ބާޒާރުގައި ދިވެހި ގިތެޔޮ މިރުހުގެ އަގު ހެޔޮވެއްޖެއެވެ. މިއީ ރޯދަމަސް ފެށުނުއިރު ބާޒާރުގައި އެންމެ އަގު ބޮޑު އެއް ބާވަތެވެ.
ބާޒާރުގައި މިއަދުވެސް ގިނަ ބާވަތްތަކެއްގެ ތަރުކާރީ އާ މޭވާ ލިބެން އެބަހުއްޓެވެ. އަދި ރޯދަމަސް ފެށުނުއިރު އަގު އެންމެ ބޮޑަށް އުފުލިފައިވާ ބާވަތް ކަމަށްވާ ގިތެޔޮ މިރުހުގެ އަގު މިހާރު ވަނީ ދަށަށް ގޮސްފައެވެ. އެގޮތުން ރޯދަމަސް ފެށުނު އިރު ބާޒާރުގައި ސަތޭކަ ގްރާމް ގިތެޔޮ މިރުސް ލިބެންހުރީ 50 ރުފިޔާއާ 60 ރުފިޔާއާއި ދެމެދުގެ އަގެއްގައެވެ. އަދި މިރުސް ކިލޯއެއް މާރުކޭޓުގައި ލިބެންހުރީ 600 ރުފިޔާއަށެވެ. އެހެން ނަމަވެސް މިހާރު ބާޒާރުން ދިވެހި ގިތެޔޮ މިރުސް ކިލޯއެއް ލިބެން ހުރީ 380 ރުފިޔާ އާ 450 ރުފިޔާއާ ދެމެދުގެ އަގުތަކެއްގައެވެ.
ބާޒާރުގައި މިއަދު ކޮޕީފަތް ވަނީ މަދުވެފައެވެ. އަދި 2 ފަތުގެ ކޮޕީފަތް ބޮނޑިއެއް ފަނަރަ ރުފިޔާއަށް ލިބެން ހުރިއިރު، 3 ފަތުގެ ކޮޕީ ފަތް ބޮނޑިއެއް ލިބެން ހުރީ ވިހި ރުފިޔާއަށެވެ. ތަކެތި ވިއްކާ ފަރާތްތަކުން ބުނަނީ ބާޒާރަށް ފަތް ލިބެނީ ވަރަށް މަދުން ކަމަށެވެ. އަދި މީގެ އިތުރުން ކުއްޅަފިލާފަތްވެސް ބާޒާރުން ލިބެންހުރީ ވަރަށް މަދުންނެވެ. ބާޒާރުގައި މިއަދު ކަރާ ކިލޯ އެއް ލިބެން ހުރީ ފަނަރަ ރުފިޔާއާ ވިހި ރުފިޔާއާ ދެމެދުގެ އަގެއްގައެވެ.
މިހާރު ބާޒާރުން ކާށި ލިބެން ހުރީ ފަންސަވީސް ރުފިޔާ އާއި ދިހަ ރުފިޔާއާ ދެމެދުގެ އަގުތަކެއްގައެވެ. ލުނބޯ ކިލޯއެއްގެ އަގު ހުރީ ފަސްދޮޅަސް ރުފިޔާގައެވެ.