ހުސްވި ހަފްތާގެ ތެރޭގައި އިކޮނޮމިކް މިނިސްޓަރ މުޙައްމަދު ސަޢީދު އިނގިރޭސިވިލާތަށް ކުރެއްވި ދަތުރުފުޅުގައި ރާއްޖެއާއި އިނގިރޭސިވިލާތާ ދެމެދުއޮތް ވިޔަފާރީގެ ގުޅުން އިތުރަށް ބަދަހި ކުރުމާގުޅޭ ގޮތުން އިނގިރޭސި ސަރުކާރުގެ ބައެއް މިނިސްޓަރުންނާއި، އެ ޤައުމުގެ ޕާރލިމެންޓްގެ މެންބަރުންނާއި، ބިޒްނަސް ލީޑަރުންނާއެކު މަޝްވަރާކުރައްވާފައިވާ ކަމަށް އިކޮނޮމިކް މިނިސްޓްރީން ހާމަކުރައްވައިފިއެވެ.
މި މަޝްވަރާތަކުގައި، ދެ ޤައުމުގެ ދެމެދުގައި މިހާރަށްވުރެ އިތުރަށް ވިޔަފާރި ކުރިއެރުވުމަށް، މިނިވަން ވިޔަފާރީގެ އެއްބަސްވުމެއް އެކުލަވާލުމަށް ދިވެހިރާއްޖެއިން ޝައުޤުވެރިވާކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ މުޙައްމަދު ސަޢީދު، މި މަހުގެ 22 އިން 24 އަށް އިނގިރޭސިވިލާތަށް، ކުރެއްވި ރަސްމީ ދަތުރުފުޅާބެހޭގޮތުން އިކޮނޮމިކް މިނިސްޓްރީން ނެރުއްވާފައިވާ ނޫސްބަޔާނުގައިވާގޮތުން، އިނގިރޭސި ސަރުކާރުގެ ބައެއް މިނިސްޓަރުންނާއި، އެ ޤައުމުގެ ޕާރލަމެންޓްގެ މެންބަރުންނާއި، ބިޒްނަސް ލީޑަރުންނާއި މިނިސްޓަރ ސަޢީދު ވަނީ ބައްދަލުކުރައްވާފައެވެ. މި ބައްދަލްވުންތަކުގައި ރާއްޖޭގެ ވިޔަފާރި އިތުރަށް ޕްރޮމޯޓް ކުރުމާ ގުޅޭގޮތުންނާއި އިންވެސްޓްމަންޓްގެ ދާއިރާއިން ރާއްޖޭގައި ހުރި ފުރުޞަތުތައް އެފަރާތްތަކާއި ވަނީ ޙިއްސާކުރައްވާފައެވެ. މީގެއިތުރުން ކޮމާރސް އާއި އިންވެސްޓްމަންޓްގެ ދާއިރާއިން އިތުރަށް ދެޤައުމުގެ ގުޅުން ބަދަހި ކުރުމާބެހޭ ގޮތުންވެސް މިނިސްޓަރ ސަޢީދު ވަނީ މަޝްވަރާ ކުރައްވާފައެވެ.
މި މަޝްވަރާތަކުގައި، ދެ ޤައުމުގެ ދެމެދުގައި އިތުރަށް ވިޔަފާރި ކުރިއެރުވުމާއި ބެހޭ ގޮތުންނާއި، މިނިވަން ވިޔަފާރީގެ އެއްބަސްވުމެއް އެކުލަވާލުމާބެހޭގޮތުން، ރާއްޖެއިން ޝައުޤުވެރިކަން ފާޅުކޮށްފައިވާކަން ވަނީ ފާހަގަ ކުރައްވާފައެވެ.