ރިސޯޓް ތަރައްޤީކުރަން ދޫކުރާ ރަށްތަކުގެ ލިސްޓަށް ޓޫރިޒަމް މިނިސްޓްރީން ތިން ރަށެއް އިތުރުކުރައްވައިފިއެވެ.
ފަތުރުވެރިކަމާބެހޭ ކަންކަމަށް ދޫކުރާނެ ރަށްރަށާއި ފަޅުތަކުގެ އަދަދާއި އެތަންތަނާބެހޭ މައުލޫމާތުގެ ލިސްޓަށް އިތުރުކުރައްވާފައިވަނީ ކ އަތޮޅު އަގި، އދ އަތޮޅު ބޮޑުކާށި ހުރާ އަދި އެއަތޮޅު ލޮނުބޮއިއެވެ. މީގެ ތެރެއިން ކ އަތޮޅު އަގި އަކީ 2.5 ހެކްޓަރުގެ ރަށެކެވެ. މިރަށުގެ އަންދާޒާކުރެވޭ އެކުއިޒިޝަން ކޮސްޓްގެ ގޮތުގައި ކަނޑައަޅުއްވާފައިވަނީ، 2.1 މިލިއަން ޑޮލަރެވެ.
އދ ބޮޑުކާށިހުރާ އަކީ 2.4 ހެކްޓަރުގެ ރަށެކެވެ. މިރަށުގެ އެކުއިޒިޝަން ކޮސްޓްގެ ގޮތުގައި ކަނޑައަޅުއްވާފައިވަނީ، 1.7 މިލިއަން ޑޮލަރެވެ. އދ އަތޮޅު ލޮނުބޮއި އަކީ 2.1 ހެކްޓަރުގެ ރަށެކެވެ. މިރަށުގެ އެކުއިޒިޝަން ކޮސްޓްގެ ގޮތުގައި ކަނޑައަޅުއްވާފައިވަނީ، 1.5 މިލިއަން ޑޮލަރެވެ.
ރިސޯޓް ތަރައްޤީކުރަން ދޫކުރާ ރަށްތަކުގެ ލިސްޓްގައި އިތުރު ތިން ރަށެއް ހިމަނާފައިވާއިރު، ސަރުކާރުގެ އަމާޒަކީ އަހަރަކު މަދުވެގެން 10 ރިސޯޓް މާކެޓަށް ނެރުއްވުންކަމަށެވެ. މިގޮތުން މިދިޔަ އަހަރުވެސް 11 ރިސޯޓް މާކެޓަށް ނެރުއްވާފައިވާކަމަށް ޓޫރިޒަމް މިނިސްޓްރީން މައުލޫމާތުދެއްވައެވެ.
މީގެކުރިން ޖުމްލަ 17 ރަށެއް ފަތުރުވެރިކަމާބެހޭ ކަންކަމަށް ދޫކުރުމަށް ނިންމަވާފައިވީނަމަވެސް އަލަށް އިތުރު ކުރެއްވި މި ތިން ރަށާއެކު ޖުމްލަ ވިހި ރަށެއް ފަތުވެރިކަމާބެހޭ ކަންކަމަށް ދޫކުރުމަށްވަނީ ނިންމަވާފައެވެ. ޓޫރިޒަމް ޤާނޫނަށް މިދިޔަ އަހަރު ގެންނެވި އިސްލާޙުގެ ދަށުން މިރަށްތައް ކުއްޔަށް ދޭން ނިންމަވާފައިވަނީ ބިޑް ކުރުމެއްނެތިއެވެ.
ޓޫރިޒަމް މިނިސްޓްރީން ވިދާޅުވީ ކުއްޔަށް ދޫކޮށްލުމަށް ނިންމާ ރަށްތަކުގެ އަގުތަކުގެ ގޮތުގައި އިޢުލާނުގައި ހިމަނާ އަގުތަކަކީ އަންދާޒީ އަދަދުތަކެއްކަމަށެވެ. އެ އަދަދުތައް ސީދާ ކަށަވަރުކުރެވޭނީ މިނިސްޓްރީން ޤަބޫލުކުރާ ފެންވަރުގެ ސާވޭއެއް ހެއްދެވުމަށްފަހުކަމަށްވެސް ޓޫރިޒަމް މިނިސްޓްރީން ވިދާޅުވެއެވެ.