އިންޑިއާގެ ބަޖެޓް އެއަރލައިނެއް ކަމަށްވާ، ސްޕައިސް ޖެޓުގެ ދަތުރުތައް މާލެއާއި ޓްރެވިންޑްރަމާ ދެމެދު މިއަދު ފަށައިފިއެވެ.
ސްޕައިސް ޖެޓުން ރާއްޖެއަށް ހަފްތާއަކު 7 ދުވަހު ދަތުރުކުރާނެއެވެ. ސްޕައިސް ޖެޓުން މި ފެށި ދަތުރުތަކުގެ ފުރަތަމަ ފްލައިޓަށް ވެލާނާ އިންޓަރނޭޝަނަލް އެއަރޕޯޓުން ވަނީ ހޫނު މަރުހަބާއެއް ކިޔާފައެވެ.
ސްޕައިސް ޖެޓުން މިހާރުވެސް އަންނަނީ މާލެއާއި އިންޑިއާގެ ކޮޗިންއާ ދެމެދު ދަތުރުތައް ކުރަމުންމެވެ. އަދި މި ފެށި ދަތުރުތަކާއި އެކު އިންޑިއާގެ ބެންގަލޫރަށް ދާން ބޭނުންވާ ދިވެހިންނަށް ޓްރިވެންޑްރަމްގައި ކުޑަ ވަގުތުކޮޅަކަށް ޓްރާންސިޓު ކުރުމަށްފަހު އެއަރލައިންގެ ކަނެކްޓިން ފްލައިޓުގައި ދެވޭނެ ކަމަށް ސްޕައިސް ޖެޓުން ބުނެއެވެ. އަދި މިއާއެކު އިންޑިއާގެ ހައިދްރައާބާދަށްވެސް ދާން ބޭނުންވާ ފަރާތްތަކަށް އެ އިންތިޒާމް ހަމަޖެހޭނެ ކަމަށްވެސް އެއަރލައިނުން ހާމަކުރެއެވެ.
img:http://s2.psmnews.mv/images/660x400/14944355839645.jpg|ޓްރިވެންޑްރަމާއި މާލެއާއި ދެމެދު ދަތުރުތައް ފެށި ސްޕައިސް ޖެޓުގެ ފުރަތަމަ ފްލައިޓަށް މަރުޙަބާ ކިޔަނީ / ފޮޓޯ: އެއަރޕޯޓްސް ކޮމްޕެނީ
ޓްރެވިންޑުރަމުން މާލެއާއި ދެމެދު ކުރާ ދަތުރުތަކުގައި ބޭނުންކުރާނީ 78 ގޮޑީގެ ބޮމްބާޑިއާ ކިއު ފޯ ހަންޑްރެޑް މަރުކައިގެ ބޯޓެއްކަމަށްވެސް ސްޕައިސް ޖެޓުން މަޢުލޫމާތުދެއެވެ. ޓްރިވެންޑުރަމުން ރާއްޖެއަށް އައި ސްޕައިސް ޖެޓް ބޯޓުގެ ކެޕްޓަން ވަނީ މިފެށި ދަތުރުތަކާއި ގުޅޭ ގޮތުން ޕީއެސްއެމް ނިއުސްއާ ވާހަކަދައްކާފައެވެ. ސްޕައިސް ޖެޓުން އަންނަނީ ބައިނަލްއަޤްވާމީ 7 މަންޒިލަކަށާއި އިންޑިއާގެ 39 ސިޓީއަކަށް ދަތުރުކުރަމުންނެވެ. އެގޮތުން ދުވާލެއްގެ މައްޗަށް 354 ދަތުރު އެއަރލައިނުން ކުރެއެވެ.
ސްޕައިސް ޖެޓަށް ވަނީ 2016 ވަނަ އަހަރުގެ "އޭޝިއާސް ގްރޭޓަސްޓް ބުރޭންޑްސް" އެވޯޑު ލިބިފައެވެ. ޓްރެވެންޑުރަމަކީ ދިވެހިން އެންމެ ގިނަ އަދަދަކަށް ބޭސް ފަރުވާ ކުރަންދާ މަންޒިލަށް ވާއިރު ސްޕައިސް ޖެޓުގެ ދަތުރުތައް މާލެއާއި ޓްރެވިންޑްރަމާ ދެމެދު ފެށުމުން ދަތުރުކުރާ ފަރާތްތަކަށް ބޮޑެތި ފަސޭހަތަކެއް ލިބިގެންދާނެއެވެ.