ރާއްޖޭގައި ރަޖިސްޓްރީކޮށްފައިވާ ކުންފުނިތަކުގެ ތެރެއިން އަހަރީފީއާއި ޖޫރިމަނާ ފީތައް ނުދައްކާ ކުންފުނިތަކަށް ފައިސާ ދެއްކުމަށް މުއްދަތެއް ދިނުމަށްފަހު، އެ ފައިސާ ދައްކާ ޚަލާސް ނުކުރާ ކުންފުނިތައް އުވާލުމަށް، ކޯޓަށް މައްސަލަ ހުށަހެޅުމަށް އިކޮނޮމިކް މިނިސްޓްރީން ނިންމަވައިފިއެވެ.
އިކޮނޮމިކް މިނިސްޓްރީން މިހާރުވަނީ އެފަދަ ހަހާސް ތިންސަތޭކައަށްވުރެ ގިނަ ކުންފުންޏެއްގެ މަޢުލޫމާތު ޢާއްމުކުރައްވާފައެވެ.
މިކަމާއިގުޅޭގޮތުން މަޢުލޫމާތުދެއްވަމުން ރެޖިސްޓްރަރ އޮފް ކޮމްޕެނީސް މަރިޔަމް ވިސާމް ވިދާޅުވީ، ލިސްޓުގައި ހިމެނޭ ކުންފުންޏެއްގެ ނަން ކުންފުނިތަކުގެ، ދަފްތަރުން އުނިކުރުމަށް ބޭނުން ނުވާނަމަ، އެކުންފުންޏަކުން ދައްކަންޖެހޭ އަހަރީފީ އާއި ޖޫރިމަނާ ފައިސާ ދައްކައި ޚަލާޞްކުރުމަށްފަހު، އަންނަ މަހުގެ 2 ވަނަ ދުވަހުގެ ކުރިން، ފައިސާ ދެއްކި ކަމުގެ ރަސީދު އިކޮނޮމިކް މިނިސްޓްރީއަށް ހުށަހަޅަން ވާނެ ކަމަށެވެ.
ލިސްޓުގައި ހިމަނާފައިވާ އެއްވެސް ކުންފުންޏެއްގެ މައްޗަށް، އެއްވެސް ދަރަންޏެއް ނުވަތަ ދަޢުވާއެއް އޮތްނަމަ، ނުވަތަ އެއިން އެއްވެސް ކުންފުންޏަކުން، އެއްވެސް ފަރާތަކަށް ދައްކަންޖެހޭ ދަރަންޏެއް ނުވަތަ އެއިން އެއްވެސް ކުންފުންޏެއްގެ މައްޗައް އެއްވެސް ފަރާތަކުން ހުށަހަޅާ ދަޢުވާއެއް އޮތްނަމަ، ކަމާގުޅޭ ތަފްޞީލު، އޭޕްރީލް މަހުގެ 2 ވަނަ ދުވަހުގެ ކުރިން އެކަން ހުށަހެޅުއްވުމަށް ވެސް އިކޮނޮމިކް މިނިސްޓްރީން ވަނީ އަންގަވާފައެވެ. އަދި މި މުއްދަތުގެ ތެރޭގައި އެތަފްޞީލު ހުށަހަޅާފައިނުވާނަމަ، ދަރަންޏެއް ނުވަތަ ދަޢުވާއެއް ނެތީކަމުގައި ބަލާނެކަމަށް ވެސް އިކޮނޮމިކް މިނިސްޓްރީން ވިދާޅުވެއެވެ.