ފަތުރުވެރިކަމުގެ ދާއިރާގެ އޮސްކާގެ ގޮތުގައި ބެލެވޭ، ވޯލްޑް ޓްރެވަލް އެވޯޑްސްގެ އިންޑިއަން އޯޝަން ގާލާ ހަފްލާ މިމަހުގެ 8 ވަނަ ދުވަހު ރާއްޖޭގެ ރިސޯޓެއްކަމަށްވާ ސަން އަކުއާ ވިލު ރީފްގައި އޮންނާނެެއެވެ.
މި ހަފްލާއަށް ރާއްޖެއަށް އަންނަ ފަރާތްތަކަށް ރާއްޖޭގެ ސަގާފަތާއި ގުޅޭ މައުލޫމާތުދިނުމުގެ އިތުރުން، ސަޤާފީ ބައެއް ކުޅިވަރުތައްކަމަށްވާ ބަނޑިޔާ އަދި މާފަތި ނެށުމުގައި އެފަރާތްތަކުން ބައިވެރިވާނެއެވެ. ވޯލްޑް ޓްރެވަލް އެވޯޑްސްގެ އިންޑިއަން އޯޝަން ގާލާ ހަފްލާގައި އައިޓަމްތައް ހުށަހަޅައިދޭ ފަރާތްތަކުގެ ތެރޭގައި ރާއްޖޭގެ މަޝްހޫރު ލަވަކިޔުންތެރިޔާ މަރިޔަމް އުނޫޝާ ހިމޭނެއެވެ.
މިއަހަރުގެ ވޯލްޑް ޓްރެވަލް އެވޯޑަށްވެސް ރާއްޖޭގެ އެކި ރިސޯޓްތަކާއި ފަތުރުވެރިކަމުގެ ޚިދުމަތްދޭ ބައެއް ތަންތަން ނޮމިނޭޓް ވެފައިވެއެވެ. ރާއްޖެ ނޮމިނޭޓްވެފައިވާ އެވޯޑްތަކަށް ބަލާއިރު، އެންމެ މަޤްބޫލް މަންޒިލް އަދި އެންމެ މަޤްބޫލު ޑައިވް، ހަނީމޫން، އަދި ކްރޫޒް ޑެސްޓިނޭޝަން ހިމެނެއެވެ. އޮންލައިންކޮށް ވޯޓް ދީގެންނާއި އަދި ޚާއްސަ ޖަޖުންގެ ޕެނަލަކުން މާކްސް ދީގެން ހޮވާ މި އެވޯޑަށް އޮންލައިންކޮށް ވޯޓު ދިނުމުގެ ފުރުޞަތު ވަނީ މޭމަހުގެ 22 ވަނަ ދުވަހު ހަމަވެފައެވެ.
ވޯލްޑް ޓްރެވަލް އެވޯޑްސްގެ ގާލާ ހަފްލާ ދުނިޔޭގެ ހަތް ސަރަޙައްދެއްގައި ބާއްވާފައެވެ. އެ ހަތް ސަރަޙައްދަކީ އިންޑިއަން އޯޝަން، އެފްރިކާ، މެދުއިރުމަތި، ޔޫރަޕް، ކެރީބިއަން އެންޑް ނޯތު އެމެރިކާ، ލެޓިން އެމެރިކާ، އޭޝިއާ އަދި އޮސްޓްރޭލިއާއެވެ. އަދި މިސަރަޙައްދުތަކުން އެވޯޑު ހާސިލް ކުރާ ފަރާތްތައް ވާދަ ކުރާނީ ވޯލްޑް ޓްރެވަލް އެވޯޑްގެ ގްރޭންޑް ފިނާލޭއަށެވެ. މި އަހަރުގެ ގްރޭންޑް ފިނާލޭ ހަފްލާ ބޭއްވުމަށް ހަމަޖެހިފައިވަނީ ޑިސެމްބަރުމަހުގެ 10 ވަނަ ދުވަހު ވިއެޓްނާމުގައެވެ.
މިދިޔަ އަހަރުގެ ވޯލްޑް ޓްރެވަލް އެވޯޑްސްގެ ގްރޭންޑް ފިނާލޭ ބާއްވާފައިވަނީ ރާއްޖޭގެ ސަން ސިޔާމް އިރުފުށީގައެވެ. އަދި ވޯލްޑް ޓްރެވަލް އެވޯޑްސްގެ އިންޑިއަން އޯޝަން ގާލާ ހަފްލާ 2013 ވަނައަހަރު ބާއްވާފައިވަނީ ރާއްޖޭގެ ޕެރެޑައިސް އައިލެންޑް ރިސޯޓްގައެވެ.