އަންނަ ޖުލައިމަހު ބާއްވާ ޓީޓީއެމް ފެއަރގެ ޕާޓްނަރުންނާއެކު، މޯލްޑިވްސް ގޭޓަވޭސްއިން ސޮއިކޮށްފިއެވެ.
ޗަމްޕަރ ސެންޓްރަލް ހޮޓެލްގައި ބޭއްވި ރަސްމިއްޔާތެއްގައި މޯލްޑިވްސް ގޭޓަވޭސްއިން، ޓީޓީއެމް ފެއަރގެ ތޭރަ ޕާރަޓްނަރަކާއެކު ވަނީ ސޮއިކޮށްފައެވެ. މީގެ ތެރޭގައި ދިރާގް، އެމްޓީސީސީ، އެސްޓިއޯ، އަލްޝާލީ މެރިން، މޯލްޑިވްސް ގޭސް، އެމްއެމް އެކްސްޕޯޓްސް، ވަންސްޓޮޕް، މޯލްޑިވްސް އެއާޕޯޓްސް ކޮމްޕެނީ ލިމިޓެޑް އަދި އެމްޑަބްލިއުއެސްސީ ހިމެނެއެވެ. މި ޓީޓީއެމް ފެއަރއަކީ ރާއްޖޭގެ ޓޫރިޒަމް ދާއިރާގައި މަސައްކަތްކުރާ ފަރާތްތަކާއި ދުނިޔޭގެ ބޮޑެތި ޓްރެވަލް އެޖެންޓުންނާއި ގުޅުވާލުމަށް ކުރިއަށް ގެންދާ ފެއަރއެކެވެ.
img:http://s1.psmnews.mv/images/660x400/14945008720129.jpg|ޓީޓީއެމް ފެއަރގެ ޕާޓްނަރުންނާއެކު ސޮއިކުރުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް
ރާއްޖޭގައި ބާއްވާ ފުރަތަމަ އިންޓަނޭޝަނަލް ޓްރެވަލް ޓްރޭޑް ފެއަރ، ޓީޓީއެމްގައި ބައިވެރިވުމަށް މިހާރު ސަތޭކައަށް ވުރެއް ގިނަ ރިސޯޓުންވަނީ ރަޖިސްޓްރީކޮށްފައެވެ. އަދި މި ފެއަރއަށް ސަތޭކަ ފަންސާހަށްވުރެ ގިނަ ޓުއަރ އޮޕަރޭޓަރުނާއި ފަތުރުވެރިކަމުގެ ދާއިރާގައި ހަރަކާތްތެރިވާ ތަޖްރިބާކާރުން ޒިޔާރަތްކުރާނެ ކަމަށް ވަނީ ލަފާކޮށްފައެވެ.
ޓީޓީއެމް ފެއަރ ބޭއްވުމަށް ހަމަޖެހިފައިވަނީ އަންނަ ޖުލައި މަހުގެ 12 އަދި 13 ވަނަ ދުވަހުގެ ނިޔަލަށް ދަރުބާރުގޭގައެވެ. ޓީޓީއެމް ފެއަރގެ ތެރެއިން ތަފާތު އިތުރު ހަރަކާތްތައް ކުރިއަށް ގެންދިޔުމަށް ވަނީ ރާވާފައެވެ. އެގޮތުން ފެއަރގެ ފުރަތަމަ "ޓޫރިޒަމް ކެރިއަރ ފެއަރ"އަކާއި، ހޮޓަލިއަރ ސަމިޓް، ޕާޓާއިން ބާއްވާ ޓްރެނިންގ ހިމެނެއެވެ. އަދި ޓީޓީއެމްގެ ގާލާ ނައިޓް ބާއްވަން ހަމަޖައްސާފައިވަނީ ޖުލައި މަހުގެ 13 ވަނަ ދުވަހު، އަދާރަން ހުދުރަންފުށި ރިސޯޓުގައެވެ. ގާލާ ނައިޓުގައި މަޓާޓޯއިން ދޭ މޯލްޑިވްސް ޓްރެވަލް އެވޯޑްސްގެ ޕީޕަލް އެޑިޝަންގެ އެވޯޑު ލިބޭ ފަރާތްތައް އިއުލާން ކުރުމަށް ވަނީ ހަމަޖެހިފައެވެ.