުމުގެ ރަސްމިއްޔާތުގައި ވާހަކަފުޅުދައްކަވަނި- ފޮޓޯ: ޕީއެސްއެމް
"ދިވެހި ޒުވާނުންނަކީ ވަގުތުތައް ރަގަޅު ގޮތުގައި ހިފުމަށްޓަކައި ކޮފީ މޭޒުތަކުގެ ބޭނުން ނުހަނު ގިނައިން ހިފާބައެއް، މިފަދަ އިންޓަރނޭޝަނަލް ބުރޭންޑުތަކުގެ ރެސްޓޯރެންޓުތަކާއި ކެފޭތައް ހުޅުވި މިފަދަ މާހައުލު މިފަދަ ފުރުޞަތުތައް މާލޭގައި އިތުރުވެގެން ދިޔުމަކީ ދިވެހި ޒުވާނުންގެ ވަގުތުތައް ހެޔޮގޮތުގައި ބޭނުންކުރުމަށްވެސް ލިބޭނެ ފުރުޞަތެއް" މިނިސްޓަރ ނާޒިމް ވިދާޅުވިއެވެ.
ބަރިސްތާއިން ރާއްޖޭގައި އިތުރު ކެފޭތައް ހުޅުވާނެ ކަމަށް އުންމީދު ކުރައްވާކަމަށް ވިދާޅުވެ، މިނިސްޓަރ ވަނީ މީގެ އިތުރުންވެސް އެހެން ދާއިރާތަކުގައި އެކުންފުނިން އިންވެސްޓުކުރުމަށް އެދިވަޑައިގެންފައެވެ.
މި ހަފްލާގައި ވާހަކަ ދައްކަވަމުން ބަރިސްތާ ކުންފުނީގެ ޗެއަރމަން ސަންޖޭ ޗަބްރާ ވިދާޅުވީ އެކުންފުނީގެ ރާއްޖޭގެ ޕާޓުނަރ ކުންފުނި، ބަރިސްތާ މޯލްޑިވްސްއަކީ ދިވެހި ޒުވާނުންތަކެއްގެ މައްޗަށް އެކުލެވޭ ކުންފުންޏެއް ކަމަށެވެ. ޗަބްރާވަނީ ބަރިސްތާ މޯލްޑިވްސްއަށް ތަޢުރީފްކުރައްވާފައެވެ.
img:http://s2.psmnews.mv/images/660x400/14903862074725.jpg|ބަރިސްތާ ކުންފުނީގެ ޗެއަރމަން ސަންޖޭ ޗަބްރާ، ބަރިސްތާ ކެފޭ ހުޅުވުމުގެ ރަސްމިއްޔާތުގައި ވާހަކަފުޅުދައްކަވަނި- ފޮޓޯ: ޕީއެސްއެމް
ޗަބްރާ ވިދާޅުވީ ބަރިސްތާގެ މާލޭގެ ކެފޭއިން ދިވެހިންނާ ގުޅުންހުރި ކެއުމުގެ އެކި ބާވަތްތައް ލިބެން ހުންނާނެ ކަމަށާއި، އެގޮތުން ދިވެހި ކަނޑުމަހުން އުފައްދާ ކެއުމުގެ އެކި ބާވަތްތައްވެސް ބަރިސްތާ ކެފޭއިން ލިބޭނެކަމަށެވެ.
" އެ ޤައުމެއްގައި ހިންގާ ބަރިސްތާއަކުން އެޤައުމެއްގެ މީހުންނަށް ކަމުދާނެ ކާއެއްޗެހި ލިބެން ހުންނާނެ ގޮތަކަށް މެނޫ ތައްޔާރުކުރުމަށް ބަރިސްތާއިން ޙާއްޞަ އިސްކެމެއް ދޭ. އެގޮތުން ބަރިސްތާގެ މާލޭގެ ކެފޭއިންވެސް ދިވެހިންނަށް އަމާޒްކޮށްގެން ކަނޑުމަހުގެ އުފެއްދުންތައް ލިބެން ހުންނާނެ،" ޗަބްރާ ވިދާޅުވިއެވެ.
img:http://s2.psmnews.mv/images/660x400/14903860087645.jpg|މާލޭގައި ހުޅުވި ބަރިސްތާ ކެފޭ- ފޮޓޯ: ޕީއެސްއެމް
ބަރިސްތާ ކޮފީ ޝޮޕް ހިންގާ އިންޑިއާގެ ކުންފުނިން، އަންނަނީ ހޮޓާތަކާއި، އަދިވެސް އިތުރު ބުރޭންޑުތަކުގެ ރެސްޓޯރެންޓުތައް މިސަރަހައްދުގެ ޤައުމުތަކުގައި ހިންގަމުންނެވެ. އެކުންފުނިން ވަނީ ރާއްޖޭގައި އެކުންފުނީގެ ވިޔަފާރި އިތުރަށް ފުޅާކުރުމުގެ ޝައުގުވެރިކަންވެސް ފާޅުކޮށްފައެވެ.