އިޓަލީއާ ރާއްޖެއާއި ދެމެދު ސީދާ ދަތުރުތައް ފެށުމަށް އިޓަލީގެ ޤައުމީ އެއަރލައިން އަލްއިޓާލިއާއިން ނިންމައިފިއެވެ.
އަންނަ އޮކްޓޫބަރުގެމަހުގެ އެއްތިރީސްވަނަ ދުވަހު ފެށުމަށް ހަމަޖެހިފައިވާ މި ދަތުރުތައް ކުރުމަށް ހަމަޖެހިވެފައިވަނީ އިޓަލީގެ ރޯމްއާއި ރާއްޖެއާ ދެމެދުއެވެ. އަލްއިޓާލިއާ އެއަރލައިންސްއާ ހަވާލާދީ ދަތުރުފަތުރާ ގުޅޭ ޙަބަރުތައް ގެނެސްދޭ ވެބްސައިޓެއް ކަމަށްވާ، ޓްރެވަލް ޑެއިލީ ނިއުސްގައިވާ އެގޮތުން އަލްއިޓާލިއާއިން ރާއްޖެއަށް ހަފްތާއަކު ތިން ދަތުރުކުރާނެއެވެ. މި ދަތުރުތައް ރާއްޖެއަށް ކުރުމަށް ހަމަޖެހިފައިވަނީ އަންގާރަ، ހުކުރު އަދި ހޮނިހިރު ދުވަހުއެވެ.
ރާއްޖެއަށް އުދުހުމަށް އަލްއިޓާލިއާއިން ބޭނުންކުރުމަށް ހަމަޖެހިފައިވަނީ ދުއިސައްތަ ފަންސާސް ގޮނޑީގެ އޭތްރީ ތަރޓީ މަރުކައިގެ ބޯޓެކެވެ. އަލްއިޓާލިއާއިން ބުނެފައިވަނީ އެ އެއަރލައިންގެ ދަތުރުތައް ރާއްޖެއަށް ފެށުމަށް ނިންމީ ކޮންމެ އަހަރެއްގެވެސް ފިނި މޫސުމަކީ ރާއްޖެއަށް އެޤައުމުން ގިނަ އަދަދަކަށް މީހުން ދަތުރުކުރާ ދުވަސްވަރެއް ކަމަށް ފާހަގަކުރެވޭތީ ކަމަށެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން، ރާއްޖެއަށް ހަތަރުވަނަ އަށް އެންމެ ގިނައިން ފަތުރުވެރިން ޒިޔާރަތްކުރާ ޤައުމަކީ އިޓަލީއެވެ. އެގޮތުން ހުސްވި އަހަރު އިޓަލީން ރާއްޖެއަށް ހަތްދިހަ އެއްހާހަށްވުރެ ގިނަ ފަތުރުވެރިން އައިސްފައިވެއެވެ. މިއީ ދެހާސް ފަނަރަވަނަ އަހަރާ އަޅާ ބަލާއިރު އަށެއް ޕޮއިންޓް ފަހެއް އިންސައްތަ އިތުރު އަދަދެކެވެ.