އިޓަރނެޓް ބޭންކިންގް މެދުވެރިކޮށް އެކައުންޓް އަދި ކްރެޑިޓް ކާޑު ސްޓޭޓްމަންޓް ޑައުންލޯޑްކުރެވޭ، ސަލާމަތީގޮތުން ރައްކާތެރި އިތުރު ފީޗަރތަކާއެކު އިންޓަނެޓް ބޭންކިންގެ އައު ޕްލެޓްފޯމެއް ތަޢާރަފްކުރުމަށް ބޭންކް އޮފް މޯލްޑިވްސްއިން ނިންމައިފިއެވެ.
"ބީއެމްއެލް އިންޓަނެޓް ބޭންކިންގ"ގެ އައު ޕްލެޓްފޯމް ލައިވްކުރުމަށް ހަމަޖެހިފައިވަނީ މިރޭ ދަންވަރުއެވެ. އަލަށް ތަޢާރަފްކުރާ ޚިދުމަތްތަކުގެ ތެރޭގައި، އެކައުންޓުން ކުރާ މުޢާމަލާތްތައް ބެލޭނެ ގޮތްތަކަށް އިތުރު ފުރިހަމަކަމެއް ގެނައުމާއި، ޓްރާންސްފަރ އަދި ފައިސާ ދެއްކުމުގައި ފަސޭހަވާނެކަމަށާއި، ކުރިއަށްވުރެ އަވަހަށް ލޮގިންވެ އަދި ޕާސްވޯޑް ރިސެޓްކުރެވޭނެ ކަމަށާއި، ބީއެމްއެލް ލެޓަރ ހެޑުގައި އެކައުންޓް އަދި ކެރެޑިޓް ކާޑު ސްޓޭޓްމަންޓް ޑައުންލޯޑްކުރެވުން އަދި އިންޓަނޭޝަނަލް ޓްރާންސްފަރތަކަށް ބޭނުންވާނެ ލިޔެކިޔުން އަޕްލޯޑްކުރެވޭނެ ނިޒާމެއް ހިމެނުމުގެ އިތުރުން އެންމެ ފަހުގެ އެންޓި ފްރޯޑް އަދި އެހެނިހެން ސަލާމަތީ ފިޔަވަޅުތައް ހިމެނޭނެ ކަމަށް ބީއެމްއެލުން ހާމަކުރެއެވެ.
މިކަމާ ގުޅޭގޮތުން ވާހަކަދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ އެންޑްރޫ ހީލީ ވިދާޅުވީ މިތަޢާރަފްކުރާ ޕްލެޓްފޯމަކީ ކަސްޓަމަރުން އެބޭންކާއި ޙިއްސާކުރާ ހިޔާލުތަކާ އެއްގޮތަށް ގެނެވުނު ރަނގަޅު ބަދަލުތަކެއް ކަމަށެވެ.
ނޫސްވެރިންގެ ބައްދަލުވުމުގައި ބީއެމްއެލްގެ ޑެޕިއުޓީ ސީއީއޯ އަދި ޑިރެކްޓަރ އޮފް އޮޕަރޭޝަންސް މުޙައްމަދު ޝަރީފް ވިދާޅުވީ އިންޓަނެޓް ބޭންކިންގެ އައު ޕްލެޓްފޯމުގެ ސަބަބުން ގޭގައި ތިބެގެން ކަސްޓަމަރުންނަށް އެބޭންކުގެ ގިނަ ޚިދުމަތްތަކެއް ހޯދޭނެ ކަމަށެވެ.
އިންޓަރނެޓް ބޭންކިންގ އަދި މޮބައިލް ބޭންކިންގ އެޕް ބޭނުންކުރާ ކަސްޓަމަރުންގެ އަދަދު ދަނީ އިތުރުވަމުންނެވެ. އެގޮތުން ބޭންކުން ކުރާ ކޮންމެ 10 މުޢާމަލާތުގެ ތެރެއިން 9 މުޢާމަލާތް ހިނގަމުންދަނީ އޮންލައިންކޮށް ކަމަށް ބީއެމްއެލުން ބުނެއެވެ.