ޓެކްސްއަށް ކެނޑުމަށްފަހު 1.02 ބިލިއަން ރުފިޔާގެ ފައިދާއެއް ބޭންކް އޮފް މޯލްޑިވްސްއަށް ލިބިއްޖެއެވެ.
ބޭންކް އޮފް މޯލްޑިވްސްއަށް މިދިޔަ އަހަރު ލިބިފައިވާ ފައިދާގެ މި އަދަދަކީ، ދެހާސް ފަނަރަވަނަ އަހަރާ އަޅާބަލާއިރު، ފަސްދޮޅަސް އެކެއް އިންސައްތަ އިތުރު އަދަދެކެވެ. މި ނަތީޖާއާއެކު ބޭންކުން ވަނީ، ޙިއްޞާގެ ފައިދާގެ ގޮތުގައި ބެހުމަށް ޖުމްލަ ސަތޭކަ އަށް މިލިއަން ރުފިޔާ ހުށަހަޅާފައެވެ. މިއީ ހިއްސާއަކަށް ވިހި ރުފިޔާއެވެ. މިޢަދަދަކީ، ދެހާސް ފަނަރަވަނަ އަހަރާ އަޅާބަލާއިރު އަށާރަ އިންސައްތަ އިތުރު ޢަދަދެކެވެ.
ބޭންކް އޮފް މޯލްޑިވްސްގެ 2016 ވަނަ އަހަރުގެ އޮޑިޓްކޮށްފައިވާ މާލީ ބަޔާނާއި އަހަރީ ރިޕޯޓު ދައްކާގޮތުން ވިޔަފާރީގެ މައިގަނޑު ހުރިހާ ދާއިރާއަކުންވެސް ހަރުދަނާ ކުރިއެރުންތަކެއް އެ ބޭންކުންވަނީ ހޯދާފައެވެ. އަދި ދެހާސް ސޯޅަވަނަ އަހަރަކީ، ބީއެމްއެލްއަށް "އެންމެ ކާމިޔާބު" އަހަރުގެ ގޮތުގައި އެ ބޭންކުންވަނީ ސިފަކޮށްފައެވެ. އަދި މުޅި ރާއްޖެއަށް އިންވެސްޓްކުރުމަށް ހިންގާ ޕްރޮގްރާމް ކުރިޔަށް ގެންދާނެކަމުގެ ޔަޤީންކަންވެސް އެ ބޭންކުންވަނީ ދީފައެވެ.
އަހަރީ ރިޕޯޓުން ފާހަގަކޮށްލެވޭ ކަންތައްތަކަށް ބާލާލާއިރު، ލޯނު ދޫކޮށްފައިވާ ނިސްބަތް އިތުރުވުމާއެކު އުފެއްދުންތެރި ނޫން ލޯނުގެ ނިސްބަތް ވަނީ ނުވައެއް އިންސައްތައަށް ދަށްކުރެވިފައެވެ. ބޭންކުގެ ރައުސުލްމާލާއި ލިކުއިޑިޓީ ރޭޝިއޯ ވަނީ، ޤާނޫނުން ލާޒިމްކުރާ ވަރަށްވުރެ މަތީ މިންވަރެއްގައި ހިފަހެއްޓިފައި ކަމަށް އެ ބޭންކުން ހާމަކުރެއެވެ. ބީއެމްއެލްއަށް ލިބުނު ކުރިއެރުން ފާހަގަކުރައްވާ، އެ ބޭންކުގެ ސީއީއޯ އަދި މެނޭޖިން ޑިރެކްޓަރ އެންޑްރޫ ހީލީ ވިދާޅުވީ، މި އަހަރުގެ ތެރޭގައި އެ ބޭންކުން ގިނަ ބްރާންޗްތަކާއި، ސެލްފް ސަރވިސް ބޭންކިންގ ސެންޓަރުތަކާއި ބިޒްނަސް ސެންޓަރތަކެއް ހުޅުވުމަށް ރާވާފައިވާކަމަށެވެ. މިކަމުގެ ފައިދާ ރާއްޖޭގެ ތަފާތު 22 ރަށަކަށް ލިބިގެންދާނެ ކަމަށާއި ތަޢުލީމާއި ކުޅިވަރު އަދި ތިމާވެއްޓާ ގުޅޭ 10 ސީއެސްއާރު ޕްރޮޖެކްޓް އަލަށް ފަށާނެ ކަމަށެވެ. ބީ.އެމް.އެލްއިން މިހާރުވެސް ދަނީ، އެބޭންކަށް ލިބޭ ފައިދާ އަނބުރާ ދިވެހި މުޖުތަމަޢަށް އިންވެސްޓްކުރުމުގެ މަސައްކަތްތައް ކުރަމުންނެވެ. މިގޮތުން މިދިޔަ އަހަރު، ޚިދުމަތްތައް ފުޅާކުރުމަށާއި، އުމްރާނީ ތަރައްޤީއަށާއި ސީއެސްއާރު ހަރަކާތްތަކަށް 150 މިލިއަން ރުފިޔާ ވަނީ އިންވެސްޓްކޮށްފައެވެ. ޚާއްޞަކޮށް 4 ބްރާންޗާއި 10 ސެލްފް ސަރވިސް ބޭންކިން ސެންޓަރު އަލަށް ޤާއިމްކޮށްފައިވާކަން ފާހަގަކޮށްލެވެއެވެ.