ފަތުރުވެރިކަމުގެ ދާއިރާގެ އޮސްކާގެ ގޮތުގައި ބެލެވޭ، ވޯލްޑް ޓްރެވަލް އެވޯޑްސްގެ އިންޑިއަން އޯޝަން ގާލާ ހަފްލާ ރާއްޖޭގެ ރިސޯޓެއްކަމަށްވާ ސަން އަކުއާ ވިލު ރީފްގައި ބޭއްވުމަށް ނިންމައިފިއެވެ.
މި އެވޯޑް ހަފްލާ ބޭއްވުމަށް ހަމަޖެހިފައިވަނީ އަންނަ ޖުލައިމަހުގެ އަށްވަނަ ދުވަހުއެވެ. މިއަހަރުގެ ވޯލްޑް ޓްރެވަލް އެވޯޑަށްވެސް ރާއްޖޭގެ އެކި ރިސޯޓްތަކާއި ފަތުރުވެރިކަމުގެ ޙިދުމަތްދޭ ބައެއް ތަންތަން ނޮމިނޭޓްވެފައިވެއެވެ. ރާއްޖެ ނޮމިނޭޓްވެފައިވާ އެވޯޑްތަކަށް ބަލާއިރު، އެންމެ މަޤްބޫލް މަންޒިލް އަދި އެންމެ މަޤްބޫލު ޑައިވް، ހަނީމޫން، އަދި ކްރޫޒް ޑެސްޓިނޭޝަން ހިމެނެއެވެ.
އޮންލައިންކޮށް ވޯޓް ދީގެންނާއި އަދި ޚާއްސަ ޖަޖުންގެ ޕެނަލަކުން މާރކްސްދީގެން ހޮވާ މި އެވޯޑަށް އޮންލައިންކޮށް ވޯޓް ދިނުމުގެ ފުރުޞަތު އަންނަ މަހުގެ ބާވީސްވަނަ ދުވަހުގެ ނިޔަލަށް ވަނީ ހުޅުވާލާފައެވެ. ވޯލްޑް ޓްރެވަލް އެވޯޑްސްގެ ގާލާ ހަފްލާތައް ދުނިޔޭގެ ހަތް ސަރަޙައްދެއްގައި ބާއްވާނެއެވެ. އެ ހަތް ސަރަޙައްދަކީ އިންޑިއަން އޯޝަން، އެފްރިކާ، މެދުއިރުމަތި، ޔޫރަޕް، ކެރީބިއަން އެންޑް ނޯތު އެމެރިކާ، ލެޓިން އެމެރިކާ، އޭޝިއާ އަދި އޮސްޓްރްލޭޝިއާއެވެ. އަދި މި ޞަރަޙައްދުތަކުން އެވޯޑު ހާސިލް ކުރާ ފަރާތްތައް ވާދަ ކުރާނީ ވޯލްޑް ޓްރެވަލް އެވޯޑްގެ ގްރޭންޑް ފިނާލޭއަށެވެ.
މި އަހަރުގެ ގްރޭންޑް ފިނާލޭ ހަފްލާ ބޭއްވުމަށް ހަމަޖެހިފައިވަނީ ޑިސެމްބަރުމަހުގެ ދިހަވަނަ ދުވަހު ވިއެޓްނާމުގައެވެ. މިދިޔަ އަހަރުގެ ވޯލްޑް ޓްރެވަލް އެވޯޑްސްގެ ގްރޭންޑް ފިނާލޭ ބާއްވާފައިވަނީ ރާއްޖޭގެ ސަން ސިޔާމް އިރުފުށީގައެވެ. އަދި ވޯލްޑް ޓްރެވަލް އެވޯޑްސްގެ އިންޑިއަން އޯޝަން ގާލާ ހަފްލާ ދެހާސް ތޭރަވަނަ އަހަރު ބާއްވާފައިވަނީ ރާއްޖޭގެ ޕެރެޑައިސް އައިލެންޑް ރިސޯޓްގައެވެ.