މެދުއިރުމަތީ ސަރަޙައްދުގައި ބާއްވާ އެންމެ ބޮޑު ޓްރެވަލް ފެއަރ "އެރޭބިއަން ޓްރެވަލް މާރކެޓް" އޭޓީއެމް، ގައި ރާއްޖެއިން ބައިވެރިވެއްޖެއެވެ.
މިއަދުން ފެށިގެން ހަތަރުދުވަހުގެ މުއްދަތަކަށް ދުބާއީގައި ކުރިއަށްދާ މިފެއަރގައި ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ ފަންސާސް ނުވަ ކުންފުންޏަކުން، ސަތޭކަ ފަންސަވީސް ފަރާތެއް ބައިވެރިވެއެވެ. މި ފެއަރގައި ރާއްޖެއިން ބައިވެރިވެފައިވާ ވަފްދުގައި އެންމެ އިސްކޮށް ހަރަކާތްތެރިވަނީ ޑެޕިއުޓީ މިނިސްޓަރ އޮފް ޓޫރިޒަމް ހުސެއިން ޟިރާރާއި، އެމް.އެމް.ޕީ.އާރު.ސީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދުއެވެ.
މިފެއަރގައި ރާއްޖޭގެ ސްޓޭންޑަށް 200 އަކަފޫޓުގެ ޖާގައެއް ލިބިފައިވާއިރު، މި ފެއަރގައި ރާއްޖެ އިޝްތިހާރުކުރުމަށް ތަފާތު ހަރަކާތްތައް ކުރިއަށް ގެންދިޔުމަށް އެމްއެމްޕީއާރުސީން ވަނީ ރާވާފައެވެ. އެގޮތުން ރާއްޖޭގެ ސްޓޭންޑުގައި ފޮޓޯ ނެގުމަށްފަހު ސޯޝަލް މީޑިއާގައި ޝެއަރކުރުމުން ހަދިޔާއެއް ދިނުމާއި، ވީއާރު ގިއަރއެއް ބޭނުންކޮށްގެން ކަނޑުއަޑީގެ ރީތިކަން ބަލާލުމުގެ ފުރުސަތުވެސް ރާއްޖޭގެ ސްޓޭންޑުން ލިބެން ހުންނާނެ ކަމަށް އެމްއެމްޕީއާރުސީން މައުލޫމާތުދެއެވެ.
މިއަހަރުގެ ފެއަރގައި އެންމެ އިސްކަމެއް ދީފައިވަނީ އެއަރލައިންތަކާއި ގުޅިގެން ރާއްޖެ އިޝްތިހާރުކުރުމަށް މަސައްކަތްކުރުން ކަމަށްވެސް އެމްއެމްޕީއާރުސީން ހާމަކުރެއެވެ. ޓޫރިޒަމް މިނިސްޓްރީގެ ތަފާސް ހިސާބްތައް ދައްކާގޮތުން މިއަހަރުގެ ފެބްއަރީމަހުގެ ނިޔަލަށް މެދުއިރުމަތީގެ ޤައުމުތަކުން ރާއްޖެއަށް ހަތްހާސް ތިންސަތޭކަ ފަންސާސް ފަތުރުވެރިން ޒިޔާރަތްކޮށްފައިވާ އިރު، މިއީ މިދިޔަ އަހަރުގެ އެ މުއްދަތާ އަޅާ ބަލާއިރު ތިނެއް ޕޮއިންޓު ނުވައެއް އިންސައްތަ އިތުރު އަދަދެކެވެ.