ރޯދަމަހު އެންމެ ޑިމާންޑު ބޮޑުވާ ކާބޯތަކެތީގެ ބާވަތްތަކުގެ އަގު އެއްހަމައެއްގައި ހިފެހެއްޓުމަށް މަސައްކަތްކުރައްވަމުންދާ ކަމަށް އިކޮނޮމިކް މިނިސްޓްރީން ހާމަކުރައްވައިފިއެވެ.
އެ މިނިސްޓްރީން ވިދާޅުވީ ރާއްޖެއަށް ކާބޯތަކެތި އެތެރެކުރާ ފަރާތްތަކާއި އެކު މިކަމާ ގުޅޭ މަޝްވާރާކުރައްވާފައިވާކަމަށެވެ. އަދި ރޯދަމަހު ތަކެތީގެ އަގުތައް އުފުލުނަ ނުދޭނެކަމުގެ ޔަޤީންކަން ވިޔަފާރިވެރިން ދީފައިވާކަމަށްވެސް އިކޮނޮމިކް މިނިސްޓްރީން ވިދާޅުވެއެވެ.
ޑެޕިއުޓީ އިކޮނޮމިކް މިނިސްޓަރ އަބްދުﷲ މުޙައްމަދު ވިދާޅުވީ ރޯދަމަހު ކާބޯތަކެތީގެ އަގުތައް އުފުލިގެން ދިޔުމަކީ އާއްމު ރައްޔިތުންނަށް އޭގެ ސަބަބުން ދަތިތަކާ ކުރިމަތިވާ ކަމަކަށްވުމުން އެގޮތަށް އެކަން ވިޔަ ނުދިނުމަށްޓަކައި، އިކޮނޮމިކް މިނިސްޓްރީން މަސައްކަތްކުރައްވާނެ ކަމަށެވެ. އަދި މީގެ އިތުރުން މިއަހަރުވެސް ބާޒާރުގެ އެންމެ ހެޔޮ އަގު ޕްރޮގްރާމް ކުރިއަށް ގެންދިޔުމަށް ރާވާފައިވާ ކަމަށާއި މިހާތަނަށް 6 ފަރާތަކުން މިޕްރޮގްރާމްގައި ބައިވެރިވުމަށް ޝައުގުވެރިކަން ފާޅުކޮށްފައިވާ ކަމަށް އަބްދުﷲ މުޙައްމަދު ވިދާޅުވިއެވެ. އަދި މިއަހަރު މި ޕްރޮގްރާމް އެހެން އަހަރުތަކަށްވުރެ ފުރިހަމައަށް ގެންދިޔުމަށް ނިންމާފައިވާ ކަމަށްވެސް އަބްދުﷲ މުޙައްމަދު ވިދާޅުވިއެވެ.
ރޯދަމަހަކީ އާއްމުގޮތެއްގައި ކާބޯތަކެތީގެ އަގު މައްޗަށް އުފުލިގެންދާ މަހެކެވެ. އެހެން ނަމަވެސް މިއަހަރު އެކަން އެގޮތަށް ވިޔަ ނުދިނުމަށްޓަކައި އިކޮނޮމިކް މިނިސްޓްރީން ވަނީ ވިޔަފާރިވެރިންނަށް އަގުތައް އެއްވެސް ހަރުދަނާ ސަބަބެއް ނެތި މައްޗަށް ނުޖެއްސުމަށް އިލްތިމާސްކުރައްވާފައެވެ.