ސަބާ މޯލްޑިވްސްގެ މެމްބަރުން އުފައްދާ ކާބޯތަކެތީގެ ބާވަތްތައް މި ރޯދަމަހުގެ ތެރޭގައި މާލޭގެ ބާޒާރުން ލިބޭނެ އިންތިޒާމް ހަމަޖެއްސެވުމުގެ މަސައްކަތް ކުރައްވަމުން ގެންދަވާ ކަމަށް އިކޮނޮމިކް މިނިސްޓްރީން ވިދާޅުވެއްޖެއެވެ.
ގޭގައި ތިބެގެން އާމްދަނީ ހޯދުމަށް މަސައްކަތްކުރާ ފަރާތްތައް އަދި ޚާއްޞަކޮށް އަންހެން ކަބަލުންގެ ދިވެހި އުފެއްދުންތަކަށް މާރކެޓު ހޯދައިދިނުމަށް މަސައްކަތްކުރާ ސަބާ މޯލްޑިވްސްއުން އުފައްދާ ކާބޯތަކެތި އެއްތަނަކުން ޢާއްމުންނަށް ގަންނަން ލިބޭނެ އިންތިޒާމް ހަމަޖެއްސެވުމަށްޓަކައި، އެކަމާގުޅޭ މަޝްވަރާތައް މިފްކޯއާއެކު ކުރައްވަމުން އަންނަކަމަށް އިނޮމިކް މިނިސްޓްރީން ވިދާޅުވެއެވެ.
ޑެޕިއުޓީ އިކޮނޮމިކް މިނިސްޓަރ ޢަބްދު ﷲ މުޙައްމަދު ވިދާޅުވީ މިފްކޯ މަސްފިހާރައިގައި، ސަބާގެ އުފެއްދުންތަކަށް ޚާއްޞަ ހަރުގަނޑެއް ބެހެއްޓެވުމަށް ނިންމާފައިވާ ކަމަށާއި ކުރިއަށް އޮތް ހަފްތާތެރޭގައި އެކަން ހަމަޖެހިގެންދާނެ ކަމަށެވެ.
އެހެންކަމުން މިފްކޯ މަސްފިހާރައިގައި ވިއްކަން ބަހައްޓަން ބޭނުންވާ އުފެއްދުންތަކުގެ ނަމޫނާތައް އިކޮނޮމިކް މިނިސްޓްރީއަށް ހުށަހެޅުމަށް އެކޮނޮމިކް މިނިސްޓްރީން ވަނީ އެދިވަޑައިގަންނަވާފައެވެ.
ސަރުކާރުގެ 40 އިންސައްތަ ޙިއްޞާ އަދި ގޭގައި ތިބިގެން މަސައްކަތްކުރާ ފަރާތްތަކުގެ 60 އިންސައްތަ ޙިއްޞާވާ މި ކޯރޕަރޭޓިވް ސޮސައިޓީގައި ރަޖިސްޓްރީވެފައިވާ ޢާއްމު މެމްބަރުންގެ އަދަދު ދެހާހާ ގާތްކުރެއެވެ.