މިއަހަރުގެ ފުރަތަމަ ކުއާޓަރ ނިމުނުއިރު ޓޫރިޒަމް ސިނާޢަތުން، ރާއްޖޭގެ އިޤްތިޞާދަށް 790 މިލިއަނަށްވުރެ ގިނަ ޑޮލަރު ލިބިއްޖެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 53.6 މިލިއަން ޑޮލަރުގެ އިތުރުވުމެކެވެ.
މިއަހަރުގެ ފުރަތަމަ ކުއާޓަރގައި ޓޫރިޒަމް ސިނާއަތުން ރާއްޖޭގެ އިޤްތިޞާދަށް ލިބުނު، 790.8 މިލިއަން ޑޮލަރުގެ ތެރެއިން ޓީޖީއެސްޓީ އުނިކުރުމަށްފަހު ޓޫރިޒަމް ސިނާއަތުގެ ވިޔަފާރިތަކަށް ވަނީ، 706 މިލިއަނަށްވުރެ ގިނަ ޑޮލަރު ލިބިފައެވެ. ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސް ހިސާބުތަކުން ދައްކާގޮތުގައި، މިއަހަރުގެ ފުރަތަމަ ތިން މަސްދުވަހުގެ ތެރޭގައި ޓޫރިޒަމް ސިނާއަތުގެ ޖީއެސްޓީގެ ގޮތުގައި ދައުލަތަށް 84.7 މިލިއަން ޑޮލަރު ލިބިފައިވެއެވެ.
މިއަހަރުގެ ފުރަތަމަ ކުއާޓަރގައި ޓޫރިޒަމް ސިނާއަތުން، ރާއްޖޭގެ އިޤްތިޞާދަށް ލިބުނު އާމްދަނީ ހިސާބުކުރުމުގައި ބަލާފައިވަނީ، އެމުއްދަތުގެ ތެރޭގައި ޓޫރިޒަމް ސިނާއަތުން ދައުލަތަށް ލިބުނު ޖީއެސްޓީންނެވެ. މިއަހަރުގެ މިހާތަނަށް ޓޫރިޒަމް ސިނާއަތުން ރާއްޖޭގެ އިޤްތިޞާދަށް 790 މިލިއަނަށްވުރެ ގިނަ ޑޮލަރު ލިބިފައިވާއިރު، މިއަހަރުގެ ކުރިއަށްއޮތްތަނުގައި ޓޫރިޒަމް ސިނާއަތުން ރާއްޖޭގެ އިޤްތިޞާދަށް ލިބޭ އާމްދަނީ އިތުރުވާނެކަމަށް ބެލެވެއެވެ.
ސަބަބަކީ ރާއްޖޭގެ ޓޫރިޒަމް ސިނާއަތް ފުޅާކުރެއްވުމަށް ޓޫރިޒަމް ސިނާއަތުންނާއި، ސަރުކާރުން ކުރައްވަމުންގެންދަވާ މަސައްކަތްތަކެވެ. މިގޮތުން މިއަހަރުގެ ތެރޭގައި އިތުރު ރިސޯޓްތައް ހުޅުވި، ބައިނަލްއަޤްވާމީ އެކި މަންޒިލްތަކުން ރާއްޖެއަށް ބާއްވާ ފްލައިޓްތަކުގެ އަދަދު އިތުރުވެގެންދާނެކަމަށް ސަރުކާރުން ވަނީ ވިދާޅުވެފައެވެ.