ދާލު އެއަރޕޯޓް މެދުވެރިކޮށް ފުރަތަމަ ފަހަރަށް ފަތުރުވެރިންގެ ބަޔަކު ދ.އަތޮޅު ކަނޑިންމަ ރިސޯޓަށް ޒިޔާރަތްކޮށްފިއެވެ.
ކަނޑިންމަ ރިސޯޓަށް ފަތުރުވެރިން ޒިޔާރަތްކޮށްފައިވަނީ ހޮނިހިރު ދުވަހު މޯލްޑިވިއަނުން ދާލު އެއަރޕޯޓަށް ޝެޑިއުލްކުރި ފުރަތަމަ ކޮމާޝަލް ފްލައިޓްގައެވެ. މައުލޫމާތު ލިބިފައިވާގޮތުގައި މި ފްލައިޓްގައި ދަތުރުކުރީ ޗައިނާގެ ފަސް ފަތުރުވެރިންނެވެ. މި ފަސް ފަތުރުވެރިންނަށް މޯލްޑިވިއަން އަދި ދާލު އެއަރޕޯޓް ހިންގާ ކުންފުނިން ވަނީ ހޫނު މަރުހަބާއެއް ކިޔާފައެވެ.
ދާލު އެއަރޕޯޓަށް މޯލްޑިވިއަނުން ފެށި ޝެޑިއުލް ދަތުރުތަކާއި ބެހޭގޮތުން ޕީއެސްއެމް ނިއުސްއަށް މައުލޫމާތު ދެއްވަމުން އައިލެންޑް އޭވިއޭޝަނުގެ މެނޭޖިން ޑިރެކްޓަރ ޢަބްދުލްހާރިސް ވިދާޅުވީ، ވެލާނާ އިންޓަނޭޝަނަލް އެއަރޕޯޓުން ދާލު އެއާރޕޯޓަށް ދުވާލަކު އެއް ފްލައިޓް ދަތުރުކުރާނެކަމަށެވެ. ޑިމާންޑަށް ބެލުމަށްފަހު، މިއަހަރު ނިމުމުގެ ކުރިން ފްލައިޓްތަކުގެ ޢަދަދު ތިނަކަށް އިތުރުކުރާނެކަމަށްވެސް ހާރިސް ވިދާޅުވިއެވެ.
މޯލްޑިވިއަންގެ ދަތުރުތައް ދާލު އެއާރޕޯޓަށް ފެށުމުން، ދ އަތޮޅުގައި މިހާރު ހުރި ރިސޯޓްތަކަށް ފަތުރުވެރިން ގެންދިއުމުގައި އިތުރު ފަސޭހަތަކެއް ލިބިގެންދާނެއެވެ. އަދި އެ ސަރަޙައްދުގެ ރަށްރަށުގައި ދިރިއުޅޭ ރައްޔިތުންނަށް ވަރަށް ބޮޑު ލުއިފަސޭހަތަކެއް ލިބިގެންދިއުމާއިއެކު ޚާއްސަ ގޮތެއްގައި ވިޔަފާރިވެރިންނަށް ފަސޭހަވެ، ވިޔަފާރި ކުރިއަރައިގެން ދާނެކަން ހާރިސް ފާހަގަކުރެއްވިއެވެ.
ދާލު އެއަރޕޯޓް މަޝްރޫޢަށް ގާތްގަނޑަކަށް ވިހި މިލިއަން ޑޮލަރު ޚަރަދުކޮށްފައިވާއިރު، މިއެއާރޕޯޓް ތަރައްޤީކޮށްފައިވަނީ އެރަށުގެ ފަޅުން ގާތްގަނޑަކަށް ފަސްދޮޅަސް ދެ ހެކްޓަރުގެ ބިން ހިއްކައިގެނެވެ. އެއްހާސް އަށްސަތޭކަ މީޓަރުގެ ރަންވޭއަކާއެކު މި އެއަރޕޯޓް ތަރައްޤީކޮށްފައިވަނީ، ޕްރައިވެޓް ޖެޓް ޕާކިންގ އޭރިއާއަކާއެކުއެވެ.