އިޓަލިއާ ޓްރެވަލް އެވޯޑްސްގެ އެންމެ ހިތްގައިމު މޫދު މަންޒިލްގެ އެވޯޑު ރާއްޖެއަށް ލިބިއްޖެއެވެ.
ރާއްޖެއަށް މި އެވޯޑު ލިބުނީ ސީޝެލްސް އަދި ޕޮލިނީޝިއާ ވާދަކޮށްގެންނެވެ. ރާއްޖޭގެ ފަރާތުން މި އެވޯޑާއި ހަވާލުވެވަޑައިގަތީ ޖެނީވާގައި ހުންނަ އދ. އޮފީހުގެ ރާއްޖޭގެ ދާއިމީ މަންދޫބު ޑރ ހާލާ ހަމީދެވެ. އިޓަލިއާ ޓްރެވަލް އެވޯޑްސް ހަފްލާ ބާއްވާފައިވަނީ އިޓަލީގެ ރޯމުގައެވެ.
މިދިޔަ އަހަރު ރާއްޖެއަށް ވަނީ އިޓަލިއާ ޓްރެވަލް އެވޯޑްސްގެ އެންމެ ހިތްގައިމު ގޮނޑުދޮށްތަކުގެ މަންޒިލްގެ އެވޯޑުވެސް ލިބިފައެވެ. އިޓަލީގެ ޓްރެވަލް އެވޯޑްސްތަކުގެ އޮސްކާގެ ގޮތުގައި ބެލެވޭ އިޓަލިއާ ޓްރެވަލް އެވޯޑްސްއަކީ ދުނިޔޭގެ ފަތުރުވެރިކަމުގެ ދާއިރާ ކުރިއަރުވައި، ފެންވަރު ރަގަޅު ކުރުމަށް ހިތްވަރު ދިނުމުގެ ގޮތުން ދޭ އެވޯޑެކެވެ.
އިޓަލީ އަކީ ރާއްޖޭގެ ފަތުރުވެރިކަމަށް މުޙިއްމު ޤައުމެކެވެ. އެގޮތުން ރާއްޖެއަށް އަންނަ ފަތުރުވެރިންގެ 5.5 އިންސައްތައަކީ އިޓަލީ ފަތުރުވެރިންނެވެ. މިދިޔަ އަހަރު އިޓަލީއިން ރާއްޖެއަށް 71،000 ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ 2015 ވަނަ އަހަރާ އަޅާ ބަލާއި 8.5 އިންސައްތަ އިތުރު އަދަދެކެވެ.