އިންޑިއާގެ ފަތުރުވެރިންގެ މެދުގައި އެންމެ މަޤްބޫލް ބައިނަލްއަޤްވާމީ ޖަޒީރާ މަންޒިލްގެ އެވޯޑް ރާއްޖެއަށް ލިބިއްޖެއެވެ.
އިންޑިއާގެ އެންމެ ކުރިއަރާފައިވާ ޓްރެވަލް މެގަޒިން، އައުޓްލުކް ޓްރެވަލަރ އިން އަހަރަކު އެއްފަހަރު ބާއްވާ އައުޓް ލުކް ޓްރެވެލަރ އެވޯޑް ހަފްލާގައި މިއަހަރު 28 ކެޓަގަރީއަކުން އެވޯޑްތައް ދީފައިވެއެވެ. މިއަހަރުގެ އެވޯޑް ހަފްލާ ބާއްވާފައިވަނީ އިންޑިއާގެ ވެރިރަށް ނިއުދިއްލީގައެވެ.
ޤައުމުން ބޭރުގައި ޗުއްޓީ ހޭދަކުރުމަށް ދަތުރުކުރާ އިންޑިއާ މީހުންގެ ޢަދަދު އަންނަނީ އަހަރަކަށްވުރެ އަހަރެއް އިތުރުވަމުންނެވެ. އެގޮތުން ދެހާސް ފަނަރަވަނަ އަހަރު 19.4 މިލިއަން މީހުން ޤައުމުން ބޭރުގައި ޗުއްޓީ ހޭދަކޮށްފައިވެއެވެ. އިންޑިއާ ފަތުރުވެރިންގެ މެދުގައި ރާއްޖެއަކީ މަޤްބޫލް މަންޒިލެކެވެ.
އެގޮތުން މިދިޔަ އަހަރު ރާއްޖެއަށް އިންޑިއާއިން ޒިޔާރަތްކުރި ފަތުރުވެރިންގެ އަދަދު ވަނީ އޭގެ ކުރީ އަހަރާ އަޅާ ބަލާއިރު، 27.9 އިންސައްތަ އިތުރުވެފައެވެ.