ތުނޑުކުނާ ވިޔަން ދަސްކުރުމަށް ޝައުގުވެރިކަން ހުރި އަދި އެ މަސައްކަތުން ޢާމްދަނީ ހޯދަން ބޭނުންވާ ފަރާތްތަކަށް އަމާޒްކޮށްގެން ތަމްރީން ޕްރޮގްރާމެއް ހިންގުމަށް މިނިސްޓްރީ އޮފް އެންވަޔަރަމަންޓް އެންޑް އެނާރޖީން ނިންމައިފިއެވެ.
މި ތަމްރީނު ޕްރޮގްރާމަކީ ޔޫރަޕިއަން ޔޫނިއަނުން ފަންޑުކޮށް، ވޯލްޑް ބޭންކުން މެނޭޖްކޮށް، މިނިސްޓްރީ އޮފް އެންވަޔަރަމަންޓް އެންޑް އެނާރޖީން ހިނގާ ކްލައިމެޓް ޗޭންޖް އެޑަޕްޓޭޝަން ޕްރޮޖެކްޓް، ސީކެޕްގެ ދަށުން މޯލްޑިވްސް އޯތެންޓިކް ކްރާފްޓްސް ކޯޕަރޭޓިވް ސޮސައިޓީ، މެކްސްއާ ޙަވާލުކޮށްގެން ހިނގާ ތަމްރީނު ޕްރޮގްރާމެކެވެ.
ކްލައިމެޓް ޗޭންޖް އެޑަޕްޓޭޝަން ޕްރޮޖެކްޓް، ސީކެޕްގެ ތެރޭގައި ހިމެނެނީ ދެމެހެއްޓެނިވި ގޮތެއްގައި ކުޅި، ފާ، ޗަސްބިން މެނޭޖްކުރުމުގެ ބަޔަކާއި، ކުނި މެނޭޖްކުރުމުގެ ބަޔަކާއި އަދި ފަރުތަކަށް އަންނަ ބަދަލުތައް ދިރާސާކުރުމުގެ ބައެކެވެ. ދެމެހެއްޓެނިވި ގޮތުގައި ކުޅި، ފާ، ޗަސްބިން މެނޭޖްކުރުމުގެ ތެރެއިން ކުރެވޭ މުހިންމު އެއްކަމަކީ މިފަދަ ތަންތަނުން އާމްދަނީ ލިބިދާނެ މަގުތައް އާންމުންނަށް ދައްކައިދީ އެކަންކަން ކުރުމަށް އާންމުން ތަމްރީނު ކުރުމެވެ.
އެގޮތުން މި ތަމްރީނު ޕްރޮގްރާމުގައި ދަސްކޮށްދޭނީ ފުވައްމުލަކު ޗަސްބިން ސަރަހައްދުގައި ހެދޭ ހައު ބޭނުންކޮށްގެން ތުނޑުކުނާ ވިޔާނެ ގޮތާއި މިތަކެތި ވިއްކާ، މާކެޓް ކުރެވިދާނެ ގޮތްތަކެވެ. މިކޯހުގައި ބޭނުންކުރާނެ ތަކެތި ކޯސް އިންތިޒާމްކުރާ ފަރާތުން ދޭނެ ކަމަށާއި ކޯހުގައި ބައިވެރިވުމަށް ފީއެއް ދޭއްކަން ނުޖެހޭނެ ކަމަށްވެސް އެންވަޔަރަމަންޓު މިނިސްޓްރީން ހާމަކުރައްވައެވެ.
މިކޯހުގައި ގިނަވެގެން ބައިވެރިވެވޭނީ 16 ފަރާތަކަށް ކަމަށާއި ބައިވެރިވާން ބޭނުންވާ ފަރާތްތަކުން މި މަހުގެ 22 ވަނަ ދުވަހުގެ 14:00 ގެ ކުރިން އެޕްލިކޭޝަން ފޯމް ފުރިހަމަ ކުރުމަށްފަހު ފުވައްމުލަކު ސިޓީ ކައުންސިލް އިދާރާއަށް ހުށަހަޅަން ޖެހޭނެ ކަމަށްވެސް އެންވަޔަރަމަންޓު މިނިސްޓްރީން ހާމަކުރެއެވެ.